یەكێتی ڕاگەیاندنی ئازاد لە ڕۆژئاوای كوردستان و سەندیکای ڕۆژنامەنووسانی کوردستان، یاداشتێکی لێکتێگەیشتنی هاوبەشیان بەمەبەستی ئەنجامدانی هەماهەنگی زیاتر لە نیوان خۆیاندا واژۆ کرد.
بەپێی بەیاننامەیەکی سەندیکای ڕۆژنامەنوسانی کوردستان، دوای ئەوەی لە چەند ڕۆژی ڕابردوودا شاندێکی یەكێتی ڕاگەیاندنی ئازاد لە باکژور و ڕۆژهەڵآتی سوریا و ئەنجومەنی سەندیکای ڕۆژنامەنوسانی کوردستان لە هەولێر کۆبوونەتەوە، ئەمڕۆ ڕێککەوتن و لێکتێگەیشتنێکی هاوبەش لەنێوانیاندا واژۆ کراوە، بە ئامانجی دروستکردنی بەردی بناغەی کار، کە لە دواڕۆژدا هۆکاربێت بۆ دروستکردنی هەماهەنگی لە نێوان هەموو یەکێتی و ئۆرگانە میدیاییەکانی تری کوردستان.
بەپێی ڕاگەیەندراوەکە، لە کۆبوونەوەکەدا باس لە چۆنیەتی ئەنجامدانی هەماهەنگی لە نێوانیاندا کراوە و گفتوگۆ لەسەر رەوشی رۆژنامەنووسان لە هەرێمی کوردستان و رۆژئاوای کوردستان و کردنەوەی خول و ڕاهێنانی رۆژنامەنووسان بۆ زیاتر پاراستن و سەلامەتی رۆژنامەنووسان کراوە.
دەقی ڕێککەوتن و لێکتێگەیشتنەکە:
– کار بکرێ هەموو میدیاکانی کوردستان پێکەوە پەیامێکی رۆژنامەنوسی پیشەییان هەبێت، کە دوور بێت لە هاندان و ڕق و کینەو دووبەرەکی، بەڵکو پەیامێک بێت بەرژەوەندی باڵای دۆزی کوردستان ڕەچاوبکات، بەپێی بنەماکان.
– کار بکرێت بۆ گۆڕینەوەی پسپۆڕی لە میانی ئامادەبوون لە کۆڕ و چالاکی و وۆرک شۆپی ڕۆژنامەنوسی هاوبەش، سەندیکای ڕۆژنامەنوسانی کوردستانیش هەموو ئامادەییەکی لەوبارەیە نیشاندا.
– هەوڵدان بۆ کردنەوەی سەکۆیەکی کراوە بۆ گفتوگۆ و دیالۆگ لەمەڕ پڕۆژەی دروستکردنی (فیدراسیۆنی ڕۆژنامەنوسانی سەرتاسەری کوردستان) کە پێشتر سەندیکای ڕۆژنامەنوسان کاری لەسەر کردووە، کە ببێتە بناغەی پرۆژەی نیشتیمانی هەموو سنوورە سیاسییەکان ببڕێت و لە بەرژەوەندی تێکڕای ڕۆژنامەنوسە کوردستانیەکان بێت لە هەر کوێیەک بن.
– هەماهەنگی بکرێت لەنێوان سەندیکای ڕۆژنامەنوسانی کوردستان و یەکێتی ڕۆژنامەنوسانی ئازاد لە ڕۆژئاوا، بۆ یەکخستنی هەڵوێست و پشتگیریکردن، بۆ چوونە ناو ڕێکخراوە ڕۆژنامەنوسییە نێودەوڵەتییەکان.
– کار بکرێت لەگەڵ لایەنە فەرمییەکانی هەرێمی کوردستان بۆ دۆزینەوە و هاریکاری و میکانیزم بۆ ئاسانکاری هاتن و چوونی ڕۆژنامەنوسان لەنێوان هەرێمی کوردستان و ڕۆژئاوادا.
ک-ش
