دەس ھورچنو نوخبەو ئەکادیمی، بە گۊرەتەرین سامانو ۋڵاتی و نەتەۋەی منریۊرە، بەڵام جە ھەرێمو کورڎسانیەنە بە ئاسانی و ڕاپنەداو ئەرەمەرزیاکا حکومەتو ھەرێمی، ۋڵاتا بێگانەی بە تایبەت تورکېاو ئێران ھۊڵ مرڎانۍ، ناۋەنڎەکاو پەرۋەرڎەی و ۋەنای کەرانۍ ئامانج.

بەپاو ھەۋاڵێۋی ڕۊژنېوزی چا چۋارچێۋەنە کونسوڵخانەو ئێرانی، بەنامۍ کەرڎەیۊ خولو یەک مانگەو فێربیەو زۋانی فارسیۊ، جە کۊلێژو یاساو زانستگەو سلێمانی، ھۊڵو ۋەشکەرڎەو

پەیۋەنڎیۍ درێژ مەوڎای چنی خۊنکارا مرڎۆنە. بەپاو چڕیەو کەرڎەیۊ خولەکەی، ئا خولە پەرۋەرڎەییە پۍ ماۋەو ٣٠ ڕوۋان و ١٥٠ خۊنڎکارۍ متاۋا چنەشەنە بەشڎارۍ با و مامۊساو پڕۊگرامو سی دی و تەمامو پەنەوازیەکا جە تەرەفو کونسوڵخانەیۊ جابەجۍ کریۊ، ڕەنگە تا ئێگە ئاسایی بۊنە، بەڵام پێسە ھەلپنەدایۍ(ئۆفەرێ) ئاماژە پانەی کریان، کە بەشڎارا خولەکەی ڕاسەوخۊ پەیۋەنڎیشا چنی کونسوڵخانەی پۍ ۋەشکریۊ.

پێسە ھاندایێچ پۍ بەشڎارا خولەکەی، بە مەڵامەتو ۋەنای ماستەری و دکتۊرای جە ئێران قبوڵشا پۍ ھورگێرانە پۍ درێژەدای بە ۋەنای چا بوارەنە.

ھورچنیەو کۊلێژو یاسای، پۍ کەرڎەیۊ ئاخولیە یاگۍ سەرنجێن چونکی بەرشیۍ ئا بەشیە جە دما ڕۊنە پێسە "پارێزەری، داڎوەری، شارەزاو یاسا شناسی "و چنڎین پېشۍ تەرۍ، متاۋا جە بەشە ھەستیارەکاو ئەرەمەرزیاکا حکومەتیەنە ۋەرپەرسیاریشا بڎریۊ پنە.

تەنیا ئێران نېا، کە جە ڕاو پەرەپنەدای بە زۋانی و کلتورو ۋێشۊ، گەرەکشا یاگۍ ۋێش زیاتەر قایم کەرۊ ھەرێمەنە و دەسھۊرچنەکا پۍ لا ۋێش کێشۊنە، تورکېایچ چنڎین ۋەننگێۋ زانستگێ و پەیمانگێش ھەرێمو کورڎسانیەنە ھەنۍ، کە جە ڕاو ئېنیشاۋە ھۊڵو شێۋناو کەسایەتی و ۋیرکەرڎەیۊ دەسھۊرچنەکاو کورڎی مرڎۊنە، پۍ ئانەی بە تەمامی گنانە خزمەتو سېاسەتەکاشاۋە.

ئا دوۋە ۋڵاتە ھامۋەخت چنی ھۊڵەکاشا، مەدیاکارو دەزگاکۍ یاۋنەریچشا کەرڎێنۍ ئامانج و ۋەردەوام ئېنۍ ھۊڵو ئانەینە، چنی وزاشا خزمەتو وتارەو مەدیای ۋێشاۋە، ئېنە جېا چانەی حەر جە ڕاو یاۋنەرەکا نزیک جە ۋێشاۋە، ھۊڵو سەپناو کلتورو ۋێشا مرڎا جە ڕاو موزیکو سینەمایۊ.

جە تەمامو ھۊڵەکاو تورکیەیو ئێرانی و ۋڵاتا تەریچ ئەرەمەرزیێکۍ حکومەتو ھەرێمیچ ھامکارو ڕا ۋەشکەرۍ و یاردی دەرێنۍ و ئاسانکاری تەمامشا پۍ کەرانۍ.

ھ.ش