جە شارو سلێمانی کەمپەینو کۊکەرڎەیۊ ھامکاری پۍ ۋەنەقۊمېایا بومەلەرزە بەقوەتەکەو سەرنېشتو ۋەرنېشتو کورڎسانی ئەرەیاۋنریا و قائېمقامېەتو شارەکەی داواش جە دۊڵەمەن و خەم ۋەرو خێرۊمەنڎا کەرڎ بە ھامکاریەکاشا خەمۍ جە زەرەرمەنڎاو ئا دوۋە بەشەو کورڎسانی کەم بکەراۋە.
قائېمقامیەتو سلێمانی ۋەڵاوش کەرڎۊ، بەمەبەس و ھامکاری کەرڎەو ئا خێزانا کە بە مەڵامەتو بومەلەرزەکاو سەرنېشتو ۋەرنېشتو کورڎسانی و شارەکاو ئێرانی کە زەرەرشا ۋنە کۊتەن پەنەوازشان بە ھامکارین، ئارۊ جە شارو سلێمانی کەمپەینو کۊکەرڎەیۊ ھامکاری پۍ ۋنە قۊمېایا ئا مەنتېقا دەسش پنەکەرڎ.
چا بارۊ، ئاوات محەمەڎ قائېمقامو سلێمانی جە سەرەتاو کەمپەینەکەینە کە جە بېناو مۊزەخانەو نېشتېمانی ئەمنە سورەکەیەنە ملۊ ڕاوە، ئاماژەش پا زەرەرە گېانی و ماڎیا کەرڎ، کە بە مەڵامەتو ئا زنجېرە بومەلەرزاوە کە جە چن مەنتېقێۋە ئێرانی و سوریای و ترکېەی کۊتێنۍ و ئەرەیاۋناش" سلێمانی دەسش ۋەڵۍ وستەن و ھامخەمو ۋنەقۊمېایان ۋێما بە کەسوکارشا مزانمۍ".
ئاوات محەمەڎ ۋاتش؛ داوا جە ھاموڵاتېا کەرمۍ بەتایبەت دۊڵەمەنڎەکۍ بەشڎارۍ با چی کەمپەینەنە ۋەرو ئانەی بتاومۍ کوچۍ جە خەمو ئا کەسوکاراما کەم کەرمێۋە و یاگۍ ۋەشحاڵی-چا کە جە لایەنو بەشێۋە فرە جە دۊڵەمەنڎەکاماو ھامۋڵاتیاوە پەشتگېری ۋێشا پۍ کەمپەینەکەی بەربڕیەن.
سەعاڎ ٤ سەرسەعبو ڕۊو دووەشەمەی بومەلەرزێوە بە قوەتو ٨.٧ پلا بە پێۋەرو ڕێختەری چن مەنتېقێۋە سەرنېشتو کورڎسانی و ۋەرنېشتو کورڎسانی و تورکېاو سوریایش گێرتۊ، دماتەر چنڎین بومەلەرزۍ تەرێچ دوبارە ئا مەنتێقێشە گێرتۍ، بەپاو ئامارەکا تا ئېسە ٣ھەزارۍ و ٣٨١ کەسۍ فەوتشا کەرڎەن و زیاڎ جە ٢٠ھەزارۍ و ٤٢٦ کەسۍ زامڎارۍ بېێنۍ.
ھ.ش
