ڕابەرو گەلوو کوردی عەبدوڵا ئۆجالان ماوەو ٢٦ ساڵان ئینا چێرو سیستەمو ئەشکەنجەی و گۆشەگیری ئیمراڵینە، بە سەختکەردەی گۆشەگیری ٤٤ مانگێن هیچ زانیاریێوە جە بارەشۆ نیا. پەی ئازادی جەسەیی ڕابەرو گەلوو کوردی عەبدوڵا ئۆجالانی سەرو ئاستی نەتەوەیی و مېیاننەتەوەیی چالاکی ئەنجام مڎریۆ، هەڵمەتەو "ئازادی پەی عەبدوڵا ئۆجالانی، چارەسەری سیاسی پەی پرسو کورد"ی بە ساڵێوە پەڕ جە چالاکیوە ساڵەی یووەمو ۋێش ۋییەرنا، هامکات هەڵمەتەکۍ سەرو ئاستی مېیاننەتەوەیی پەشتگیریێوە ۋەرفراوانش ۋنەکریا.

ئیلینۆرا بۆناکۆرسیە سەرۆکەو جەمەو فۆنتی دی پەیس (Fonti di Pace)ی ئیتاڵی یووەنە چا کەسا پەشتگیریش جە هەڵمەتەکێنە کەردەن قسێش پەی ئاژانسەکەیما کەردۍ و ئاماژەش پانەی دا گرڎ ۋەرپەرسێنۍ جە گۆشەگیری نایاسایی ئیمراڵی کە هامشێوەش نییا جە جەهانەنە. پەنەوازا ئیتاڵیا ۋەرپرسیاری ۋێش جە دژو گۆشەگیری ئیمراڵی نیشانە بڎۆ.

'بێدەنگی ئۆروپای پەی پارێزناو مەسڵەحەتاکاشا'

بۆناکۆرسیە جە قسەکاشەنە ئاماژەش پانەی دا کە ئاڎۍ پېسە جەمەو ۋێشا جە گرڎ شۆنو کاتێنە جە دژو گۆشەگیری چالاکۍ بێنۍ و واتش: "گۆشەگیری سەرو عەبدوڵا ئۆجالانی سیستەمێوە تەرسناکە. هەرچڼە ئێمە پېسە گەلی ناڕەزایی جە دژو ئا سیستەمەیە نیشانە مڎەیمۍ، بەڵام ئەرەمەرزیاکۍ ئەوروپای بێدەنگی هۆرچنا. مەڵامەتوو ئی بێدەنگییەیچە ئانەنە گەرەکشا نیا زەرەر بڎا پەیوەندییەکا ۋێشا و ئەردۆغانی."

جە بەردەامی قسەکاشەنە بۆناکۆرسیە سەرنجش وست سەرو گرنگی پارادایمەکا ڕابەرو گەلوو کوردی عەبدوڵا ئۆجالانی پەی چارەسەرو پرسەکا مرۆڤایەتی. جەختش چانەیچ کەرڎۆ پېسە جەمەکەیشا پارێزگاری چا پارادایما مکەرا.

'مشۆم پەی ئازادی عەبدوڵا ئۆجالانی ئەرەکۆشمۍ'

جە دماینە بۆناکۆرسیە جەختش چانەی کەردۆ مشۆم گرڎ یاگێنە ئەرەکۆشای پەی ماڕای گۆشەگیری ئیمراڵی بکریۆ و پی جۆرە دمایش بە قسەکاش ئارڎ: "عەبدوڵا ئۆجالان حەقەتینەکەن. ئانەی پێشکەشش مکەرۆ بناغەو حەقیقەتی و بەهای کۆمەڵایەتییا. نمەتاومۍ نکۆڵی چا حەقیقەتی و حەقەتینیە بکەرمۍ. نمەتاومێچ ۋەرا ۋەر پا ناحەقییەی ۋەرا ۋەر بە عەبدوڵا ئۆجالانی گوزەر مکەرۆ بێدەنگۍ بیمۍ. پۊکەی پەی حەقیقەتی و ڕاسی مشۆم ئەرەکۆشمۍ."