بەگوێرەی ئەو زانیارییانەی دەست کەوتوون، سەرلەبەیانی ئەمڕۆ چوارشەممە لە ناوچەی هەریر لە هەولێر بە درۆن هێرشی کرایە سەر بنکەی سەربازی ئەمریکا. تا ئێستا هیچ ڕاگەیاندنێک سەبارەت بە هێرشەکە نەدراوە و هیچ کەسێک بەرپرسیارێتی هێرشەکەی لە ئەستۆ نەگرتووە.

فەرماندەیی ناوەندیی ئەمریکا (سێنتکۆم) لە بەیاننامەیەکدا ڕایگەیاند، لە هێرشی ڕۆژی سێشەممەی ڕابردوو بۆ سەر بنکەیەکیان لە ئەنبار، 8 سەرباز برینداربوون و ئەوانیش وەڵامی هێرشەکەیان داوەتەوە. سەرلەبەیانی ڕۆژی چوارشەممە، هێزەکانی ئەمریکا لە هێرشێکی ئاسمانیدا لە ناوچەی کورف ئەلساکرێ لە باشووری بەغدا، ٥ ئەندامی حیزبوڵایان کوشتووە.

بەگوێرەی دەسەڵاتدارانی سەربازی ئەمریکا، لە مانگی تشرینی یەکەمەوە تا ئێستا لانیکەم ٦٦ جار هێرش کراوەتە سەر هێزەکانی  ئەمریکا لە عێراق و سوریا و لە ئەنجامی ئەو هێرشانەشدا ٦٢ سەربازی ئەمریکی بە سوکی برینداربوونە.