هامسەرۆکایەتی کۆنسەو ڕاوەبەری کۆما جڤاکێن کوردەسانی (کەجەکە) جە ئەرەیاۋنێوەنە یاڎو قوربانیا کۆمکوژی سێواسیش کەرڎۆ و واتش: "ڕاو ڕزگاری و دمایئاردەی بە تاریخو کۆمکوژی و قڕکاری دمایئاردەین بە تێگەو دۊڵەت-نەتەوەی یەکپەرسی."

دەقو ئەرەیاۋناکەو کەجەکەی پی جۊرەنە:

"ماوەو ٣٢ ساڵا سەرو کۆمکوژی سێواسیرە موېیەرۆنە کە بە نیگەرانی و ئێشێوە گۊرۆ یاڎش مکەرمېوە. جارێوەتەر ئی کۆمکوژییە شەرمەزار مکەرمې کە بەدەسو هێزە نەژاڎپەرس و فاشیستەکا ئەنجام دریا و بەڕێز و پنەزانایۆ یاڎو ئا کەسا مکەرمېوە کە جە کۆمکوژیەکەنە گیانشا جە دەسدا. کۆمکوژی سێواسی یۆن جە دڕندەتەرین کۆمکوژییەکا تاریخو مرۆڤایەتی. فرەو قوربانییەکا نوویسەر، هونەرمەڼې، ڕۆنامەوانې و رۆشنۋیرې بێنې کە پەی بەشداربیەی جە چالاکیێوەنە کە جە سێواس ئەنجام دریې، جە هۆتێل مادماکەنە مەنێنێوە بە شێوێوە وەحشیانە ئېرشا ۋەردریانە. فرەو قوربانییەکا هەڵای جە تەمەنو جوانینە بېنۍ. ئامانج و شێوازو ئەنجامدای ئی کۆمکوژییە وەحشیانەیە جە دڵ و یادەوەری گلېرگەو عەلەوی و گەلو کوردەسانی و تورکیاینە بیەن بە زامېوە گۆرە.

کۆمکوژی سێواسیش هامشێوەو کۆمکوژی چۆرووم و مەڕەشی هرووژمێوە بێ جە دژس گەلی و گلێرگە و عەلەوی، هەمیچ کۆمکوژیێ بێ جە دژو ڕۆشنبیری دیموکراتیکو شۆڕشگێڵی تورکیای. پی کۆمکوژییەی کە بەرهەمو زیهنیەتس دۆڵەت-نەتەوەی پاشڤەڕۆ و یەکپەرسی بێ، ئامانجەکەش سیاو کەردە و ئایندەو هامبەشو دیموکراتیکو ئازادی گەلا بێ،. ئی ئامانجە جە گرڏ و کۆمکوژییەکا سەر و گلێرگە و عەلەویینە فرە بەڕۆشنی وینریان. گرڏ جارێ ڕۆڵشا بە هێزو پرۆڤۆکاتۆر و میلیشا دا، بە دەسو ئا هێزا هەوڵشادا ناکۆکی وزا بەینا مەزهەبەکا و دماتەریش ژیوگە و هرووژمی و کۆمکوژی ڕەخسنا. خودو دۆڵەتی پەشتە و گرڏ و ئی هرووژماوە بێ.

نزیکایەتی دۆڵەتی دژو عەلەوییەکا و گەلوو کوردی هەمان نزیکایەتییا. حەر چنین جە پرۆسەو دۆڵەتو کۆمارینە نکۆڵی جە گەلوو کوردی کریا، هەوڵو کۆمکوژی کەردەیشا دریا، نکۆڵی سەر و عەلەوییەکایش سەپیا و بە مەڵامەتوو چاند و بڕوادارییەکەیشا فشارشا وزیا سەر، کۆمکوژی و قڕکەردەیشا سەرەرە سەپیا. دۆڵەت هەمان نزیکایەتیش جەدژو گەلی و کلتوورەکا تەرینە بەردەن ڕاوە. گەلوو کوردی کە ئی حەقیقەتەو دۆڵەتیش بە قوڵی هەست پنە کەردەن بە گرڏی چنی گرڏ و ئا گەلا کۆمکوژ کریێنێ و بە تایبەت وەراوەرو عەلەوییەکا هەڵوێس و پەشتیوانیێ بەهێز نیشان دریان.

ئی میتۆدو نکۆڵو، کۆمکوژییەی و قڕکارییە کە جە دژس گرڏ و گەلا سەپیان، وابەسە و زیهنیەتس دۆڵەت-نەتەوەی تاکپەرسا. ڕزگار و دمای ئاردەی پی تاریخو کۆمکوژی و قڕکەردەیە بە جەبار بەردە و تێگەو دۆڵەت-نەتەوەی یەکپەس مێ ئاراوە. ئیمکانو ئینەیچ بە دیموکراتیزەکەردەو  کۆمارین.

بانگەوازو 'ئاشتی و گلێرگە و دیموکراتیک'ـو ڕابەر ئاپۆی جە ڕوانگە و جەوهەرییۆ گەرەکشا دمای بە تاریخو قڕکەردەی و کۆمکوژی بارۆنە، سەر و بناغەو ئازادی و یەکسانی پەی گرڏ و گەلا ژیوایێ دیموکراتیک و واڵە و-برایەتی بنیات بنیۆ. ئێمەیچ ئینایمێ جا بڕوێنە گلێرگە و دیموکراتیکی بە هامپەیمانێتی گەلا و ئەوەکۆشای ڕێکوزتەی پێکمێ و بە ژیوایێ ئازادو دیموکراتیکی گنۆنە پراکتیکۆ کە ئاواتو گەلیا. ڕاسترین جوابدایۆ جە دژو ئی کۆمکوژیا سەر  و گەلا، پێکئاردە و ئی ئامانجە تاریخییەینە. پی  هەست و بڕوێ جارێوە تەر ئا کەسێ کە جە کۆمکوژی سێواسینە گیانشا جەدەسدا بە ڕێز و شکۆوە یاڏ مکەرمێوە."