کەجەدەکە-ئە ئەرەیاۋناش دەیان هەزار کەسۍ جە دەیان وڵاتۍ ئۆروپایۆ بەشداری فیستیڤاڵەکەیشا کەرڎ و بە جۆشو خرۆشێ گۆرۆ هاوارشا کەرڎ کە پەی قۆناغەی تازۍ هەڵمەتەکۍ ئاماڎێنۍ، سوپاسو گەلوو کورڎی و دۆسەکاشا کەرد کە پەی فیستیڤاڵەکەی سەفەربەرۍ بێنۍ.
کۆنگرەو گلێرگەی دیموکراتیکی کورڎەسانی جە ئۆروپا (کەجەدەکە_ئە) بە ئەرەیاۋنێوە نوویسیا سوپاسو ئا دەیان هەزار کەسیشە کەرد کە بەشدارۍ بێنۍ جە ٣٢ ەمین فیستیڤاڵو کەلتووری کوردینە.
جە پەیامەکەنە ئانەی یاڎ وزۆوە کە، ٣٢ ەمین فیستیڤاڵو کەلتووری کوردی بە درووشمەو "گۆشەگیری و ئەرەگیری ماڕمۍ، ڕابەر ئاپۆی ئازاڎ مکەرمۍ" ٢١ و ئەیلولی جە شارو فرانکفۆرتو ئەڵمانیاینە جە دەیان هەزار کەسا پێکئاما.
کەجەدەکە_ئە ئاماژە پانەی مکەرۆ کە زیاتەر جە سەڎ ساڵان دۊڵەتا ئەرەگیری جە چوار پارچەو کورڎەسانینە قڕکەردەی جەسەیی و کەلتووری دژو گەلوو کوردی ئەنجام مڎا و جە ۋەرا ۋەرەنە مڎرامانێوە شکۆدار هەن، وە ماچۆ: "جە ٣٢ ەمین فیستیڤاڵو مېیاننەتەوەیی کەلتووری کوردینە، کە دەیان هەزار کەسۍ جە گرڎ لێوە ئۆروپایۆ بەشدارۍ بێنۍ، گەلوو کوردی و دۆسەکێشا هەم ئیرادەو ۋێشا ئەرەیاۋنا و هەم دژو ئاسیمیلاسیۆنی(تاونایۆ) کەلتووری، دڵسۆزی ۋێشا پەی بەها کەلتوورییەکا ئەرەیاۋنا".
گەلەکەما ئاماڎەن پەی قۆناغەو تازۍ هەڵمەتەکۍ
کەجەدەکە-ئە ئەرەیاۋنۆش بەشدارا فیستیڤاڵەکەی پاگیری ۋێشا پەی هۊرگێرتەی گۆشەگیری و ئازادی جەسەیی ڕابەرو گەلوو کوردی عەبدوڵا ئۆجالانی نیشانەدا، ماچۆ: "دەیان هەزار کوردۍ و دۆسەکێشا، ژەنی و زاوڵۍ و پیر و جوان، جە دەیان وڵاتۍ ئۆروپایۆ ئامۍ، دژو ئا گۆشەگیرییەی ٢٦ ساڵېن بەردەواما بەشدارۍ فیستیڤاڵەکەی بێنۍ، بەجۆشێوە گۆرۆ هاوارشا کەرد کە، ئاماڎێنۍ پەی قۆناغەی تازۍ هەڵمەتەکۍ".
هەرپاسە ماچۆ: "ئا ئەنتەرناسیۆنالیست و دۆسۍ کە جە وڵاتا جیا جیایۆ ئامۍ، هەر جە سەرەتاوە و بە گرڎو هێزو ۋێشاوە بەشداریشا جە هەڵمەتەو "ئازادی پەی رابەرو گەلوو کوردی عەبدوڵا ئۆجالانی، چارەسەری سیاسی پەی پەرسو کوردی" کەرد، فرانکفۆرتەنە خاوەنداریشا جە ڕابەر ئاپۆی کەرد و جەختشا کەرڎۆ کە ئاڎ ڕابەرێوە مېیاننەتەوەییا".
کەجەدەکە_ئە سوپاسو گرڎو بەشدارا و ئا کەسا مکەرۆ کە دەورشا بیەن جە لوایڕاوەو فیستیڤاڵەکەینە.
