ڕێکوستەی، پارت، ئەرەمەرزیاکۍ بە ئەرەیاۋنێوە ڕۆو جەهانی کۆبانێشا پیرۆز کەرد.

فەرماندەیی گرڎی یەکینەکاو پارێزنای گەلی (یەپەگە) بۆنەو ١و تشرینو دووەمی ڕۆو جەهانی کۆبانێوە ئەرەیاۋنێوەش وەڵا کەرڎۆ و سەرەڕاو یاڎکەردەیۆ ئا ڕوەیە و جەختش سەرو پارێزنای بەهاکاو مڎرامانو کۆبانێ کەردۆ و ئامان: "مڎرامانوو کۆبانێ جە جەنگو دژ بە داعشینە ماناڎارتەر بۍ؛ هێمێوە قوڵو ئەرەکۊشای مرۆڤایەتی بێ جە ۋەرا ۋەرو تاریکینە. یاگۍ بێ هیوایینە، هیواش هۆرچنی و بەها بنەڕەتییەکۍ ئازادی، یەکسانی و ژیۋای هامبەشیش پارێزنا." ئاماژە پانەیچ کریان کە تا دما نەفەس جە دژو ئامانجو ئەرەگیرا کە جە بەین بەردەی ئیدارەو ۋێڕاوەبەری دیموکراتیکیا درێژە بە ئەرەکۆشایما مڎەیمۍ.

جە بەردەوامی ئەرەیاۋناکەینە ئاماژە بە مەترسی ئەوەمەننەکا داعشی مکەرۆ و ئامان: "هەرچڼە داعش مەڕیان، بەڵام جە ڕوو ئایدۆلۆژییوە هەڵای مەترسیێوە فرەش هەن. هێزە هەرێمییەکۍ پېسە دۆڵەتو تورکی ئەرەگیری، بەشێوێوە پەنهان پەشتگیری داعشی و گرووپە تنڕەوەکا مکەرا، بە ئامانجو جە بەینبەردەی شۆڕشی و مۆدێلو ۋێڕاوەبەری دیموکراتیکی."

هەر جە ئەرەیاۋناکەینە قەولو بەردەوامیدای بە ئەرەکۆشای دریان و ئامان: "ڕۆو جەهانی کۆبانێ جە گەلەکەیما، گرڎو گەلا ناوچەکەی و گەلا ئازادیوازی پیرۆز مکەرمۍ."

دەم پارتی: ڕۆشنایی مڎرامانوو کۆبانێ حەجگیز نمەکوشیۆوە

دەسەو ڕاوەبەری مېیانو دەم پارتی بە نامونیشانو "هەڵای مڎرامانو کۆبانێ سەرچەمەو هیواو ئەرەکۆشای گەلان" ئەرەیاۋنێوە نویسیاش وەڵاکەردۆ و چنەشەنە ڕۆو جەهانی کۆبانێ مبارەک کریان و ئاماژە پانەی دریان کە مڎرامانوو کۆبانێ پېسە ئەرەکۆشای مرۆڤایەتی جە دژو ستەمی و تاریکی جە تاریخەنە نویسیانۆ.

دەم پارتی ئاماژەش پانەیچدان کە بەها و دەسکۆتەکا داستانو کۆبانێ هەڵای ئینۍ چێرو هەڕەشانە، وە هرووژمەکۍ دۆڵەتو تورکی شەرمەزارۍ کریێنۍ. جە بەردەوامینە ئامان کە ئا ڕۆشناییەی بە مڎرامانو کۆبانێ خوڵقیان حەجگیز نمەکوشیۆوە.

مەسەدە: کۆبانێ نموونەو یۆبیەی و هامکاری کۆمەڵایەتییا

ئەنجوومەنو سوریای دیموکراتیکی جە ڕۆو پەشتیوانی جە مڎرامانوو کۆبانێنە ئەرەیاۋنێوەش وەڵا کەرڎۆ.

جە بەیاننامەکەنە باس چانەی کریان کە مڎرامانو کۆبانێ بیەن بە نموونێوە جەهانیی ئەرەکۆشای دژو هێزە تاریک پەرەسەکا، هەرپاسە بیەن بە هێماو ئیراڎەو مرۆڤایەتی جە دژو زۆرداری و تیرۆری.

هەرپاسە مەسەدە جە بەیاننامەکەشەنە ئەرەیاۋنانش؛ پەشتیوانی جەهانی پەی مڎرامانوو کۆبانێ نیشانۍ چارەنوویسو مرۆڤایەتییا جە دژو تنڕەوی و ئامان؛ "ئا ۋنۍ سەرو خاکو کۆبانێنە مجیا، قارەمانە جوانا و ژەنا گرڎو پێکئامایەکا سوریای، یۆبیەی گەلەکەیماش بەرهەم ئارڎ و نیشانەشدا کە گلێرگەو سوریای یۆگێرتەن و قەڵغانێوە قەوەتا جە ۋەرا ۋەرو هەوڵە ئەرەگیری و پارچە پارچە کەردەیەکا وڵاتەکەیمانە."

جە بەیاننامەکەنە ئاماژە پەی ئانەیچ کریان کە هەرێمەکۍ سەرنیشتوو ۋەرکۆتوو سوریای جە لایەنو دۆڵەتو ئەرەگیرو تورکیوە هرووژم مکریۆ سەرش و ئەرەیاۋېیان ئی هرووژمۍ پەی شکسپنەئاردەی پرۆژەو ئیدارەو ۋێڕاوەبەری ئەنجام مڎریا، ئی هرووژمە دژو سەقامگیری و ئارامی گرڎو ناوچەکەی و ئاینڎەو دیموکراسی و دادپەروەری هەرێمەکەی وزۆ مەترسیۆ."

مەسەدە ۋەرا ۋەر بە پاشێلکارییەکا دۆڵەتو تورکی بانگەوازش ئاراسەو گلێرگەی مېیاننەتەوەیی کەرڎ و داواو کاروەدای جددییش کەرد دژ بە هرووژمەکا دۆڵەتو تورکی.

جە دما دمایی بەیاننامەکەینە ئامان کە مەسەدە بەردەوام بۆ جە پەرەپنەدای ئەزموونو ۋێڕاوەبەری پەی پارێزنای مافو گرڎو قەوم و نەتەوەکا تەری، هەرپاسە ئەزموونو کۆبانێ مکەرۆ بە نموونە پەی یۆبیەی و هامکاری کۆمەڵایەتی.