موزەفەر ئایاتا ئەنڎامو کۊمېتەو ناۋەنڎی پەکەکەی ۋاتش: ھۊڵ مڎریۊ جە ڕاو گۊشەگېریۊ جمېەرو کورڎی پاکتاو کریۊو کورڎی قڕکەرانۍ.

موزەفەر ئایاتا ئەنڎامو کۊمېتەو ناۋەنڎی پەکەکەی جەبارەو ٢٥ەمېن ساڵەو پېلانگێڵی مېان نەتەۋەییۊ پۍ ئاژانسەو ھەواڵی فورات(ANF)ی قسێش کەرڎۍ.

ئایاتا ئاماژەش پانەی کەرڎ، ٢٥ ساڵۍ سەرو پېلانگێڵېەکەیرە ۋیەرڎەن، بەڵام ھەڵای فێڵبازی و چەواشەکەرڎەی دژ بە ئېمڕاڵی، حساباتی سېاسی، تەوقدای، فشارو ھۊڵە پاکتاوکاریەکۍ دمایشا پنە نامان و ۋاتش:''ئی ئاژە ۋەرو ئانەی کە ڕەبتش بە کێشەو کورڎیۊھەن، بېەن بە بېرۍ بۍ بنە، کە کێشێۋە ۋەڵېنگەیین چارەکەرڎەیش ئاسان نېا. دیارا کێشەو کورڎی تەنېا پڕۊژەو دۊڵەتو تورکېای نېا پۍ جېنۊسایدکەردەو ئەسڕیەیۊ، بەڵکم بېەن بە پڕۊژێۋە جېنۊسایدی مېان نەتەۋەیی کە جېھان دلێشەنە حزورش ھەن. جېنۊسایدە گۊرەکۍ ۋێشا تەنیا ۋەرھەمو یەک دۊڵەتی نېەنۍ. پۍ ئانەیچ ئەشۊ ھەلو مەرجێۋی گونجیا و قەیران وگێچەڵی پەنەواز پۍ ئا جېنۊسایدە گۊرەیە ئاماڎ کریۊ. ئەگەر ھامکاری و بێدەنگی و ڕاپنەداو ئۊروپای نەبېۍ، ھېتلەر نەتاۋۍ بەتەنېا ملۋێنان جولەکۍ جە فرەو ناۋەنڎەکاو ئۊروپای جە کامپەکاو دلێنە بەردەی و کوشتەی کۊکەرۊۋە. جە ھەمان ۋەختەنە کۊکوشی و جېنۊسایدو ئەرمەنەکا بەبۍ ھامکاری و پەشتېۋانی و بێدەنگی ئەڵمانیای و بەریتانېای و ھێزەکا تەری ڕوۋە نەڎۍ.

ۋەڵۍ گرچێۋێنە دۊڵەتو ترکی ئەرەگېری سەڎان ساڵێن مەنتېقەکەنە دژو کورڎی کۊکوشی ئەنجام مڎۊ. دۊڵەتو ترکی گەرەکشا ئېسفاڎە جە قەیران و کێشەو گرفتەکا جېھانی و جەنگو قەیرانەکا ۋەرکۊتوو دلۍ ڕاسەی(ڕۆژھەڵاتی ناوەراست) ھورگێرۊ ھەتا بتاوۊ ئا کۊکوشیە ئەنجام بڎۊنە، ۋاتە پڕۊژەو ئاسېمېلاسېۊن(تاونایۊ)و بە تورککەرڎەی و جېنۊساید، کە سەڎان ساڵێن ۋەردەواما یاۋان بە ئاستێۋی فرە بەرز. تایبەتتەر بە پېلانگێڵنای مېان نەتەوەیی ھومێڎەکۍ دۊڵەتو ترکی فاشېستی گۊرەتەرۍ بېۍ و قەناعەتش چانەن، کە متاۋۊ جمیەرو ئازاڎیی کورڎی دلێنەبەرۊ. دەسەڵاتو فاشېستی ئاکەپە و مەھەپەی-چ پی قەناعەتۊ سوارو ئەسپ و جېنۊسایدی بېێنۍ و غارشا دان پۍ جېنۊسایدکەرڎەو کورڎا.

موزەفەر ئایاتا ئەرەیاونایچش، ئاجەنگە کە کریۊکە تەنیا جەنگوو کورڎی نییا و واتش: "حیچ دەوڵەتێوە وەرکەوتوو دلێڕاسەی مەتاوۊ دژوو تورکیای گژیۊ، مەتاوۊ وەراوەرش مرڎۊ، ئانە کە بە نامۍ گردیوە بەرەنگاری کەرۊ، جەنگ کەرۊ دژش مڎرۊوە، ئاڵتەرناتیڤ و یاگەگیرێوە وەش کەرۊ، پەشتی بە گەلا بەسۊ، متمانە و باوڕ بە گەلا مڎۊ، گەلەکا وزۆ جمووجوڵۊ، پەشتیوانی جە یۊبییەی و هامپەیمانیی گەلا کەرۊ، جمیەروو ڕێبەرایەتی و پەکەکەین، پەوکای ئا گۊشەگیرییە سەروو ئیمراڵی دماییش نمۍ. بە شێوێوە ئاسایی وەختۍ کەسێوە پەی ماوەو ٢٥ ساڵا زیندانی کریۊ، حەر بە پاو  یاسایەکا ئیتر سزێکێش دماییش مۍ، ئا ماوە کەم نییا کە چارەکە سەدێوەن دەسبەسەرا. ئانە کە چی ئاستەنە ڕووە مڎۊ و چا ئاستەنە وێسەرقاڵکەرڎەی بە زیندانیێوە پاشێلکەرڎەی پیمەرە یاساییەکان، بێزارکەرڎەی و تووڕەکەرڎەی کۊمەڵایەتیین و ئانە هەوڵێوە ئاساییە نییەنە، بەڵکوم  پڕۊژێوە گەوەرەو جینۊسایدین، کە ماوەو سەد ساڵان بە گەمارۊدای، بڕنایرەی، پاکتاوکەرڎەی، دلێنە بەرڎەی وسڕیەیۊ کورڎی درێژەش هەن و ئیسەتێنە ئیمراڵی کریان بە ناوەندوو ئا پڕۊژەیە. ئی پڕۊسە گردش جە دەوروبەروو ئیمراڵی و سەروو ئیمراڵینە ملۊ ڕاوە".

ئایاتا ئاماژەیچش پانەیە دا، ڕاوەبەریی ئیسەو دەوڵەتوو تورکی هەوڵۍ مڎۊ ئیمراڵی بڕۊرە جە گەلی، مەژگوو جمیەرەکەی جە جەسەیش جیا کەرۊوە، پا شێوە جەسەکەی پەرش و وەڵا کەرۊوە و واتش: "گەرەکشانە کۊکوشییەکەی تەمامنا. ڕابەرایەتی کاریگەریێوە گەورەش سەروو هێزوو گەریلای، حیزبی و گەلی هەن. گەل باوڕشا بە ڕابەرایەتی هەن و چەنەش دڵنیێنێ".

ئایاتا واتش، وەروو ئانەی فرە جە ڕابەروو گەلوو کورڎی "عەبدوڵڵا ئۊجەلان"ی تەرسا و واتش: "چندین جارۍ نۊعەکاو گۊشەگیرییشا  دژوو ڕابەرایەتی تاقیۍ کەردێنۍ، سەرەڕاو گردوو ئانیشا نەتاوانشا ڕابەرایەتی جە حیزبی و جە گەلی و جە گەریلای بڕارە. چەپەوانەوە  دڵسۊزیی پەیش بەقووەتتەر بییەن، جمیەرەکە گەورەتەر و کاریگەرتەر بییەن. پەوکاتەی جە ساڵەو ٢٠١٤وە جارێوە تەر قەراروو جەنگی سەرتاسەری و گردلایەنەیشا دا. ئەردۊغان دیکتاتۊریێوەش وەش کەرد و گردوو تواناکاو کۊماریش پەی درێژەدای بە جەنگی بەکار ئاردێ".

ئایاتا، واتیچش، ئامانجەکە ئانە بۍ، کە دەوڵەت ئانەیە جە دژوو کورڎا و ور چەرخنۊ پەی جەنگکەرڎەی و واتیچش:"ئەردۊغان وێش پەی ئانەی  ئامادە بۍ. بەتایبەتی وڵاتە یۊگێرتەکاو ئەمەریکای و یۊوەبییەی ئەورووپای دلۍ  سیستموو ئیمپریالیستینە، هامبەشێنۍ چا سیاسەتەو گۊشەگیرکەرڎەینە. ئاڎۍ ماچا، بێدەنگی بە ماناو ڕەزامەندیین. یاساکاو ئەورووپای پاشێلۍ کریا، ئاڎۍ گۊش جە قەرارەکاو داڎگاو مافوو ئینسانوو ئەورووپای مەگێرا، سی پی تی بێدەنگ بییەن، بەڵام کەس مەواچۊ، 'یاساکۍ  ئیمراڵینە پاشێلۍ کریا، هەرمانۍ جبەروو یاسێوە کریا، مەبۊ ئی  گۊشەگیرییە پی جۊرە درێژەش بۊ، یانۍ حیچ دەنگێوە نییا. ئانە ماناش چێشەنە؟ ماناش ئانێنە گۊشەگیریی سەروو ئیمراڵی پەسەنڎ کریا و جابەجاش کەرا.

درێژەژ هەن...

ھ.ش / س.ج