ئارۆ ئەنجامی بەرایی هۆرچنیەکا پانیشتوو کورڎەسانی ئەرەیاۋیۆ
قەرارا ئارۆ کۆمسیۆنو باڵاو سەربەخۆو هۆرچنیەکا عێراقی ئەنجامی بەرایی هۆرچنیەکا خولوو ششەمو پەرلەمانو کورڎەسانی ئاشکرا بکەرۆ.
هێزی ٢٠ و ئۆکتۆبەری، دەنگدای گرڎیی هۆرچنیەو خولو ششەمو پەرلەمانو هەرێمو کورڎەسانی لواڕاوە، پېسە کۆمسیۆن ئەرەیاۋنانش، رێژەو بەشداری جە پرۆسەکەنە سەڎەنە ٧٢ بیەن، سەرو ئاستو بازنەکایچ رێژەو بەشداری جە دهۆکەنە سەڎەنە ٧٨، هەولێرەنە سەڎەنە ٧٤، هەڵەبجەنە سەڎەنە ٦٩ و سلێمانیچەنە رێژەکە سەڎەنە ٦٥ بیەن.
کۆمسیۆن ئەرەیاۋنایچش، ئارۆ ئەنجامی بەرایی هۆرچنیەکەی وەڵا مکەراوە.
بەپاو ئەنجامە نا ڕسمیەکا، پەدەکە مقارنە بە خولی وەڵینی ژمارەو کورسیەکاش پەی نزیکەو ٤٠ کورسیا کەمۍ بیێنێوە، کە وەڵتەر ٤٥ کورسیێش بێنۍ، ئینە جگە چانەی ئیتر پېسە خولەکا وەڵتەری ١١ کورسی کۆتاکا نەمەنەن و نمەتاوۆ بەکارشا بارۆ.
هەر بە پاو ئەنجامە نا رسمیەکا یەنەکە مقارنە بە خولی وەڵینی دەنگ و کورسییەکێش زیاڎشا کەرڎەن و نزیکەو ٢٤ کورسیاش مسۆگەرۍ کەردێنۍ. یەنەکە جە سلێمانی و هەڵەبجەنە یەکەما و هۆلێریچەنە ئینا پلەی دووەمەنە.
سەرو ئاستو هەرێمو پانیشتوو کوردەسانی نەوەی نوێ ئینا پلەی یەرەمەنە کە ١٧ کورسیێش مسۆگەرۍ کەردێنۍ و دماو ئاڎیچی یۆگێرتەی ئیسلامییا کە ٧ کورسیێش پەی یەکلایۍ بیێنێوە. جە پلەی پەنجەمیچەنە کۆمەڵی دادگەرییا کە نزیکەو چوار کورسیاش مسۆگەرۍ کەردێنۍ.
لیستو هەڵوێستیچ، کە جە لایەنو عەلی حەمەساڵحیوە سەرپەرشتی مکریۆ جە ما بەینو دووۍ پەی یەرۍ کورسیاش مسۆگەرۍ کەردێنۍ، بەڵام ئەنجامەکەی قبوڵ نمەکەرۆ و باس جە ساختەکاری گەورەی جە هەولێرەنە و هاککەردەی ئامێرە ئەلکترۆنیەکا دەنگدای چا بازنەنە مکەرۆ.
هێزی جە وەختوو لوای ڕاوەو پرۆسەکەینە جە هەولێرەنە چن پاشێلکاری و ساختەکاریێوە پەدەکەی بە بەڵگۆ وزیۍ ڕووە، چانیشا بەکارئاردەی خەڵکانێوە کە جە سەرنیشتوو کورڎەسانیوە ئاوردێبێنێشا بە مەبەسو دەنگدای، هەرپاسە بانگەشە جە بنکەکا دەنگداینە و فشار و هەڕەشا هێزە ئەمنییەکا پەدەکەی پەی سەرو دەنگدەرا و نوێنەرو لایەنەکا تەری.
