ئەندامو کۆنسەو ڕاوەبەری کەجەکەی مسەفا قەرەسوو: تورکیا نمەتاوۆ کۆسپ پەی ڕاو وزەو G-20 وەش بکەرۆ. قەوەتو ئی هەرمانێشە نیا، سەودا و ئاژەوگێڵنیەکێش بەشو ئینەی نمەکەرا. وزیان جبەرو هامسەنگییەکا ۋەرکۆتوو مېیامینی.
بەشی یەرەمو چەمپنەکۆتەکەو ئەندامو کۆنسەو ڕاوەبەری کەجەکەی مسەفا قەرەسووی پی جۆرەنە:
ساڵێوە سەرو هرووژمەکەو ٧و ئۆکتۆبەرو حەماسیرە ۋییەرڎ و ئیسرائیل جە قڕکەردەی گەلوو فەلەستینی بەردەواما. چنی ئانەی زیاڎ جە ٤٠ هەزار ئینسانۍ کوشیێنۍ، کەچی ئیسرائیل جەنگەکەش ڕووەکەردەن لوبنان و ئینەیچ گرژییەکۍ ناوچەکەیش زیاتەرۍ کەردێنۍ. جەنگی یەکساڵە چێشش نیشانەدایمۍ و پێشئامایەکۍ چنینۍ با؟
سەرکوتکەردەی حەماسی و دلێنەبەردەی حیزبوڵای پېسە مەرامو ئیسرائیلی ماوێوە فرەن ئاشکران. ئیسرائیل ۋێش پەی ئینەی ئاماڎە کەردەبۍ. کاتێ حەماس هرووژمش کەرڎ سەرو ئیسرائیلی، زیاڎ جە هەزار مەدەنیاش کوشتۍ و سەڎانیچش باڵبەسۍ کەردۍ، ئیسرائیل ئینەش بە دەرفەتێوە تاریخی زانا و بەکارش ئارڎ. تیمەکەو ئەردۆغانی ئی چالاکیەشە بە حەماسی کەرد. پینەی مەرامو ئانەیش بۍ هەم ڕاو وزەی کە ئیسرائیلەرە موییەرۆ و هەمیچ پەیمانی ئیبراهیمی جە ما بەینو عەرەبی و ئیسرائیلنە ئاستەنگ بکەرۆ. ئەردۆغان ئی هرووژمەشە کەرڎ و جە جابەجێکەردەی پلانەکاو ئیسرائیلی و ئەمریکاینە سەرو ناوچەکەی دەورو بریکاریش گێڵنا. پا جۆرەی کە ئیساتۍ کەسایەتی ئەردۆغانی ئشناسیان فرێوە جە هێزەکا ئاژاوێش پنە وەشمکەرا و ئەردۆغانی پېسە بریکاری و ئاژەوەگێڵنی بەکار مارا. ئەردۆغان هەمیشەبە کارەکاش ئینا خزمەتو بریکاربیەی و ئاژاوەگێڵنینە پەی ئەمریکای. ئەردۆغان سیاسەتمەدارێوە پا جۆرەنە کە بە سیاسەتە کەسییەکاش زیاتەر تورکیاش وستەن دلۍ قەیرانێوە.
ئەردۆغان بە گوێرەو ۋێش بەنامۍ پارێزنای پێگەو جیۆپۆلەتیکی تورکیایۆ هانەو حەماسیش دا بە هرووژم کەردەی سەرو ئیسرائیلی. بەڵام بە سیاسەتەکاش و ئاژاوەگێڵنیەکاش جە دژو هامپەیمانەکاش، پێگەو جیۆپۆلەتیکی تورکیایش دلێنەبەرد. فاکتەری سەرەکی کە دەسەڵاتداری ئاکەپە-مەهەپەن تورکیاش پی جۆرە سیاسەتا بێچارە کەردەن، سیاسەتو قڕکەردەی گەلوو کوردین. پی جۆرە جە کوردی نزیک بۆوە، گەرەکشا گرڎ هەمان هەڵوێس نیشانە بڎا و جە ئاکامو ئینەیچەنە کێشەش هەن تەنانەت چنی هامپەیمانەکایچش. دۆڵەتو تورکی سەرنجی فرەش ئینا سەرو قڕکەردەی گەلوو کوردی. جە ئاکامەنە فرێوە جە هێزەکا جە چوارچێوەو بەرژەوەندیەکاشانە ئیسفاڎە چی لاوازییەو دۆڵەتو تورکی هۆرمگێرا. جە ۋەرا ۋەرو ئا پەشتیوانییەو دۆڵەتو تورکینە پەی دژایەتی تەڤگەری ئازادی، تورکیاشا جە فرەو بوارانە وستەن چێرو دەسەڵاتو ۋێشا. محاڵە تورکیێوە کە سەرنجش سەرو قڕکەردەو کوردی بۆ، جە سیاسەتو ۋەرکۆتوو مېیامینینە کارەکتەر و دەور گێڵن بۆ. تورکیا گرڎو سەرچەمەکاش جە جەنگو دژ بە گەلوو کوردینە بەکارمارۆ و دمایش پا سەرچەما ئارڎەن. هەوڵ مڎۆ پێگەو جیۆپۆلەتیکی ۋێش بەکاربارۆ پەی ئەنجامدای قڕکەردەو گەلوو کوردی کە ئینەیچ ئاژەو تورکیای خراپتەر مکەرۆ. هەرچڼە هەلەو جیۆپۆلەتیکیش جە دەسدان، بەڵام کێشەکۍ تورکیای چنی هامپەیمانەکاش پاسشە کەردەن کە تورکیا جە سیاسەتو ۋەرکۆتوو مېیامینینە دوور وزۆوە.
ئەمریکا بە تەمامی پەشتیوانی جە هرووژمەکا ئیسرائیلی مکەرۆ. ئینەیچ پا مەعنۍ مۍ کە ئیسرائیل کاریگەریش سەرو حەماسی و حزبوڵای جە ناوچەکەنە بۆنە و کارەکتەری سیاسی و سەروازی جە ناوچەکەنە زیاڎ مکەرۆ. هەرپاسە ئێرانیچ هێزە هامپەیمانەکاش جە ناوچەکەنە جە دەس مڎۆ و یاگۍ ۋێشەنە مردۆ. ئینەیچ سیاسەتەکا ئێرانی جە ناوچەکەنە فاڕۆ. جگە جە عێراقی هیچ کاریگەریێوە سیاسیش نمەبۆ یان سنووردار بۆنە. حوسییەکۍ پەی ماوێوە چێرو چەمڎاری ئێرانینە درێژە بە سیاسەتەکاشا مڎا، بەڵام پېسە ئیساتۍ هرووژم نمەکەرا سەرو بەحری سووری و نە فرە کێشە پەی سعودییەکا وەش مکەرا. بە پوختی جە سیاسەتەکا وەڵۍ ٧و ئۆکتۆبەرو ٢٠٢٣ێنە فاڕیای گۆرە ڕووە مڎۆ. تەنانەت ئەگەر هرووژمو ئێرانی و ئیسرائلیچ ڕووە بڎۆ جە ئاکامو ئانەینە سیاسەتە هەرێمێیەکۍ ئێرانی سەرو هێزەکا جبەریۆ سنوردارۍ مکریا. ئینەیچ کاریگەریش سەرو سیاسەتو دلێینەو ئێرانیچ بۆ. بێگومان سەروەریی ئیسرائیلی و سنووردارکەردەی ئێرانی کێشەکاو ۋەرکۆتوو مېیامینی چارەسەر نمەکەرۆ. سیاسەتەکۍ ئیسرائیلی و ئەمریکای و دەوڵەت-نەتەوەکا ناوچەکەی نمەتاوا چارەسەرو کێشەکا بکەرا. پۊکەی قۆناغێوە دەس پنە مکەرۆ کە دەوڵەت نمەتاوۆ کێشەکا چارەسەر بکەرۆ و زیاتەر گەل دەور موینۆ.
ئیسرائیل نمەتاوۆ هەمیشە پەشتی بە پەشتیوانی بەری و دەسەڵاتی سەروازی ۋێش بەسۆ و سیاسەتێوە جە ناوچەکەنە ڕاوەبەر بکەرۆ. پۊکەی ئیسرائیلیچ مشۆم سیاسەتەکاش فاڕۆ. ئیسرائیل متاوۆ جە ڕاو ڕێکەوتەیۍ ناوچەیی و پەیوەندیێوە دیموکراسی چنی گەلا ناوچەکەی بیەو ۋێش مسۆگەر بکەرۆ. پۊکەی با جارێوەتەر ئانەی بزانمۍ کە چارەسەرو کێشەو ئیسرائیل و فەلەستینی پێوەسا بە نەتەوەی دیموکراتیکی و کۆنفیدرالیزمی دیموکراتی کە هەر گلێرگێوە ڕاوەبەردەی ۋێش جە دەسو ۋێشەنە بۆ کە چارەسەرو هەمیشەیی کێشەکان. جگە چینەیچ هیچ چارەسەرێوەتەر نییا. ئەگینا هەمیشە دژمنایەتی و گرژی و جەنگ ڕووە مڎۆ. بەڵام ئاشکران کە چارەسەرێوە فرە پەنەوازا.
تورکیا نمەتاوۆ ئیسرائیلی پېسە ناسەقامگیری و بێ-متمانەی نیشانە بڎۆ و ڕاڕەوو وزەی ئاستەنگ بکەرۆ کە گروپو ٢٠ قەرارشا سەردان. تورکیا هێزێوە چامنەش نییا کە دژو هێزە هەژمونگەراکا بۆوە. ئاژاوەگێڵنییەکۍ ئیتر ئیسفاڎەشا نیا. تەنیا ڕا پەی ئاسایشو تورکیای پێوەسا بە دیموکراتیکەردەی و چارەسەرکەردەی پەرسو کوردیوە. تورکیا کاتێ هەنگامەکاش بەرەو دیموکراتیکەردەی بنیۆ، کاریگەریی سیاسی، ئابووری و کولتووری سەرو گەلا ۋەرکۆتوو مېیامینی وەش مکەرۆ.
دماو ئیسرائیلی، تورکیای فاشیستو ئەردۆغانی فرەتەرین جەنگش سازنان. وە پەی زیاتەر وەڵاکەردەیۆ جەنگەکەی بە هەڵسی تیمساحیێوە ماچۆ داخەم نمەشۆ پەی فەڵەستینی و ئا جەنگەشە جە چوارچێوەو بەرژەوەندییەکا ۋێشەنە بەکارئاردەن. جە ئیساتێچەنە ئەردۆغانی فاشیست ماچۆ، 'ئیسرائیل چەمش ئینا سەرو خاکەکەیماوە' مەبەسو ئەردۆغانی چی قسۍ چێشا؟
تورکیا ماچۆ ئەگەر جەنگەکە هۆرگیسیۆ، پەنەوازشا بە تورکیای بۆوە و ڕێککەوتەی ئیبراهیمی هۆرشێویۆوە و بەشێوە فرەو ڕاڕەوو وزەی خاکو منەرە موییەرۆ. پی هەڵوێسۆ جماوە. ماچۆیچ ئەگەر جەنگێوە گەورە جە مابەینو ئێرانی و ئیسرائیلینە ڕووە بڎۆ، ئێران لاواز بۆنە و ئیسرائیل پەنەوازش بە تورکیای بۆ. مەڵامەتو دژایەتیکەردەی ئیسرائیلی، دۆسایەتی فەلەستینی و دژمنایەتی ئیسرائیلی نییا؛ بەڵکم هەوڵداین پەی ئانەی ئیسرائیل و ئەمریکا جە ناوچەکەنە گرنگی بڎا بە تورکیای. ئینە مەڵامەتەکەن. سیاسەت و قسەکا تورکیای سەبارەت بە ئیسرائیلی پەنەوازا پی جۆرە بیاومێشەنە.
مزانا ئیسرائیل هرووژم نمەکەرۆ سەرو تورکیای. بە ئەجێندێوە پا جۆرە هەوڵ مڎۆ بە هەردووە ئامانجەکەیش بیاوۆ. هەوڵ مڎۆ وڵاتێوە پېسە ئیسرائیلی وزۆنە ڕۆژەڤۆ و کە ئەمریکا و ئیسرائیل گرنگیش پنە بڎا جە کاتێنە ئیسرائیل کاریگەریش سەرو ئەمریکا و ئەوروپای هەن. جە دەسدای پێگەو جیۆپۆلەتیکی ۋێش پېسە کێشێوە ئایدیۆلۆژی موینۆ. هەر پۆکەی هەمیشە دژایەتی ئیسرائیلی مکەرۆ و هەمیشە باسو بڕۍ چێوا سەرو ئەمریکای مکەرۆ و هەوڵمڎۆ هەڵوێسی نەرێنی ئا هێزا ۋەرا ۋەرش فاڕیۆنە. وە هەوڵمڎۆ جە بواری سیاسینە گرنگیش پنە بڎریۆ. تا ئیساتۍ ئی سیاسەتەشە ڕاوەبەرکەردەن. ئیساتێچ ماچۆ ئەگەر ئینەی بکەرو ئەنجامێوەم دەس گنۆ. بەڵام ئاژەکە فرە فاڕیان و یاگۍ مشتومڕیا کە دەرەنجامو ئی سیاسەتەیشە چەنی و چنین بۆ.
دووەم: کاتێ جەنگ جە ناوچەکەنە بەردەوام بۆنە، هەوڵ مڎۆ دژمنێوە پەی ۋێش وەش بکەرۆ و پا هەرمانێچشە پەشتیوانی ئۆپۆزسیۆنی و گلېرگەی بەدەس بارۆ. چانەینە ئۆپۆزسیۆن چا مەرامەیشە یاوابۆنە، بەڵام دیارا کاریگەری سەرو گلێرگەی وەشمکەرۆ. جە حەقەتینەنە گرڎو سیاسەتمەدارا و دامودەزگاکا دۆڵەتی مزانا کە ئیسرائیل هرووژم نمەکەرۆ سەرو تورکیای. وەزیرو جبەری و وەزیرو دلێینەیچ ئینەی مزانا. بە هەرحاڵ ئا کەلیمۍ جە تەوراتەنە باسکریێنۍ و باس جە خاکە جە دەسدریایەکا مکەرا، کەردێنێشا بە بانگەشەو ئەگەرەکا ۋێشا. جە لێوەتەریچۆ ماچا ئەگەر ئیسرائیل جەنگەکەی فراوانتەر بکەرۆ، پەنابەرێوە فرە مێنە تورکیا و پینەیچ گلێرگەی و هێزە سیاسییەکا متەرسنۆ. ئی تەوراتە ٥٠ ساڵۍ چێوەڵیچ هەر بیەن. تا ئیساتۍ عالتەرین دۆسو ئیسرائیلی جە ۋەرکۆتوو مېیامینینە تورکیا بیەن. پېسە ئیسرائیلی دووەمی نریێرە. ئیساتۍ قسێوە تەوراتیشا ئاردێنە و ماچا تورکیا ئینا ئامانجو ئیسرائیلینە. پی جۆرە ئاوەزی ئایینی گلێرگەی قۆزاوە. هیچ تەرسێوە ئیسرائیلی سەرو تورکیای نیا ئارانە، بەڵام ئاشکران سیاسەتەکۍ ئاکەپە-مەهەپەی مەترسیێوە گۆرەن سەرو تورکیای. جە ئاکامو سیاسەتو ئاکەپە-مەهەپەینە، تورکیا چ جە دلێنە و چ جە جبەرۆ بییەن بە وڵاتێوە پەڕکێشە و دژمنایەتیش ۋەرا ۋەر بە گەلوو کوردی پاسشە کەرڎەن تورکیا لاواز بۆ.
ۋەرنیشتوو سەرنیشت و ۋەرکۆتوو سوریای ئینا چێرو کۆنترۆڵو ئیسرائیلینە و ئیسرائیلیچ سەرو بنەماو ئینەی بڕۍ حیساباتۍ جە بارەو تورکیایۆ مکەرۆ. گرڎو سیاسەت و پەیوەندی و قسەکێشا سەرو بنەماو دژمنایەتیکەردەی گەلوو کوردی مجییانەرە. هەرکەس و لایەنێوە پەشتیوانی جە دواکاشا پەی دژمنایەتیکەردەی کوردی نەکەرۆ، ئانە پېسە دژمنو تورکیای منیاشەرە.
کاتێک ماچا ئیسرائیل چەمش ئینا سەرو خاکەکاو ئێمە، کوردی پېسە ئامانجی نیشانە مڎا. هەرپاسە پەشتیوانی پەی هرووژمەکا سەرو ۋەرنیشتی پی جۆرە زیاڎ مکەرۆ. پی جۆرە گەر ۋەرنیشتی سەرکوت بکەرۆ، ئانە ئیتر ئیسرائیل چەمش نیا سەرو خاکو تورکیای! ئاشکران ئی ئاژەیە پەی ئا مەبەسیە وزا ڕۆژڤۆ.
تەیب ئەردۆغان سەرەڕاو ئانەی کە جە تورکیا و ۋەرکۆتوو مېیامینینە سەردەسەیی هەرچی خراپەکاری و دژمنایەتیکەردەی هەن جە دژو گەلی و ژەنا مکەرۆش، کەچی جە وتارەکاشەنە باسو دادپەروەری و مافو مرۆڤی و... مکەرۆ. جە قسەکاشەنە جە نەتەوە یۆگێرتەکانە گەرەکش بۍ واچۆ ۋەنێوە مڎەو بە مرۆڤایەتی! مشۆم ئی ئاژە چنی هۆرسەنگیۆ؟
ئەردۆغان دیماگۆجێ (هۆرخەڵەتنەر)ۍ تەماما. جە تاریخەنە هیچ سیاسەتمەدارێوە نییا ئڼەو ئەردۆغانی حەقەتینەکا شێونۆ. متاومۍ واچمۍ چی دەورەنە فرە چنەزانا و جە گرڎ کەسۍ عالتەرا. بە پوختیەکەش ئۆساو هۆرخەڵەتناین.
مانگێ چێوەڵی جە کەردەیۆ ساڵەی تازۍ دادوەرینە پێوەس بە دادوەری قسێشکەردۍ. باسش جە گرنگی دادپەروەری کەرد. گرڎو قسۍ و هۆرسەنگنایە عالەکا یۆ بە یۆ ڕیزۍ کەرۍ. بەڵام جە تەمامو دەسەڵاتدارییەکەیشەنە و بەتایبەت چی ١٠ ساڵەو دماینە گرڎ چێوێش پێچەوانە بە قسەکاو ۋێش کەردەن. تەنیا یەک چێوی ڕاسش وات ئاڎیچ بنیاڎنیای و وەشکەردەی بناغەو دادوەری بۍ. ۋێش دەوڵەت پەی ئانەی گلېرگەی تەرسنۆ بناغەی دادوەری گۆرە وەشمکەرۆ. پېسە سیاسەتێوە ڕاوەبەر مکریۆ چڼین تاوانبارکەردەیۍ وەش مکەرا یان بە شێوێوە ئاسان مرۆڤەکا تاوانبار مکەرا. هەر پۊکەی بناغەو دادوەری گەورەی بنیاڎ منیا. هەروێش جە سەردەمو ئاکەپەینە زینانی فرە گەورە وەشکریا.
چی ١٠ ساڵەو دماینە دلۍ گلێرگەی و تاریخو تورکیاینە حەجگیز ئڼەو ئیساتۍ بێباوەڕی وەرا وەر بە دادوەری وەش نەبیەن. دادگاکۍ بە تەمامی ئینۍ چێرو کۆنترۆڵو دەسەڵاتدارینە. بەتایبەت جە مېڎانی سیاسینە نادادیێوە فرە وەش بیەن. هەر ۋێش چڼین جارۍ ئەردۆغان ڕانمایش دان بە دادگاکا. جە ڕاو وەزارەتو دادیوە ڕانماییەکا میاونۆ کە چەنی نزیکۍ تاوانەکا باوە. هەر وێش جە ئەساسەنە گرڎ کەسی بە تیرۆر تاوانبار مکەرا و وزاشا زیڼان. دۆزو سەڵاحەدین دەمیرتاشی و عوسمان کاڤالای بەڵگەن سەرو ئانەی دادگا وزیان خزمەتو سیاسەتی. دادگاو مافەکا مرۆڤو ئەوروپای قەرارۍ مڎۆ. سەرو ئی قەراریە تەیب ئەردۆغان دەسوەردای مکەرۆ و دۆزێوە تازە مکەرۆوە و زیڼانییەکا پېسە بارمتەی بەکار مارۆ. ئینۍ تەنیا نمونێوەنۍ. ئانەی سەرو ئۆپۆزسیۆنی و وەڵۍ گردینە سەرو کوردیرە سەپیۆنە هەر ئینەنە.
بڕۍ ئەرەمەرزیۍ جە سەرانسەرو جەهانینە جە بڕۍ مژارێنە ڕیزبەندی وڵاتا مکەرا. تورکیا جە دادوەرینە ئینا ڕیزی دماینەنە و جە گەندەڵینە ئینا ڕێزی یووەمەنە. هەر وەختۍ ئی ڕیزبەندیۍ مەسڵەحەتشانە نەبۆ ماچا ئینە مەرامێوە سیاسییا و قبوڵش نمەکەرا. بڕۍ وەختێچ جە مەسڵەحەتو ئاڎیشانە قەرار مڎا، ئا کاتە ئاکەپە پېسە ئامرازێوە پروپاگەندەکەردەی بەکارش مارۆ.
یۆ جە تایبەتمەندییە زەریفەکا مرۆڤبیەی بەخشندەییا. بەڵام هیچ تایبەتمەندیێوە پا جۆرە جە کەسایەتی ئەردۆغانینە بیەیش نیا. بە گوێرەو ئەردۆغانی دادوەری تەنیا پەی ئاڎی و هامکارەکاش وەردەسا. پەی کەسی تەری، بەتایبەت پەی ئۆپۆزسیۆنی سیاسی ئی مافە نیا. بە گوێرەو ئەردۆغانی نمەبۆ دادپەروەریش ۋەرا ۋەر جابەجێبکریۆ. مافو ئانەیش دێنۍ پنە کە مامەڵێوە نادادپەروەرانە گێڵنا. جە ئەرەمەرزیا دادوەرییەکانە ژەنێوە چەمبەسیۍ هەنە کە ترازیێش ئینا دەسۆ. ئینەیچ ماناش ئانێنە کاتێ دادپەروەری مسەپیۆ تەماشە نمەکەرۆ کەسەکە کێن. دادگاکۍ ئەردۆغانی وەڵۍ گرڎ چێوێنە تەماشەو ئانەی مکەرا کە کێ ئینا ۋەردەمشانە.
جە ئیساتێنە جە تورکیانە ئا درووشمەی زیاتەر بەرز مکریۆوە، ماف، یاسا و دادپەروەرییا. بیەن بە پەنەوازیۍ سەرەکی تورکیای. ماچا دادپەروەری بناغەو دەوڵەتین، جە ئیساتێنە کە دادپەرەوەری شێویان و جە بەین بریان دەوڵەتیچ رێزانەرە و تێکشیەن.
جەهەمانکاتەنە ئەردۆغان ئینسانۍ بێ ویژدانا. هەرۋێش کاتێ دادپەرەوەی نەبۆ، ویژادنیچ بیەیش نمەبۆ. ئایا جە دنیانە کەسێوەتەر هەن کە جە دژوو هێزێوە یان گلێرگێوە جەنگ بکەرۆ و واچۆ، "زاوڵە بۆ یا ژەنی ئانەی پەنەواز بکەرۆ من مکەروش!" بە ئەمرەو ناتانیاهۆی بە هەزاران ژەنی و زاوڵۍ کوشیۍ، بەڵام بە شێوێوە ڕەها و کراوە نەواتش ژەنی بۆ یان زاوڵە ئانەی پەنەواز بکەرۆ مکەرمێش! ئەردۆغان ماچۆ ناتانیاهۆ بۆمبۋارانو مزگی مکەرۆ؛ بەڵام جە سەردەمو دەسەڵاتداری فاشیستو ئەردۆغانینە بە واتەی 'ئەنداماو پەکەکەی ئینۍ مزگیەکانە، زیاڎ جە ١٠ مزگیاش بۆمبۋارانۍ و تەختۍ کەردێنۍ.
ڕۆبۆسکینە بە بەهانۍ ئانەی پەکەکە ئینا دلێشانە، ئەردۆغان قەرارو کوشتەی جەمۍ ئینساناش دا کە فرەیشا زاوڵۍ بێنۍ. کە جە حەقەتینەنە دلۍ ئا کەسانە یەک جەنگاوەر و ئەندامو پەکەکەی بیەیش نەبۍ. چێرو نامۍ ئانەینە کە فەرماندێوە پەکەکەیشا ئینا دلێنە، ٣٤ کەسۍ کوشیۍ کە فرەیشا زاوڵۍ بێنۍ. جە ئیساتێچەنە ئیسرائیل ماچۆ ئەنداماو حەماس یا حیزبوڵای ئینۍ دلێشانە بۆمبۋارانو سەرو ژەنا و زاوڵا مکەرۆ و کوشۆشا.
تەنانەت یەک کەس جە بکوژەکا تورکیانە دادگایی نەکریێنۍ. بە بەهانۍ ئانەی کە ئا پۆلیس و سەروازۍ جە دژو تیرۆری جەنگ مکەرا، سزا نمەڎریا. جە کاتو دەسەڵاتداری ئاکەپەینە هەزاران ڕووەدایۍ پی جۆرەیە هەنۍ. چونکی، تەیب ئەردۆغان بە شێوێوە شەخسی ئەمرەو کۆمکوژیش دا دەسو سەرواز و پۆلیسەکاوە. ئەمرەش پنە کەردۍ کە بە زینڼەیی سۆچندێشا.
دۆڵەتو تورکی جە ئەرەگیرکەردەی عەفرین، سەریکانێ و گرێ سپینە بە هەزاران مەدەنیۍ، ژەنی و زاوڵێش گەشمەرڎۍ کەردۍ. ئەردۆغان ئەمرەش پینەی کەردە. چن ڕوۍ چێوەڵی منبجەنە دووۍ برۍ کە هەردوویشا زاوڵۍ بێنۍ کوشیۍ. هەرپاسە هەر چا بنەیانەنە زاوڵۍ و ئەندامای تەرێش زامڎارۍ بیۍ. جە ۋەرنیشتوو کورڎەسانینە چڼین ڕووەدایۍ پی جۆرە هەنۍ. هەرپاسە جە بۆمبۋارانکەردەی هەرێمەکاو پارېزنای مەدیاینە بە دەیان زاوڵۍ و بە سەڎان ژەنۍ و مەدەنیۍ کوشیێنۍ. ئینۍ گرڎ چێرو دەسڵاتوو ئەردۆغانینە ئەنجام دریێنۍ و مڎریا. فرە زیاتەر چانەی کە ئیسرائیل مکەرۆش، بۆردوومانو گەریلای مکریۆ. درۆنی تورکی جە گرڎ شۆنێنە ئینسان کوشۆ. بە بێ ئانەی جیاوازی بکەرۆ جە بەینو گەریلای و مەدەنینە، مرۆڤەکا کوشۆ.
جە ڕاو چەتەکاشۆ عەفرینەنە هەمان چێو مکەرۆ. جە دماو ئەرەگیریەکا تورکیایۆ بە سەڎان هەزار کەسۍ جە عەفرین، سەریکانێ و گرێ سپینە ناچار بە ئاوارە بیەی کریۍ و چێرو خێمەکانە جە ئاژەی فرە نا لەبارەنە هەوڵو ژیۋایکەردەی مڎا.
دەسەڵاتداری ئەردۆغانی هامکات دەسەڵاتداری دووژمنایەتین ۋەرا ۋەر بە ژەنا. سەرەڕاو ئی کارایچشە ۋێش پېسە ۋەرگریکارۍ ژەنا نیشانە مڎۆ. جە تورکیاو سەردەمو دەسەڵاتداری ئاکەپەینە تاوانە و دژمنایەتیکەردەی ژەنا ئینا بەرزتەرین ئاستو ۋێشەنە. تەمامو جمیەرەکا ژەنا دژو سیاسەتی پڵۆسنەرانەو دەسەڵاتداری ئاکەپەی ئینۍ ئەرەکۆشاینە.
چونکی یاۋێنێنە چانەی کە دەسەڵاتداری ئاکەپەی هۆرگیرو عەقڵیەتی پیاسالارانەی دژ بە ژەنێن. ژەنی پېسە نوێنەرۍ پیاسالاری تەماشەو ئەردۆغانی مکەرا و ئاڎیچ جە ۋەرا ۋەرەنە هەوڵمڎۆ ۋێش پېسە فیمینستی نیشانە بڎۆ. ئاستو دیماگۆجی ئەردۆغانی چی ڕێبازەنە موینیۆ.
سەردەمو دەسەڵاتداری ئاکەپەینە بێ حەد چڼین تاوانۍ ئەنجام دریێنۍ. کەچی باسو دادپەروەری و مافەکا مرۆڤی مکەرۆ! ٢٥ ملیۆن کوردۍ جە تورکیانە هەنۍ، کەچی دڎان بە زۋان، کولتوور و ئشناسنامەیشارە نمەنریۆ. بە هێز و ستەمکەردەی ۋنەشا هەوڵمڎا کوردا جە کولتوورو ۋێشا بڕارە و بکەراشا بە تورکۍ. ئی ستەمە بێوژیدانییا، بێ ئەخلاقییا و نادادیین کە دژو کوردا بە سیاسەتو قڕکەردەی ڕاوەبەرش مکەرۆ، گەلوو فەلەستینی پارێزنۆ! گەرەکشا ۋەرنیشت و سەرنیشت و ۋەرکۆتوو سوریای بە تەمامی ئەرەگیر بکەرۆ و کوردا سەرو خاکو ۋێشاوە ئاوارۍ بکەرا و فاڕیای دیمۆگرافی و قڕکەردەی ئەنجام بڎۆ. کەچی جە نەتەوە یۆگێرتەکانە ۋەنەو مرڤایەتی واچۆوە! ئەردۆغان ئانڼە زاڵمێوە بێشەرما، بێویژدان و بێ ئەخلاقا. گۆبەلزی وەزیرو پروپاگەندەو هیتللەری ڕەمزو گرڎ جۆرە فاشێزمێوە بۍ، جە ئیساتێچەنە ئەردۆغان هەمان کار مکەرۆ. بەڕاسی جە دووە ڕوی و بێشەرمینە فرە کارزان و سەرکۆتەن. گەر خەڵات پەی ئینەی بۆنە، ئانە لایەق بە ئەردۆغانین!
