هامسەرۆکە و گرڏی دەم پارتی تولای حاتەم ئۆغوللاریە جە سیازەدەهەمین فێستیڤاڵو عەلەوییەکانە جە بەریتانیانە قسێش کەردێ و واتش: " بەبێ عەلەوییەکا ئاشتی و دیموکراسی جە تورکیانە مەڕەخسیۆنە."
فێستیڤاڵو عەلەوییەکا بەریتانیای یۆن جە گۆرەتەرین فێستیڤاڵەکا ئەوروپای کە ساڵانە ئەنجام دریۆنە و ئێساڵ بە درووشمو "بە هیواوە هەنگامە منییەیمێ" پەی سیازدەهەمین جاری ئەنجام دریۆنە. جە فیستیڤاڵەکەنە جۆرەها چالاکی ئەنجام دریا و بە گێڵناو زەماوەنێ دمایش ئاما. یاگێ ئاماژەینە فێستێڤاڵەکەو ئێساڵی کریا بە دیاری قوربانیان کۆمکوژییەکا سەر و عەلەوییەکا سووریای.
جە فێستیڤاڵەکەنە چنین چالاکی چاندو عەلەوی پێشکەش کریا، دماتەر سەر و ئاستو کەسایەتی و پارتەکا پەیام و وتارەکێ پێشکەش کریێ، ئێساڵ فێستیڤاڵەکەنە هامسەرۆکە و گرڏی پارتو یەکسانی و دیموکراسی گەلا (دەم پارتی) تولای حاتەم ئۆغوللاریە بەشداریش کەرد و وتارێوەش پێشکەش بە ئامادەبییەکا فێستیڤاڵەکەی کەرد.
'گرڏ کاتێ ئینایمێ چنی عەلەوییەکا'
تولای حاتەم ئۆغوللاریە بە زوان و کوردی و عەرەبی سڵامش جە ئامادەبییەکا کەرد و واتش: "ئەر جە وڵاتێوەنە تەنیا یەک کەس بڕوای جیاواز جە وڵاتێوە یەکباوەڕیینە بۆنە، ئانە بە دڵنیاییۆ ئەوەکۆشایما پەی ماف و ئازادی ئا یەک باوەڕەییە بۆنە، دەم پارتی گرڏ کاتێ چنی عەلەوییەکا بییەن و بە دڵنیاییۆ ئەپاسەیش مەنۆوە. پۆکەی چێوە واچمێ هیچ کات دەستبەردارو بڕوا و سیاسەتەما بە فرەڕەنگی مەبیمێ. ڕۆشنا گێرتە و نەڤین کامل ئاغائۆغلووی سیاسییا و بە گرڏ شێوێ ئینا جە دژو عەلەوییەکانە."
تولای حاتەم ئۆغوللاریە سەرنجش وست سەرو پرۆسەو ئاشتی و گلێرگە و دیموکراتیکی جە تورکیای و ئاماژەش بە سوربییە و دەم پارتی کەرد جە پەرەدای بە پرۆسەکەی و واتش: "بەبێ عەلەوییەکا ئاشتی مەبۆنە. بە بێ عەلەوییەکا جە تورکیانە دیموکراسی مەبۆنە."
دماتەر پەرلەمانتارو جەهەپەت، ئۆرهان ساریباڵ قسێش کەردێ و ئاماژەش پانەی دا جد جۆروم، مەرەش، گازی... کۆمکووژی و ستەم جە دژو عەلەوییەکا کریان و ئەرەیاوناش چا کۆمکووژییەیی سەر و عەلەوییەکارە سووریانە ئاما، تورکیا و حکومەتو تورکیاچ پشکش هەن.
فێستیڤاڵەکە بە واتەیۆ درووشمەکا ئازادی و فاڕییای و هورپڕاو کلتووری عەلەوییەکا دمایش ئاما.
