دمابەدماو بانگەوازیییە تاریخیەکەو ٢٧و شوباتو ڕابەر ئاپۆی، پرۆسەو چارەسەری جە تورکیانە پڕاوە پەی قۆناغێوە پراکتیکی کاریگەری، پېوەس بە بانگەوازەکەی پارتو کرێکارا کوردەسانی (پەکەکە) کۆنگرەو ١٢ـەمینو ۋێش بینا بە بڕیار هۊرگێرتەی ئەرەیاۋناش بە گرڎ جۊرۍ ئینۍ چنی بانگەوازییەکەو ڕابەر ئاپۆی پەی ئاردەی ئارای ئاشتی و چارەسەری سیاسییانەو پرسو کوردی. پرسو چارەسەری بیەن بە ڕۆژەڤو کوردەسانی و تورکیای و کۆو هەرێمەکەی.

ئی مژارە سەرو ئاستو ناوچەیی و جەهانیچ گفتوگۆی فرەش سەر مکریۆ، گرڎو لایەنەکا بە ئەرێنی پێشوازیشا جە قەرارەکەو پەکەکەی کەرد کە پەی دمایئاردەی بە ڕێبازی چەکڎاری دانش، بەڵام تا ئیساتۍ دەسەڵات جە تورکیانە هەنگامېوە کۆنکرێتیەش نەنیێنە پەی وەڵێکۊتەی پرۆسەکەی.

چی بارۆ ئەندامو ئەنجوومەنو جوانا دەبەپەی مسەفا یاشۆدوون پەی ئاژانسیما قسێش کەردۍ و ئاماژەش پانەی دا قەرارەکۍ پەکەکەی کەردەیۆ بەرەین ڕوەو دیموکراسیبیەی تورکیایرە و واتش: "بەڵام بە دڵنیاییوە ئی هەنگامۍ پەکەکەی سەرو بنەماو فاڕیای نریێنە کە سەرۆک ئاپۆ باسش چۆوە کەردەن. ڕۊشنا بانگەوازەکەو سەرۆک ئاپۆی ڕاش ڕووەو سیاسەتو دیموکراتیکانەینە کەردۆ جە تورکیانە. بێگومان جوانا بەشێوێوە بەهێز خاوەنداریشا چی بانگەوازییە کەرد. جوانۍ بۊنەو پرۆسەکەیۆ گرڎ ئەرک و ۋەرپرسیاریێوە جە ئەستۆ گێرانە."

'کۊششما پەی بە گلېرگەیکەردەی پرۆسەکەیا'

مسەفا یاشۆدوون ئەرەیاۋناش جوانۍ ئاشتیێوە شکۆدارانەشا گەرەکا و پەی ئینەیچ بە شێوێوە جددی خاوەنداری جە پرۆسەکەو ڕابەر ئاپۆی مکەرا و واتش: "پەکەکە بیەن بە شوناسو گەلو کوردی، پۊکەی جوانۍ یاونای پرۆسەکەی بە گلېرگەی بە ئەرکو ۋێشا مزانا و پەی ئینەیچ ئەوەکۊشا. کۊششو جوانا بە گلېرگەییکەردەی پرۆسەکەین، پەی ئینەیچ پی دماییانە هەڵمەتەی جیاوازەما دەسپنەکەردەن."

'داواو هەمیشەی گەلو کوردی ئاشتییا'

مسەفا یاشۆدوون جەختش کەردۆ پەنەوازا دەسەڵات بەشێوێوە جددی نزیکو داوا ئاشتیوازییەکا گەلو کوردی بۆوە و واتش: "ئیتر کاتو ئانەینە بە دەستوور و یاسا دەسکەوتەکۍ گەلو کوردی مسۆگەرۍ با. وە دمایی بە گرڎو ئا هەرمانا دەسەڵاتی بۍ کە ڕاگیرێنۍ جە گوزاشتکەردەی گەلو کوردی جە مافەکا ۋێش. گەلو کوردی داوێوە بنەڕەتیەش پەی ئاشتی هەن و ئەوەکۊشای ٥٠ ساڵەیچ سەرو ئی بنەمایێنە. گەلو کوردی هیچ وەختۍ جەنگش گەرەک نەبیەن و هەمیشە داواش ئاشتی بیەن."