پارێزنەر ئۆزگور ئەرۆل ئەندامو شاندو ئیمراڵی ئەرەیاوناش مشۆم هەلومەرجو ئەرەیاونای و ئازادی هەرمانکەردەی پەی ڕابەر ئاپۆی ڕەخسنریۆ و واتش: "تەنها جە ڕاو ئێژا ئۆجالانیۆ متاویۆنە گوزراشت جە بانگەوازییێ چی جۆرە وەرفراوان بکریۆنە."
ئەندامو شاندو ئیمراڵی و یۆ جە پارێزنەرا ڕابەر ئاپۆی فایەق ئۆزگوگر ئەرۆل دەربارەو وردەکاریی چەمپنەکەوتەکەیشا جە ئیمراڵینە قسێش کەردێ.
ئەرۆل باسش جانەیە کەرد کە سەردانکەردەو ئیمراڵی فرە سەنگین بییەن پەیما و واتش: "دماو ساڵانێوە جە هەوڵدایما دما جار هەم چەمدێرێ هەلومەرجو ئیمراڵی و هەمیچ جارێوە تەر چەمما کەوت بە ئێژا ئۆجالانی ئینەیچ پەی وێش فرە گرنگ و سەنگینا. حەر پاسە جە نوسینگەو یاسایی سەدەی چنین هەڤاڵـێما هەنه ساڵانێوەن ئینی هەرمان کەردەینە پەی ئانەی بتاوانە وێشا یاونا بە ئیمراڵی، چەمدێری هەلومەرجو ئا یاگێ گێرانە. سەرەڕاو ئانەی چنین سیاسەتمەدارێ هەنی کە پەی ئی پرۆسەیە هەرمانە مکەرا. جە چەمپنە کەوتەکەی کە پەیما ڕەخسا ئێژا ئۆجالان، ئێژا حاملی یەڵدرم، ئێژا وەیسی ئاکتاش و ئێژا عەمەر خەیری کۆنار ببینین. چەمپنەکەوتێوە فرە وەش و جددی بێ. حەر پۆکەی سەردانیێ کاریگەر بێ.
ڕۆو چەمپنەکەوتەکەی بە تەمامەتی ئی دەقو داواکارییەکەی بێ. گرڏ جا بێنمێ، گرڏو شاندەکەیما جا بێ، چەمپنەکەوتەکەی بە ئامادەبییەو گرڏیما ئەنجام دریا. بێگومان یەکلاکەرەوەو ئێژا ئۆجالانی بێ. بە وردی گۆشما ونە گێرت. چنی کاتی چەمپنەکەوتەکەی جۆرێ جە گفتوگۆکەردەیش هورگێرت. حەر وێش دەقەکە بە دەستنوس ئاما و واتش، 'مشۆم نامێوەش ونە بنییەیمێ، ویر جانەیە مکەرووە نامێ 'داواکاریی ئاشتی و گلێرگەو دیموکراتیک'یش ونە بنییۆو.' سەرەتا نامێش پی جۆرە بێ جە دەقەکەنە. دماتەر دەقەکەش هورسەنگنا. جە سەرەتانە دەقەکەما پەی وانێوە و بەین بەین مردێو و وشە بە وشە قسێ کەرێ. پۆکەی گفتوگۆکە کە ماوەو یەرێ سەعاتا و نیم بەردەوام بێ. سەرەتا جارێوەتەر باس جە پەیوەندی تاریجی بەینو کورد و تورکەکاش کەرد. دماتەر باسو هەوڵدای پەی دمای ئاردەی با جەنگەیە کەرد جە ئۆزەلۆ گێڵاوە. باسش جە نزیکایەتی دەوروبەرەکەیش سەرو ئی مژارەیە کەرد. متاونە واچونە بەش بە بەش باسش چەنە کەرد."
فاروق ئۆزگور ئەرۆڵ ئەرەیاوناش دۆخو ڕابەر ئاپۆی فرە جێگیر و خاس بێ پێسەو ئانەی جە وێنەکەنە بەر گنۆنە و واتش: "فرە سەربەرزا، بە مۆراڵ و بەهێز بێ. حەقیقەتێ پی جۆرە هەن؛ ماوەو ٢٦ ساڵان ڕابەر ئاپۆ ئینا چی یاگێنە، ئینا دلێ ئی هەلومەرجەینە. بە دڵنییۆ مشۆم ئینە وەرچەم گیریۆنە. ماوەو ٢٦ ساڵێن ئینا دلێ بارودۆخو سەختو گۆشەگیرینە، دەرفەتو ئەرەیاونایش فرە کەما، پەیوەندییەکێش بە جاهانو چبەری بە تەمامەتی یانیش بە سەختی ئەرەبڕییان و سەرەڕاو گرڏو ئینیشا خاوەنو هێز و ئیرادێوەن کە مژارێوە ئنە گرنگا و هەستیارا کە پرۆسێوە بەرۆ ڕاوە. بەڕاسی ئینە فرە گرنگا.
تەماشەکەردێ، جە شاندەکەنە یۆ تا دووێ هەڤاڵێ واتشا مشۆم پەی یارمەتییدایت بەیمێ ئێکە و ماوێوە چنیت مەنمێوە، پێوەرە گفتوگۆ بکەرمێنە، پێشنیار کەرمێنە. ئایڏش بە خووەیۆ پنەش واتێ، 'شمە نمەتاودێ چێگە ئیدارە کەردێ'. حەقیقەتەن مەنەیۆ چاکە ئنە ئاسان نییا. وە دماو ئی هورسەنگنا چن سەعاتییە بە گفتوگۆو پێشنیارەکێش هورگێرتێ. بەڵێ ڕاسا کاریگەری گۆشەگیری جەسەییما وینا، بەڵام سەرەڕاو ئانەیچ فرە بە مۆراڵ بێ.
پێسەو پارێزنەرو چن ساڵەو ڕابەر ئاپۆی، فایەق ئۆزگور ئەرۆڵ واتش، "حەر جە سەرەتاوە هەوڵدای بنەڕەتیما ئازاد کەردەو ئێژا ئۆجالانین. چی مژارەنە هەڵای فاڕییایێ نییا ئارانە. بە پێچەوانۆ بە دڵنیایی مشۆم چی هەلومەرجەو ئیسەینە فاڕییای کریۆنە. ئا بابەتەی پنەش ماچانە مافو هیوای، بنەماو ئی چێوە یاساییەنە.
ئۆزگور دەسنیشانش کەرد جە دۆخو ئیسەینە مژارو ئیسەی ئانەن کە ڕابەر ئاپۆ بۆ بە خاوەنو دەرفەتەکا ئەرەیاونا و خەباتکەردێوە ئازاد و واتش: "ئێژا ئۆجالان چی بابەتەنە چوارچێوێوە وەرفراوان دەستنیشان مکەرۆ. ڕاس نییا ئی چوارچێوە جە دەقو لاپەڕ و نیمێنە بازاشۆ. مشۆم ئینەیە بزانا. مشۆم ئینە چنی هەڤاڵەکا وێش ڕۆشنکەرۆوە. مشۆم خودو وێش تاوۆنە پەی گەلی ڕۆشنش بکەرۆوە. گرنگا دەرفەتێوە خوڵقیۆمە کە تاوۆنە ڕاستەخۆ وێش گوزارشت و قسە و خیتابەکاش دۆنە. مشۆم دەرفەتو ئەرەیاونای وەرفراوان خوڵقنۆنە. مشۆم ئیتر باسو چێوێ نەکریۆنە بە نامێ گۆشەگیریۆ، حەر پاسە مەبۆنە ئیتر باس جە ئا ڕێکارییا کریۆنە کە وەراوەرو زینانیا گیریۆنە وەر. مشۆم دەرفەتو ئینیشا ڕوخسنریۆنە."
