ئاژەو تەندرووسی زەینەب جەلالیانۍ خاس نیا
ژەنە کوردەی زینانیەی سیاسیە زەینەب جەلالیانە جە زینانو یەزدینە ئاژەو تەندرووسیش خاس نیا و جە چارەسەری پزیشکی بێبەشەکریێنە و پەنەوازش بە نەشتەرگەری هەن.
بە پاو ئەرەیاۋناکا ئێرانی کە جە چوارچێوەو مافەکا مرۆڤینە هەرمانە مکەرا، ئاژەو ژەنە کوردۍ زینانیەی سیاسیۍ زەینەب جەلالیانە جە زینانو یەزدی، ئاژەو تەندرووسیش خاس نیا، ۋەرپەرسا زینانی ڕا بە پنەدای چارەسەری پزیشکی بە جەلیانۍ نمەڎا کە پەنەوازش بە نەشتەرگەری هەن.
ئاماژەیچ پانەی کریان؛ زەینەب جەلالیانە چڼین جارۍ جە لایەنو ۋەرپەرسا زینانو یەزدیۆ ڕووبەڕوو تنوتیژی و سوکایەتی پنەکەردەی بیێنۆ.
زەینەب جەلالیانە جە ئەڎابیۍ ١٩٨٢ ێنە و خەڵکو دەگاو دێم قشڵاقی ناوچەو ماکۆی سەر بە پارێزگاو ورمێ ۋەرکۊتوو کوردەسانیەنە، جە ١٠و ئادارو ٢٠٠٧ جە دەروازەو شارو کامیارانی باڵبەسە کریا، جە ٤و تشرینو دووەمو ٢٠٠٨ جە لایەنو لقو ١و دادگاو شۆڕشو کرماشانی بە سەرۆکایەتی دادوەر عەلی مورادی بە تۆمەتۊو “چەکڎاری و هامکاری و ئەندامیەتی پژاکی و پرۆپاگەندەی دژ بە دۊڵەتی” سزاو جە قەنارەدایش سەرەرە سەپیا، جە ساڵۊو ٢٠٠٩ دادگاو لوایۆپۊرەی جە پارێزگاو کرماشانو ۋەرکۊتوو کوردەسانی بە سەرۆکایەتی محەمەد عەلی ڕۆشنی سزاو جە قەنارەداکەیش پەسینیا.
ساڵەو ٢٠١١ دماو هەڵوێسی ۋەرفراوانی دلېینەی و مېیاندەوڵەتی و بەیاننامە سەرەمڕەکا ڕێکوزیاو جەهانیی چەمڎاری مافو مرۆڤی و ڕێکوزیاو چنەوېیەردەی مېیاندۊڵەتی، سزاکێش پەی زینانی هەتاهەتایی فاڕیا و بە مەبەسو جابەجێکەردەی سزاکێش ڕەوانەو زینانو یەزدی کریا.
