سەرەڕاو زیاڎبیەی  ناڕەزاییەکا، ڕۊو چوارشەممەی سوپاو ئیسرائیلی ئەرەیاۋناش کە مەنتیقەو فیلادیلفیاینە بە درێژای ١٤ کیلۆمەتراشا وستەن چێروو کۆنترۆڵوو ۋێشاوە، کە گنۆ سەرسنوروو وڵاتوو میسری.

واتەواچوو سوپاو ئیسرائیلی دانیل هەگاری واتش، "ڕاڕەوو فیلادیلفیای دەرچەو پێڎاکەردەی چەکی بۍ پەی حەماسی جە کەرتوو غەززەینە."

ئیسرائیل ئانەش دیاری کەردەن کە جەنگ پەی ماوەو حەوت مانگا تەری بەردەوام بۆ.

دماو ئانەی ڕۊو چوارشەممەی دەبابە سەروازییەکۍ سوپاو ئیسرائیلی پڕێوە پەی ناوەنڎوو شارەکەی، جەنگ و بۆردوومانکەردەی جە کۆڵانەکانە ئاما ئاراوە. بە پاو داتێوە نەتەوە یۆگێرتەکا جە ماوەو یەرۍ حەفتانە نزیکەو ملیۆنۍ فەلەستینیۍ ڕەفەحشا جیا ئاستەن بە مەڵامەتوو جەنگوو بەینوو ئیسرائیلی و حەماسی.

ناڕازیبیەیە میان نەتەوەییەکا

جەزائیر سیاونوسێوەش پێشکەش بە ئەنجوومەنوو ئاسایشوو نەتەوە یۆگێرتەکا کەرد و داواو ئاێربەسیش کەرد. سەرۆک وەزیرانوو چینی شی جینفین بانگەوازش پەی بەستەی کۆنفرانێسێوی ۋەرفراوانی ئاشتی کەرد. سەرۆککۆمارو میسری عەبدولفتاح سیسی داواش کەردە دمایی بە کۆچبەرکەردەی هاموڵاتیا غەززەی بێنە.