جە پرۆسەو ئاشتی و گلېرگەی دیموکراتیکینە، پایې وزمێنە حەفتێوە یەکلاکەرەوۆ. چەمەڕا مکریۆ ئی حەفتە کۆمیسیۆنەکە جە پەرلەمانەنە پێکبې، ڕابەر ئاپۆ بانگەوازی تازە بکەرۆ و لوایڕاوەو پرۆسەکەی دیاری بکەرۆ.
بەگوێرەو هەواڵێوە ئاژانسو میزۆپۆتامیای، جە لېوە ئاماڎەکاریی مکریۆ پەی پێکئاوردەی کۆمیسیۆنێوە چېرو چەترەو پەرلەمانینە پەی چارەسەری پرسو کوردی، جە لېوەتەریچۆ، چەمەڕا مکریۆ پەکەکە هەنگامەی کردارییە بنیۆ پېوەس بە چەکنیایرەی.
بەگوێرەو هەواڵەکەی، چەمەڕا مکریۆ کە ڕابەر ئاپۆ ڕاسەوخۆ بانگەواز جە هێزەکاو گەریلای بکەرۆ. جە چوارچێوەو ئی بانگەوازەینە ژمارێوە گەریلې پەکەکەی جە مەراسیمێوە سیمبولینە چەک منیارە و چەمەڕا مکریۆ دلێچشانە ڕاوەبەرې پلەباڵێچ بانە.
سەرۆکو پەرلەمانی نوعمان کورتولموش حەفتەی ۋېیەردە دەربارەو پێکئاوردەی کۆمیسیۆنێوە چنی نوێنەرو پارتە سیاسییەکا گلېربیۆ. چەمەڕا مکریۆ کە گرڎو پارتەکا ئی حەفتە پێشنیارە نویسیاکاشا پێشکەش بکەرا. ئامانجو "کۆمیسیۆنو ئاشتی کۆمەڵایەتی و دیموکراتیکبیەی" ئانەنە کە بناغەی یاسایی پەی پرۆسەو "چەکنیایرەی" ئەرەمەرزیۆ و هەمیچ هەنگامەو دیموکراتیکبیەی بنیۆ.
پلانە چامنێنە، پەی نیشاندای نیازپاکی، ژمارێوە گەریلې پەکەکەی، جە هەرێمو کوردەسانینە مەراسیمو چەکنیایرەی ئەنجام بڎا، ئی مەراسیمە ۋەرو چەما ڕای گرڎیی و بەشێوێوە ڕاسەوخۆ پەخش مکریۆ. تەئکید کریاوە کە نوێنەرو پارتە سیاسییەکا و ڕێکوزیا مەدەنییەکا و دەزگاکې ئەرەیاۋنای خوڵقەو مەراسیمەکەی بکریا. هەرپاسە جە مەراسیمەکەنە پەیامو "ئێمە ئاماڎێنمې پەی بەشداریکەردەی جە سیاسەتو دیموکراتیک"ینە مڎریۆ.
قۆناغێوەتەرەو یەکلاکەردەیۆ پرۆسەکەی، گلېرۆبیەو شاندو ئیمراڵیی دەم پارتییا چنی سەرۆککۆمار ئەردۆغانی، کە چەمەڕا مکریۆ چی ڕوانە بلۆڕاوە. جە گلېرۊبیەکەینە ئاژەی هەنوکەیی و ئایندەو پرۆسەکەی تاوتوێ مکریۆ.
بناغەو پرۆسەکەی پەشتی بینۆ بە "بانگەوازو ئاشتی و گلېرگەی دیموکراتیک"ـی ڕابەر ئاپۆی کە ٢٧ و شوباتی ئەرەیاۋېیا و پێشنیارش کەردەن پەی دمایئاردەی بە ئەوەکۊشای چەکڎاریی پەکەکەی. پەکەکە سەرو بناغەو ئی بانگەوازیە جە مانگۊو ئایارینە کۆنگرەو ۋێش بینا، قەرارش دا بە دمایئاردەی بە گرڎ کار و کۊششێوە کە چېرو نامې پەکەکەینە مەکریۆ و چەکنیایرەی. ۋەرو ئانەی حکومەت هەنگامەی ڕۊشنەش نەنیا، ڕووبەڕوو ڕەخنەی بیۆ.
دەم پارتی دەسنیشانش کەرد، مەشۊم کۆمیسیۆنەکە سەرو بناغەو ڕێککەوتەی ۋەرفراوانی کۆمەڵایەتی هەرمانە بکەرۆ، جەختش کەردەبێوە کە پرۆسەکە بە سەرمەشقایەتی ڕاوەبەر مکریۆ. جەهەپە هەڵوێسێوە ئەرێنیش سەبارەت بە پرۆسەکەی نیشانەدان. پاڵپەشتی ئۆپۆزیسیۆنی پەی ئانەی پرۆسەکە جە پەرلەمانەنە ڕاوەبەر بکریۆ، بە هەنگامېوە هومێڎ بەخشە شرۆڤە مکریۆ.
جە ڕوانی ئایندەنە، بە بانگەوازە چەمەڕا کریاکەو ڕابەر ئاپۆی و هەنگامە کردەییەکې پەکەکەی، چانەی مشۆ پرۆسەکە پڕۊوە پەی قۆناغێوە تازەی. جوابو ئی هەنگامێچە پېوەسا بە هەنگامەی ڕۊشنەی یاسایی و سیاسیی حکومەتیوە.
