میشێل بۆرا سەرنویسەر جە ڕادوێنو ئۆندا دی-ئۆترۆی ئاماژەش پانەی کەرد کە ئایدییاکۍ ڕابەرو گەلوو کورڎی عەبدوڵا ئۆجالانی سەرچەمەو ئیسفاڎە هۆرگێرتەیشانە و واتش: "جە ڕاو پەخش و ڕادوێنەکەیماوە ئایدیاکاو ئۆجالانی میاونا بە گەلا."
ڕابەرو گەلوو کورڎی عەبدوڵا ئۆجالان ماوەو ٢٥ ساڵان ئینا زیڼانو دوورگەو ئیمراڵینە، ٤١ مانگێن ئینا چېرو گۆشەگیریێوە رەهاینە و هیچ زانیاریێوە جە بارەشۆ نیاسەرەڕاو گرڎوو ئا سزا دیسپیلینا ڕۆ بە ڕۆ ئایدیاکۍ ڕابەرو گەلوو کورڎی عەبدوڵا ئۆجالانی دلۍ گەلاو جیهانینە وەڵا مبۆوە و بیەن بە سەرچەمەو زانیاری پەی چڼین دەزگایا و ئەرەمەرزیایا مەدەنی.
ڕادوێنو ئۆندا دی-ئۆترۆی ئیتالییا کە جە ساڵەو ١٩٩٢ێوەن بەشێوێوە نەریتی شارو بریشیاینە، بە بەشداری هونەرمەنڼا نامیەو ئیتالیای 'فیستیڤاڵو ١٨ ڕووەی' سازمکەرۆ. جە دووە ساڵی دماینو فیستیڤاڵەکەینە ڕوێوە تەرخانکریان پەی ئاشناکەردەی و وەڵا کەردەیۆ ئایدیاکاو رابەرو گەلوو کورڎی عەبدوڵا ئۆجالانی.
گەرەکمانە کەمپینو ئازادیی پەی ئۆجالانی بیاۋنمۍ بە گەلا'
چی بارۆ میشێل بۆرا سەرنویسەر جە ڕادوێن و ئۆندا دی-ئۆترۆی پەی ئاژانسیما قسێش کەردۍ و جە قسەکاشەنە ئاماژەش پانەیە کەرد پېسە ڕادوێنەکەیشا ماوێوە فرەن گرنگی مڎا بە بەشە کۆمەڵایەتییە جیاوازەکا کە ئینۍ ئەرەکۊشاینە و واتش: "ماوێوە فرەن ئاشناو ئەرەکۊشای گەلوو کوردینمۍ و پەشتگیریشا ۋنە مکەرمۍ. سەرو داواو نوسینگەو ئینفۆرمانسی کورڎەسانیا ئیتالیای قەرارێوە هامبەشما هۊرگېرت و جە ئاکامو ئانەینە ماوەو دووۍ ساڵان بە شێوێوە تایبەت بەشدارۍ کەمپینو ئازاڎیی پەی ئۆجالانی بیەیمۍ. پېسە ڕادوێنی ماوەو دووۍ ساڵان هەم جە پەخشکەردەیمانە و هەمیچ جە فێستیڤاڵەنە پەشگیریش مکەرمۍ جە کەمپینو ئازاڎیی ئۆجالانینە، کۊشش مکەرمۍ کەمپینەکەی بیاونمۍ بە گرڎوو بەشەکا گلېرگەی. پېسە ڕادوێنەکەیما چنی گرڎو بەشەکا کورڎەسانی ئینایمۍ پەیوەندینە. بە تایبە چنی ۋەرنیشتوو کورڎەسانی. جە ئیساتۍ و ئاینڎەیچەنە پەشتگیرۍ گەلوو کورڎی و ئازاڎیی ئۆجالانی مکەرمۍ. پۊکەی ئایدییاکۍ عەبدوڵا ئۆجالانی بە بەشێوە فرەو گلێرگەو ئتیالیا ئاشنان و دلۍ گلېرگەینە دەنگش دانۆ، پېسە ڕادوێنیچ ڕوانە و جە چالاکیەکانە سەرو ئا مژارا مردمۍ."
'ئۆجالان ڕانیشاندەرو کۊششکاران'
جە بەردەوامی قسەکاشەنە بۆرا ئاماژەش پانەیە کەرد کە ئایدیاکۍ رابەرو گەلوو کورڎی عەبدوڵا ئۆجالانی ڕا نیشانەو ئاڎیشاو گرڎو بەشەکا ئەرەکۊشای مڎۆ و واتش: "پارادایمو ئۆجالانی و تەڤگەری ئازاڎیی کورڎەسانی پەی ئێمەی چەپی جە ئەوروپانە بۆ بە سەرچەمەو ئەرەکۆشای. پېسە چەپو ئەوروپای ئینایمۍ گفتوگۆو ئانەینە کە چکۆنە غەڵەت و کەموکوڵیما هەن. جە ڕاو شیکارییەکا ئۆجالانی و ئەزموونوو ئەرەکۊشای گەلوو کورڎیوە چارەسەری پەی ئا کەموکوڵیاما پێڎا مکەرمۍ. یانی گەرەکما بواچوو ئایدیاکۍ ئۆجالانی پەی چەپو ئیتاڵیای و ئەوروپای بانۍ بە سەرچەمەو ئیسفاڎە ۋنەکەردەی."
'پەی ماڕای گۆشەگیری پەنەوازا ئەرەکۊشایما زیاتەر فراوان بکەرمۍ'
جە دمادمایی قسەکاشەنە بۆرا باسش جە گۆشگیری ئیمراڵی کەرد و واتش: "بێگومان گۆشەگیری سەرو ئۆجالانی و ٣ زیڼانیا تەرو ئیمراڵی یاگۍ قبوڵکەردەی نیا. پۊکەی هەمیشە کۊشش مکەرمۍ کە ئاژەو گۆشەگیری ئیمراڵی بیاونمۍ بە فرەتەرین بەشوو گلېرگەی، پېسە ئانەی جە فێستیڤاڵەکەنە مکەرمێش. چی ڕێوە کۊشش مکەرمۍ پەیاموو ئانەی بە حکومەتو ئیتالیای بیاونمۍ پەی ئانەی فشار سەرو تورکیای و جە بارەو ماڕای گۆشەگیرییوە کۊشش بکەرۆ. بێگومان پەی ماڕای گۆشەگیری، گرنگا ۋێما بیاۋنمۍ بە فرەتەرین بەشوو گلېرگەی."
