هەڵمەتۆو "یەرە شەممەکا نا پەی جە قەنارەدای" کە جە لایەنو زینانیا سیاسی جە ٣٨ زینانیا ۋەرکۊتوو کوردەسانی و ئێرانیوە دەسش پنەکەردەن، ئینا حەفتەو ٧٥ـەمینینە، سەبارەت بە جە قەنارەدای ئەرەیاۋنێوەش وەڵا کەرڎۆ.

جە ئەرەیاۋناکەینە ئامان، جە ماوەو حەفتێوەنە ١٧ زینانیې کە یووەشا ژەنینە جە ۋەرکۊتوو کوردەسانی و ئێرانەنە جە قەنارە دریێنې.

هەڵمەتەکې ئاماژەش پانەیە دان کە جە سەرەتاو ساڵۊو ٢٠٢٥یوە تاوەکو ئیساتې جە ۋەرکۊتوو کوردەسانی و ئێرانەنە زیاتەر جە ٤٢٤ کەسا جە قەنارە دریێنې.

هەرپاسە ئانەیچ ئەرەیاۋییان کە ڕۆو چوارشەممەی ۋېیەردەی یەرې کۆلبەرې کوردې بە نامەکا ئازاد شوجای، ئیدریس عەلی و ڕەسوڵ ئەحمەدی بە تۆمەتۊو سیخوڕی جە قەنارە دریێنې.

ئاماژە پانەیچ کریان کە جە ئێران و ۋەرکۊتەنە، شەپۆلێوە باڵبەسکەردەی بە تۆمەتۊو سیاسی و ئەمنی دەسشپنەکەرڎەن و فرەو ئانیشا باڵبەسې کریا سزای سەختە مڎریا.

جە هەڵمەتەکېنە ئاماژە پانەی کریان کە ژیۋای زینانیا سیاسی کە سزاو جە قەنارەدایشا سەرەرە سەپیان جە گرڎ کاتێ زیاتەر ئینا مەترسینە و واتش: "چنی گەلو کوردی و ئێرانی داواو هۊرشێونایۆ جە قەنارەدای و ئازادی گرڎو زینانیا سیاسی مکەرمې."