قەسەدە بە کوشتەی چەتێوە ڕاش جە پیلانێوە داعشی گێرت
قەسەدە ڕاش جە هەوڵێوە تیرۆریستی چەتەکا داعشی گێرت جە دەشتایەکا دێرەزۆرینە، جە هەجینەنە بە ئۆپەراسیۆنێوە چەتێوەشا کوشتو دەس سەرو تەقەمەنییەکایچەرە گیریا کە پەی هەرمانەی تیرۆرستیۍ ئاماڎۍ کریێبێنۍ.
مېیانو ئەرەیاۋنای هێزەکاو سووریای دیموکراتیکی (قەسەدە) بە ئەرەیاۋنێوە ئاماژەش پانەیە کەرڎ کە هێزەکېشا هەوڵێوە چەتێوە داعشیشا پوچ کەرڎەنۆ پەی چەقنای مینی سەرو ڕاو شارو هەجینی جە ۋەرکۊتوو دێرەزۆری.
جە ئەرەیاۋناکەینە ئاشکرا کریان، هێزەکۍ قەسەدەی جە وەختو ئەرکی ئەمنینە درکشا بە جموجۆڵی گوماناوی دووۍ چەتا کەرڎەن، پۊکەی ڕاسەوخۆ دەورییەکە چەتەکېش تەوقە دێنۍ، بەڵام چەتێوەشا بە تەقەکەردەی جوابو هێزەکاش دانۆ، دەرەنجام بە جوابدایۆ هێزەکاو قەسەدەی چەتەکە کوشیا.
هەر جە ئەرەیاۋناکەینە دەسنیشان کریان دماو کوشتەیش دەسگیریان سەرو گرڎو ئا تەقەمەنیارە کە چەتەکە هەوڵو چەقنایش دێبێنۍ، بەڵام چەتەی دووەمشا بڕەمان و ۋێش شارتەنۆ دلۍ خەڵکی مەدەنینە.
هەر سەبارەت بە هرووژم و هەرمانە تیرۆرستییەکا چەتەکا داعشی، قەسەدە ئاماژەش بە چالاکیێوە تەرو هێزەکاشا کەردەن و ماچۆ: "جە ناوچەو سۆسەو ۋەرکۊتوو دێرەزۆری هیزەکېما چنی شانێوە چەتەکا داعشی گنا جەنگۆ، دماو جوابدایۊیشا چەتەکۍ جە هەرێمەکەنە بڕەمۍ."
