جە مۆسکۆو پایتەختو رووسیاینە رێکوزیاو ژەنا کوردی بە نامۍ ڤیانۍ جە چوارچێوەو فێستیڤاڵو "مۆسکۆ یانەو منا" جە یانەو نەتەوەکا مۆسکۆینە مەراسیمێوەش بەنامۍ "رۆو کولتوری کوردی"ۆ سازکەرد. جە مەراسیمەکەنە هۆرپڕای، گۆرانیۍ و دابونەریتو گەلوو کوردی بە مێمانا نیشانە دریا.

جە مەراسیمەکەنە سەرۆکۆو جمېیەری مېیاننەتەوەیی ژەنا کوردی ژولیەت راشۆیانیە چا کەسابۍ کە قسێش کەرڎۍ.

جە قسەکانە باس جە رۆڵو رووسیای جە پارێزنای ئشناسنامەو ئێتنیکی گەلوو کوردینە کریا و ئانەیچ وزیا ڕووە کە رووسیا بەردەوام بیەن بە وەرگریکارو کولتوری گەلا چێردەسەی، ئانەیچ وزیا ڕووە کە سەرۆکو رووسیای ڤلادمیر پوتین فرەو وەختی پەشتیوانیش جە گەلوو کوردی کەرڎەن.

هامسەرۆکەو ئۆتۆنۆمی نەتەوەیی- کولتوری کوردا رووسیای، لیانا ئیسلامڤۆنا سمۆیانیشە دلۍ قسەکاشەنە سپاسو روسیایش کەرد کە دەرفەتش بە کوردا دان تا کولتور و زۋانو ۋێشا پارێزنا. لیانا ئانەش وست ڕووە کە کوردەکۍ جە رووسیانە گرڎو مافەکاشا پارێزیان، پېسە بەشێوە جە گلێرگەی فرەنەتەوەی رووسیای.

جە بەرنامەو فێستیڤاڵەکەینە گروپو گۆڤەندی کوردی "روکەن"ی و مامۆساو گروپەکەی تاتیانا ئۆدێنتیسۆڤا ئاماڎۍ بێنۍ و هۆرپڕای فۆلکلۆریشا پێشکەش کەرد.

جە مەراسیمەکەنە جە لایەنو شانۆکارو کوردی شالیکۆ بێکەسی باس جە تاریخو شانۆیی کوردی و وەڵێکۆتەیاکاش کریا و ئاماژە بە رۆڵو شانۆی جە پارێزنای میراتو کولتوری گەلوو کوردی کریا.

هەر جە مەراسیمەکەنە بەڵگەفیلمێوە سەرو تاریخو کوردی نمایش کریا، هەرپاسە چن هونەرمەندێوەیچ بە گۆرانیۍ بەشدارۍ بێنۍ و مەراسیمەکە بە گۆرانی واتەی و هۆرپڕای کوردی دمایش پنە ئاما.