جە پەیامو ڕابەر ئاپۆینە بۊنەو ٨ و ئاداری ڕۆو جەهانیی ژەنە کرێکاراوە، ئامان: "ڕاو سۆسیالیزمی بە ئازاڎیی ژەنارە موېیەرۆنە. تا ئازادی ژەنا بەدی نۍ، شمە نمەتاودۍ بیدۍ بە سۆسیالیستۍ. وە سۆسیالیزم نمۍ دی".
جە گلېرۊبیەو ئامەدینە، پارێزنەرە و نووسینگەو یاسایی سەدەی، سوزان ئاکیپا، پەیامو ڕابەر ئاپۆیش ۋەناوە.
پەیامەکەو ڕابەر ئاپۆی پی جۆرەنە:
"پرەنسیپی سەرەکیی من، ژیۋایۍ ئەفسووناوییا چنی شمە!
من مزانو سەرو خاکو ۋێبیەی، شمە بە گرڎ جۊرۍ جە ڕاسی مرۆڤایەتینە مژیودۍ. شمەی ژەنا داراو بەهای ئەفسووناویندۍ و من حەجگیز دەسبەردارنەبیەنە جە ژیۋایکەردەی چنی شمە. ژیۋایۍ پی جۊرە بی پا بنەمایۍ من بەپێوە مردنۆ. بەڵام ئا حەقەتینەی پەی یووەمجاری ئاڼنە شکۆمەند و ئازادا، ئڼەو وەڵینەکا تەرو میزۆپۆتامیای شکۆمەندا.
پرسو ئازادی ژەنا هەڵای گرنگی ۋێش پارێزنان. قۆناغەو کۆمۆناڵیستی دیموکراتیکی ئاژەی هامچەرخو گلېرگەبیەو ژەنۍ سەرمەشقێن. وە بەدەسئاوردەی ڕاسی کۆمەڵایەتی تەنیا پی ڕۍ ڕاش مشۊنە. تاوەکو کەلتوورو گێچەڵۍ و دەسدرێژیی ڕەگەزی دلېنە نەشۆ، جە مېڎانەکا زانست و ئێستاتیکای و ئاییندەینە، هەقیقەتو کۆمەڵایەتیچ بەرنمەگنۆ. پېسە ئانەی جە مارکسیزمەنە سەلەمیان، تا کەلتوورو پیا سالاری جە قووڵایی گلېرگەو مۆدێرنینە بنەبڕ نەکریۆ، سەرکۊتەی سۆسیالیزمی نامومکینا. ڕاو سۆسیالیزمی بە ئازادیی ژەنێرە موییەرۆنە. تا ئازادی ژەنۍ نۍ دی، نمەتاوا بانۍ بە سۆسیالیست و سۆسیالیزم بەدی نمۍ. تا دیموکراسی نەبۆ، سۆسیالیزمیچ نمەبۆ. ئەوەڵ ئەزموونو من چنی سۆسیالیزمی، بە شێوازو گفتوگۆی چنی ژەنێوە بەرکۊت. ئا کەسەی نەزانۆ چنی چەنی ژەنێوە قسۍ بکەرۆ، نمەتاوۆ بۆ بە سۆسیالیست. سۆسیالیستبیەو پیێوە بە پەیوەندیی ئاڎیی چنی ژەنێوە، لکەدریان.
پیرۆزی هینو ژەنان. ژەنی ۋێش گەردوونا. پیا هەسارێوە سەرگەردانا جە خولگەو ئی گەردوونەینە. ژەنی یووەمجار زۋانش خوڵقنا تا زاوڵەکەیش پنەش چڕۆ. ژەنی کەلتوورش ئاردەنە. ژەنی گلېرگەش ئاردەنە. پیرۆزی و خوڎاوەڼی هینو ژەنێن. من ئایدۆلۆژیاو ڕزگاریی ژەنام وەڵێوست کە جە چوار بوارا پێکمۍ. ئینە تیۆرێوەن. کەلتوورو ژەنۍ سەرمەشقۍ، سەردەمو خوڎاوەڼەکا گێڵۊوە پەی ١٠ هەزار ساڵا و ٤ هەزار ساڵۍ وەڵۍ زایینی. ئایینە یەکتاپەرسیەکۍ بە بابل دەسشا پنە کەرڎ. داستانو بابلی، داستانو کۆیلەکەردەی ژەنێن. ئاردەینەو داستانو بابلی پێکئاوەرۍ سەرەکیی میتۆلۆژیاو میزۆپۆتامیایا. جە ما بەینو ساڵەکا ٤ هەزار و ٢ هەزار ساڵۍ وەڵۍ زایینی، شکسو کەلتوورو ژەنۍ دەسش پنە کەرد. دماو هۊرشێونایۆ کەلتوورو ژەنۍ سەرمەشقۍ، چنی میتانییەکا ژەنۍ کۆشکەکا بەرۍ کۊتێ. نەفەرەتیتیە ژەنەو سەر بە کۆشکینە. ژەنا کۆشکەو ئا سەردەمیە، جە پرۆسەو تاریخینە بیۍ بە ژەنەو یانەو ئی سەردەمیە. پېسە شمەیچ مزاندۍ، کەلتوور و نەریتو ساتی هەن. جە کەلتوورو ساتییەکانە، ژەنی فڕەدریێنۍ دلۍ ئێری و سۊچنێنێشا. جە ساڵەو ١٨٣٢ ێچەنە، ئینە ڕووەشدا. دماتەر، ئینگلیزەکۍ دمایشا پی کەلتووریە ئارڎ.
ژیۋایۆیۍ تازە فرە گرنگا. مشۊم ژەنی جە ڕوو کەلتووری و کۆمەڵایەتی و تاریخیوە هۊربسەنگیا، نەوەک جە روو بایۆلۆجیوە. پېسە سیمۆن دی بۆڤواریچ ماچۆ، مرۆڤ بە ژەنی جە ئەڎۍ نمەبۆ، مکریۆ بە ژەنی. من دژو ئەوینی و هامسەرگیری نیەنا. بەڵام ڕۊنیا چېرو نامۍ ئەوینینە تاوانەی دڕندانۍ ئەنجام نەڎریۆ. کەسێوە ئەویندار چنی وەشەسیێکێش کوشۆ؟ ئینە ئەوین نییا. تا ئیساتۍ فرەو ژەنا بە مەڵامەتو پەیوەندیێوە پی جۆرەیۆ ۋێشا کوشتەن. هەرپاسە، کەلتوورو ژەنۍ ئازادۍ هەن. ئیسە شمە چی کەلتوورەیە نزیکۍ بیێندێوە. ژەنی گەرەکشانە سنوورەکاو جە ئەڎابیەی و هامژینی وېیەرنانە. بەڵام هەڵای ١٠٪ و کەلتوورو ژەنۍ ئازادۍ مژیوا. نوقتۍ سەرەکیە، جەنگکەردەین دژو زیهنیەتی. سیستەمو کۆمەڵایەتیی پیاسالاری هەمیشە کێشە پەی ژەنا مسازنۆ. تنوتیژی هەن، ئەرەگیری هەن، زینای مەحرەم هەن، دەسدرێژیی ڕەگەزی هەن، ئەگەرو کوشتەی زاوڵەی کناچۍ هەن. ئەر جە ئایندەنە زاوڵە کناچەکۍ کوشیانە، شمە چێش مکەردۍ؟ کاتێ باسو کەلتوورو ساتی مکەرو، سەرنج وزو سەرو ئی حەقەتینیە. پەنەوازا شمە دژوو ئی کەلتوور و زیهنیەتەیە جەنگ بکەردۍ. چی ڕوانگۆ، دووچارو کێماسی و ناکۆکی بیۍ، ۋێتا چی کێماسی و ناکۆکییا دەرباز بکەردۍ.
پرسو ژەنۍ جە پرسو کوردی قووڵتەرا. پرسو ژەنۍ جە پرسو کوردی گۊرەتەرا. چی ڕوانگۆ، ئێمە تەنیا هەنگامێوە سەرەتاییەما نیێنە. کەلتوورو جەنگی زیاتەر دژو ژەنا ملۆڕاوە. دلېنەبەردەی ئی کەلتووریە، داینەمۆو ئەوەکۊشای ئێمەن. ڕۆحو ئی سەردەمیە، سیاسەتو دیموکراتیکیا، زۋانو ئی سەردەمیە، زۋانو ئاشتییا. بانگەوازو "ئاشتی و گلېرگەی دیموکراتیک" هامکات ڕێنیسانسێوەن پەی ژەنا. بە عەشقو مەم و زینی و عەشقو دەروێش عەبدی، سڵام چا ژەنا مکەرو کە گۊش دارانە بانگەوازەکەیم و باوەڕیشا بە پێوەرە ژیواین، وە ٨ و ئاداری ڕۆو جەهانیی ژەنە کرێکارا پیرۆز مکەرو.
سڵام و وەشەسیایی.
عەبدوڵا ئۆجالان".
