حسێن حاجی، سەردارو پارتو ئازاڎیی و دیموکراسی ئێزدییەکا(پادێ) سەبارەت بە وستەیرەو ٣پارتا و لایەنۍ سیاسیۍ عێراقی چنی ئاژانسوو هەواڵوو فوراتی قسېش کەردۍ.

جە سەرەتاو قسەکاشەنە، حسێن حاجی ئاماژەش پانەیە کەرد کە دماو سەرداکەو ئەردۆغانی، پەی بەغڎای و ئەرەیاۋناو ڕێککۆتەیە ٢٧ خاڵییەکەیشا، قەرارو وستەیرەو پارتەکەیشا و ٢ پارتا تەرو عێراقی دریا و ئەرەیاۋناش، فشارو هرووژم و سەرو پادێ سیاسییا.

حسێن حاجی ئاماژەس پانەیچ کەرد، ڕژێمو ئاکەپە-مەهەپەی و حکومەتو مېیانی عێراقی سەرو ئاسایش، سیاسەت و بازرگانی ڕێکێکۊتێنۍ و ئەرەیاۋناش: "بەپەیلواو من وستەیرەو ئا پارتە سیاسییا جە سەرداکەو ئەردۆغانی جیا نییا، بەتایبەتی دەسکۊتەکا شەنگالی کە جە ماوەو ١٠ ساڵانە بەرهەم ئامێنۍ، چ جە ڕوو سەروازیی و چ جە ڕوو کۆمەڵایەتییوە بە تەرسێوە مویناش. ئی گلېرگە ماوەو ١٠ ساڵان داواو مافی ڕەواو ۋێش مکەرۆ. جە بواری دیپلۆماسی، هۊرچنیەکا و پەیوەندییەکانە وەڵێکۊتەی بەدی ئاما، ئاڎۍ کە دیشا کە پادێ بەرەو وەڵۍ ملۆ، هەوڵشا دا ڕاش ۋنە بگێرا.

'پارتوو ئێمە پارتوو گەشمەرڎان'

حسێن حاجی ئاماژەش پانەیە دا کە مەرامېوە سیاسی ئینا پەشتەو قەرارەکەو دژ بە پادێوە و ئەرەیاۋناش، "ئی پارتە بە ڕەنجو گەشمەرڎا، بە ڕەنجو سەعید حەسەنی ئەرەمەرزیان. وەڵێکۊتەن و جە پڕێنە  نەیاوان بە ئارۆی. قەرارو وستەیرەو هەر ٣ پارتەکەی سەرو ئی بنەمایە بۍ، پەرلەمانو عێراقی پلانێوەش نیێبێرە کە چنەوییەرڎەی پەی چەتەکاو داعشی بەربکەرۆ، هەرچڼە دەسشا جە ۋنەو عێراقیەکانە و بەتایبەت گەلوو ئێزیدینە هەن، با جارێ جە ۋێشا پەرسا ئایا متاوا زاموو ئێزدییەکا دەرمان بکەرا یان نا؟ گلېرگێوە کە هەڵای مافو ژیۋایش سەرو ئی خاکیۆ پنە نەڎریان، ئیساتێچ کریان بە مەرامو فشارە سیاسیەکا."

'ئێمە مافو تانەدایما هەن'

حسێن حاجی واتش: "کاتێ دادگاو عێراقی قەرارو وستەیشەرە دا، مافو تانەدایچش دان، ئێمەیچ کۊشش مکەرمۍ تانە جە قەرارەکەی بڎەیمۍ و ناڕەزایی گلېرگەکەیما ئەرەیاۋنمۍ، ئێمەیچ پەیامو گلېرگەکەیما مېیاونمۍ بە دەوڵەتو عێراقی". با مەڵامەتۍ نیشانە بڎا کە ئایا پادێ چ کارێوە نایاساییش کەرڎەن؟ کەواتە چنی پادێ مەترسیش سەرو ئاسایشوو عێراقی هەن.

'عێراق وستەیرەو پادێ پېسە سەرکۆتەیۍ مووینۆ'

سەردارو پادێ هەرپاسە سەبارەت بە پەرسوو پەیوەندییشا چنی پەکەکەی واتش: "چی وەڵۍ وستەیرەو پادێنە شۊنیرەلوایێشا نەکەرد، یان ئاگاڎارێشا نەکەردیمێوە؟ چ عیلاقێوەما بە پەکەکەیۆ هەن؟ پەکەکە ئاما و ئەرکی ئینسانی ۋێش پەی شەنگالی جابەجێ کەرد و بەئاماڎە بیەی دەوڵەتو عێراقی جە ٢٠١٨ ەنە جە شەنگالەنە لووا جبەر. پەکەکە جە ئاستو گەلانە و مېیاننەتەوەیینە ئەرەکۊشای ۋێش ڕاوەبەر مکەرۆ. جە حەقەتینەنە ئانۍ چا ڕوۆ تۆمەتبارێما مکەرا، پەنەوازا ئانە بزانیۆ کە بە شێوێوە سیاسی ئێمەشا کەرد ئامانج. پی جۆرە گەرەکشابۍ کە کاتۍ گەل مگېڵۆوە پەی شەنگالی ئاژاوەگێڵنی وەش بکەرا، پەی ئانەی سەرنجشا سەرو ڕۆژەڤی سەرەکی ۋێشا نەبۆ کە خیانەتشا جە گەلەکەیما کەرد. ئێمە بەپاو ئا یاسایا داواو مافەکاما مکەرمۍ. مشۆم ئی حەقەتینا بوینمۍ، ئارۆ ١٠ ساڵۍ سەرو فەرمانەکێرە ۋییەرڎەن، کۆمکوژی دژوو ئێزیدییەکا هەڵای بەردەواما، گەلەکەما هەڵای ئاوارەن، گەلەکەمان تا ئارۊیچ داواو دادپەروەری و مافو ئێزیدییەکا مکەرۆ بەڵام هەڵای هیچ بەدی نامان. ئا سیاسەتۍ ئارۆ دژوو شەنگالی و ئێزیدییەکا مکریا، ۋەرپرسیاریشا ئینا ئەستۆو ئەمریکای و عێراقینە. پەنەوازا دەسبەردارۍ پلانە سیاسییەکاشا با.

جە دمادمایی قسەکاشەنە حسێن حاجی، واتش: "وستەیرەو ئی یەرە پارتەیە نیا مەسڵەحەتوو عێراقینە، ئی قەرارۍ ئینۍ مەسڵەحەتوو دەوڵەتو تورکیاینە، ئاڎۍ گەرەکشانە هەرمانەکاشا جە عێراقەنە یاساییۍ بکەراوە هەرپێسە دیارا بە شێوێوە یاسایی دەسش بە ئەرەگیری و جەنگی سیاسی کەردەن جە عێراقەنە، پەنەوازا دەوڵەتو عێراقی بزانۆ پی سیاسەتاشە خزمەت بە دژمنی مکەرۆ، پی جۆرە عێراق بەرەو ڕۆژەڤێوە تاریکی ملۆ."