فەرماندەیی هەپەژەی بۆنەو ساڵیاڎو شۆڕشو 'ژەنی، ژیۋای، ئازاڎیی'ۆ ئەرەیاۋنێوەش وەڵا کەرڎۆ و ئەرەیاۋناش، "خاوەنداری جە مەرام و ئاواتەکا گەشمەرڎا ئا قۆناغیە ئەرکێوە سەرەکیا. سەرو ئا بنەمایۍ مشۆم گرڎو ژەنا خاوەن هەڵوێسێوە ۋەرگیریکەرانەی هێقمی و یۆگێرتەی با.
فەرماندەیی هێزەکاو پارێزنای ژەنا ۋەرکۆتوو کورڎەسانی (هەپەژە) سەبارەت بە دووەم ساڵیاڎو شۆڕشو ژەنۍ، ژیۋای، ئازاڎیی ئەرەیاۋنێوەش وەڵا کەرڎۆ و ئەرەیاۋناش، شۆڕشو ژەنی، ژیۋای، ئازاڎیی پێودانگ و پیمەرو سەڎەو ژەنان.
ئەرەیاۋناکەو فەرماندەیی هەپەژەی پی جۆرەنە:
"جە تاریخو دەسەڵاتدارینە سیستەمو پیاسالاری بە گرڎو هێز و قەوەتیشۆ گرڎ کاتۍ گەرەکش بیەن راسی ژەنۍ کە جە گرڎ ڕوێوە سەرچەمەو ژیۋاین و حەقیقەتو مرۆڤایەتی بەزیڼەیی ڕا گێرۆ، دلێنە بەرۆ و ژەنا بکەرۆ بە کۆیلەو ژیۋای. هەرچڼە ئا سیستمە تنوتیژە پەی جابەجێکەرڎەی ئا مەرامیشە دەسش پەی گرڎ رێبازێوە دڕندانەی بەردەن؛ ڕووبەڕو کۆمکوژی، ئەشکەنجەی و دەسدرێژی و گرڎ کردەوێوە نامرۆڤانەی کریێنێوە، بەڵام ژەنی حەجگیز بە گرڎیی ۋێشا نەڎا دەسۆ، سەرەشا شۆڕ نەکەرد. جە گرڎو قۆناغەکا تاریخو دەسەڵاتدارینە ژەنی کە جە ۋەرا ۋەرو ئا سیستمە پیاسالارەینە ۋێڕاگریشا کەرد و ئەرەکۊشایشا کەرد بە بیەی و مەنەیۆیشا. واتە ئا سیستمە چڼە گەرەکش بیەبۆ دلێشانە بەرۆ، نەتاواش ریشە و جەوهەرو ژەنا کە ژیۋای بنیاڎ منیا و هیواو ئازاڎیی گەش مکەرۆوە بە گرڎیی دلێنەبەرۆ. هەرپۆکەی ماچمۍ تاریخو ئازادی ژەنۍ خاوەن ڕێخێوە قەڎیمین و جە گرڎو قۆناغەکاشەنە راسی فرە دۆڵەمەڼۍ شاریێنۍ. رابەر ئاپۆ بە هزر و فەلسەفەی بێهامتاو ۋێش بەرەو تاریخی، گلێرگەی و بەتایبەتی ژەنا روانگێوە پا جۆرەشە سازکەرد کە بە رۆشنبیەیۆ تاریخو ژەنۍ کە جە تاریکینە مەنەبێوە، گلێرگە ڕۆ دماو ڕۆی جە راسی ۋێشۆ نزیک مبۆوە و حەقیقەتو ژیۋای جارێوەتەر باڵادەسی ۋێش بەدەس مارۆوە. رابەر ئاپۆ ئا رەوت و جوڵەشە پېسە ژەنی، ژیۋای، ئازاڎیی ئامێتەو ژیڤای کەرڎ. ئانە، فەلسەفەو ژیۋای ئازاڎیی تازەین. هەرپۊکەی کاتێ دوۍ ساڵۍ چێوەڵی کناچە کوردە ژینا ئەمینیە بە دەسو رژێمو ئەرەگیر و قڕکەرو ئێرانی تیرۆرەکریا؛ بە سەرمەشقایەتی ژەنا جە ۋەرکۆتوو کورڎەسانی و ئێرانینە گلێرگە دەسش بە ئەرەپڕای کەرڎ و بە دروشمەو ژەنی، ژیۋای، ئازاڎیی جە ۋەرا ۋەرو رژێمو قڕکەرو ئێرانی و کۆو سیستەمو پیاسالارینە مرداوە و ۋنەپەرسایۆش چنی کەرڎ. ئا سەرهۊردایەی کە ۋەرکۆتوو کورڎەسانی و ئێرانینە وەڵۍ وزیۍ ڕۆ دماو ڕۆی گەشتەرۍ بیۍ، زیاتەر بە رێکوستەی بیۍ و سەرانسەرو جەهانینە وەڵۍ بیێوە. چنی وەڵێکۊتەی قۆناغەکۍ ئیتر پاسش پنەئاما کە تەمامو جەهانی بە سەرمەشقی ژەنا بە فەلسەفەو ژەنی، ژیۋای، ئازاڎیی جە دژوو سیستەمو پیاسالاری دینامیزمێوە چالاکش سازکەرد و جە تاریخەنە پەی ئەوەڵجاری فەلسەفێوە سنوورو نەتەوە، ئایین، باوەڕی، کولتوری و هتد..یش بڕی و تەمامو مرۆڤایەتیش گێرتۆ.
جە ۋەرا ۋەرو ئا ئاژەینە هەم تەختو رژێمی ئەرەگیرو ئێرانی و هەم تەختو سیستەمو مۆدێرنیتەی سەرمایەداری پیاسالاریش چڵاکنارە و ترەکە و کەلێنی گۆرۍ کۆتە دلۍ سیستمەکەیشاوە کە گرڎو ئا حەقەتینۍ گەرەکشا بۍ شاراشاوە چا ترەکاوە جە جە مېڎانەکانە و رەنگە یوەم جار بیەبۆ کە مرۆڤایەتی چا ئاستەنە بەشێوۍ رێکوزیا تەماشەو پەرسو تاریخی و راسی ئا سیستمە ستەمکارەیە کەرۍ. مرۆڤایەتی جاڕێوەتەر یاوانە کە جە ۋەرا ۋەرو هەر هێزێوە هەژمونگەراینە، جە حەقەتینیچەنە جە ۋەرا ۋەرو کۆو سیستەمو مۆدێرنیتەی سەرمایەدارینە تەنیا ڕاو ئەڵترناتیڤی و یاگەگیرە پارادایمو رابەر ئاپۆین و ئاڎیچ سەرو بنەماو ئازادی ژەنۍ وەڵۍ گنۆ. پۊکەی سەدەو ٢١ ی سەدەو ژەنان و شۆڕشو ژەنی، ژیۋای، ئازاڎیی جە تاریخو ئازاڎیی ژەنانە بی بە یۆ جە قۆناغە سەرەکیەکا کە ڕاپیمای ئازاڎیش یاۋنا قۆناغێوە تازۍ. شۆڕشو ژەنی، ژیۋای، ئازاڎیی بە مانا و راسی فرە قۆڵ بارگاوی کریان. ئی شۆڕشە داینامیکیە تا سەر ستراتیجین و هەر هەنگامێوەیچ پەی وەڵۍ منیۆ جە گرڎ ڕوێوە ئایدۆلۆژیکا. ئێمە متاومۍ واچمۍ کە ژەناو کوردی سەرمەشقیشا پەی گرڎو ژەنا کەرڎ، راسی دڕندەیی سیستەمو پیاسالاریشا وست وەروچەما و جە ۋەرا ۋەرو ئی سیستمەینە چالاکی جیاجیاشا کەرڎ و بە بەردەوامیچ ئەنجامش مڎا. چا چالاکییانە هەڵوێسی رێکوزیا وەڵۍ کۆت، داواکاری ئایدۆلۆژیک کە وزیۍ ڕووە و ئاستو ۋەگیریی و پارێزنای کە ئاما ئاراوە جارێوەتەر پنەش نیشانەدایمۍ کە شۆڕشو ژەنی، ژیۋای، ئازاڎیی شۆڕشێوە فرەڕەهەندا و جە هەر چوارلاوە تەنگش بە دژمنی هۆرچنیەن. کە ئی شۆڕشەیە بە گۆرەتەرین مەتەرسی پەی سەرو ۋێش منیۆرە بە بێ ئەخلاقانەتەرین شێوە پەلامارەو ژەنا و گلێرگەی مڎۆ. پۊکەی پەنەوازا بێ مردای داواو ۋێش پەی ئازاڎی و دیموکراسی بکەرۆ بە هاوار، جە گرڎو مېڎانەکانە و کایەکا ژیۋاینە زیاتەر ۋێش رێکوزۆ و بەردەوام ئەرەکۊشای قەوەت بکەرۆ.
جە دما دماینە ئێمە پېسە هەپەژەی ماچمۍ، کە پەنەوازا گرڎو ژەنا خاوەنداری چا دەسکەوتا بکەرا کە رابەر ئاپۆ پی شۆڕشو ژەنا بنیاڎش نیێنۍ. بە رۆحێوە یۆگێرتۆ، بە شێوەو رێکوزیای قەوەتی، بە وەشەسیایی گۆرۆ خاوەنداری چا سەردەما شۆڕشی مکەرمۍ تا بەدەسئارڎەی سەرکۊتەی. کاتو ئانەینە کە پارێزگاری جە کەرامەت، وڵاتی و شۆڕشەکەیما بکەرمۍ. ئینە ئەرک و ۋەرپرسیاری هەر یۆ جە ئێمەن، پۊکەی پەنەوازا گرڎما خاوەنداری جە ئەرک و وەرپرسیاری سەردەمی بکەرمۍ. جە هێڵۊو فەرماندە ئاریەن ئاریاینە خاوەنداری کەردەی جە بەهاکاو شۆڕشی و گەشمەرڎا ئی دۆزەیە مۊچیاری ئی حەقەتینەینە، پەی ئانەیچ خاوەنداری جە ئامانجی و وەرمەکا گەشمەرڎا ئی قۆناغەیە ئەرکێوە سەرەکیا. سەرو ئا بنەمایۍ مشۆم گرڎو ژەنا جە مێڎانەکەنە خاوەن ۋەرگریێوە قەوەتی با و تا سەر یۆگێرتۍ با ".
