دەوڵەتی ئێران سزای پێنج ژنی دیکەی دا
دەوڵەتی ئێران لە درێژەی چەوساندنەوەی ژناندا پێنج ژنی دیکەی سزادا.
ڕێکخراوی مافەکانی مرۆڤی هەرانا و سەرچاوە میدیاییەکانی دیکە ڕایانگەیاند، دوو ژن لە ئێران سزای زیندانیی کردنیان بەسەردا سەپێندرا و سێ ژنی دیکەش دەستبەسەر کران.
لە هەواڵەکاندا هاتووە: " ڕۆیا سابات ژنێکی بەهایی خەڵکی شیراز و دانیشتووی ئیمارات بە تۆمەتی”هاوکاریکردنی هاوڵاتیان و حکوومەتی ئیسرائیل، تێکدانی ئاسایشی نەتەوەیی و پرۆپاگەندە دژی دەوڵەت” لەلایەن لقی یەکەمی دادگای شۆڕشی شیرازەوە سزای ٢٥ ساڵ زیندانییکردن، دوو ساڵ قەدەغەکردنی دەرچوون لە وڵات، هەڵوەشاندنەوەی پاسپۆرت، بێبەشکردنی لە مافە کۆمەڵایەتییەکان و قەدەغەکردنی چالاکی لە تۆڕە کۆمەڵایەتییەکانی بەسەردا سەپێندرا. سزاكە لە ڕۆژی ٢٨ـی ئایاری ئەمساڵدا بە ڕۆیا سابات ڕاگەیاندراوە."
لە بەردەوامییدا دەڵێت: " ڕۆیا سابات ماوەی ٢٣ ساڵە لە ئیمارات دەژی و لە ٤ـی کانوونی دووەمی ٢٠٢٤ بۆ چاودێری دایک و باوکی، کە نەخۆش بوون، گەشتی بۆ شیراز کرد، بەڵام لەلایەن وەزارەتی ئیتلاعاتی ئێرانەوە دەستگیرکرا و دوای حەوت مانگ لە زیندانی عادل ئاباد لە شیراز بە شێوەی کاتی ئازاد کرا. سێ ژنی بەهایی دیکە بە ناوەکانی شەیدا ڕۆحانی، شیدە تەواکوڵی و شیلا تەواکوڵی لە لایەن هێزە ئەمنییەکانی ئێرانەوە بە بێ فەرمانی دادوەر دەستبەسەر کران و تا ئێستا چارەنووسیان نادیارە."
ماڵپەڕێکی هەواڵی دیکەش ئاماژەی بە سزادانی ژنێک کردووە و هاتووە: " مەهشید گۆهەری توێژەر و نووسەر و مامۆستای پێشووی زانکۆی فێردەوسی بە تۆمەتی”پرۆپاگەندە دژی دەوڵەت” لە لایەن لقی یەکەمی دادگای شۆڕشی مەشهەدوە سزای نۆ مانگ زیندانییکردنی بەسەردا سەپێندرا. ئەو ژنە مامۆستایە بە هۆی چالاکییە ئەدەبی و ڕۆشنبیرییەكانی و پشتیوانیکردن لە پۆشینی جلوبەرگی ئارەزوومەندانە و پاڵپشتیكردن لە خوێندکارانی ناڕازی لە شۆڕشی”ژن ژیان ئازادیی” لە زانکۆ لە پیشەکەی دوورخراوەتەوە."
