سەرۆککۆماری کرواتیا زۆران میلانۆڤیچ کە رەخنەگری یەکێتی ئەوروپا و ناتۆ بوو و لەلایەن ئۆپۆزسیۆنەوە پشتیوانی لێدەکرا، بە گوێرەی ئەنجامە فەرمییەکان لە دەنگدانی گەڕی دووەمی هەڵبژاردنی سەرۆکایەتی کۆماردا توانی بە سەر کاندیدی پارتی پارێزگارانی دەسەڵاتدار سەربکەوێت و بۆ پێنج ساڵی دیکە ببێتەوە بە سەرۆککۆماری کرواتیا.

سەرۆککۆمار زۆران میلانۆڤیچ بەهۆی گوشارەکانی پارتی یەکێتی دیموکراتی کرواتیا کە پارتێکی راستگرە ناچارببوو دەست لە کاربکێشێتەوە، بەڵام لە هەڵبژاردنی ئەم دواییەدا بە رێژەیەکی بەرچاو دەنگەکانی بەدەستهێنا و سەرلەنوێ هەڵبژێردرایەوە.

بە گوێرەی ئەنجامە فەرمییەکانی جیاکردنەوەی لەسەدا ٩٠ی دەنگەکانی گەڕی دووەمی هەڵبژاردنی سەرۆکایەتی کۆماری کرواتیا زۆران میلانۆڤیچ لەسەدا ٧٤ی دەنگەکانی مسۆگەر کردووە. دراگان پریمۆراجی رکابەری لەسەدا ٢٦ی دەنگەکانی بەدەستهێنابوو.

میلانۆڤیچ دوای ئاشکرابوونی ئەنجامەکانی هەڵبژاردن ئەو سەرکەوتنەی بە نیشانەی متمانە و پشتیوانی دەنگدەران لە سیاسەتەکانی پێناسەکرد.