ئایدا شاکەرەمیە واڵۍ نیکا شاکەرەمیۍ ئەرەیاۋناش، ئەڎاش جە لایەنو هێزەکاو دۆڵەتیوە جە تارانەنە باڵبەسە کریێنە و تا ئیساتۍ نمەزانا مەڵامەتو باڵبەسکەردەو ئەڎێش چێشا.

نەسرین شاکەرەمیە وەڵتەر ئەرەیاۋنابێش  کە بە پاو بەڵگەنامە و گوزارشتەو دکتۆرەکا کناچەکێش بە مەڵامەتو دایوەنەی و کێشتەی سەرەیشەرە  گیانش جە دەسدان.

جە مانگەو نیسانو ئێساڵینە کەناڵو بی بی سی بەڵگەنامێوە پەنهانش وەڵاکەردۆ، کە چنەشەنە ئاشکرا کریان کە نیکا شاکەرەمیە دماو ئانەی جە مېیانو ۋێنیشاندایەکا "ژەنی، ژیۋای، ئازادی"نە جە لایەنو هێزە ئەمنییەکاوە باڵبەسە کریێبۍ، دلۍ ئا ترۆمبێلەینە کە دەسبەسەرکریێبۍ، رووبەڕوو دەسدرێژی و گێچەڵەی سێکسی بیێنۆ و هەر چا ترۆمبێلەنە بە مەڵامەتوو ئەشکەنجەکەردەیۆ گیانش جە دەسدان.

جە ماوەکا ۋییەردەینە فشارەکۍ پەی سەرو کەسوکار و بنەیانەو گیانبەخشایا سەرهۆرداو ژەنی، ژیۋای، ئازادی چڕ کریانۆ و چڼین کەسێشا گیریێنۍ و سزاو زینانی سەرو بەشێوەشارە سەپیان.