بە دەستگیرکەردەی ئەمینی و بابایی دەستگیرکرێکێ ٧٠ کەسێش دەرباز کەرد

جە وەرکەوتو کوردستانی دەستگیرکەردەی بەردەوامەن و جە ئی چوارچوەنە جە سنە و سەقز دوێ هاموڵاتیێ بە نامەکێ سیروان ئەمینی و بابەک بابایی دەستگیرێ کریێ و بە ئی جۆرە دەستگیرکرێکێ٧٠ کەسێش دەرباز کەرد.

جە وەراسان (وەرکەت)و کوردستانی نزیک بە یەرێ هەفتێ پەیاپەیەن، ژمارێوی فرێ چالاکوانێ سیاسیێ، مەدەنیێ و ژیوگەپارێزێ بە ئۆپەڕاسیۆنی ۋەرفراوان مەکریێنێ ئامانج و ئۆپەراسیۆنەکە تا بەئارۆ بەدەوامەن.
جە ئی چوارچوەنە جە سنە هاموڵاتی سیروان ئەمینی و جە سەقز هاموڵاتی بابەک بابایی بەهۆکاری نادیار دەستگیرێ کریێنێ و فاڕیێنێوە شۆنێوە نادیارە. 

بە دەستگیرکەردەی ئی دوە هاموڵاتییەیە، ئا کەسێ کە جە وەراسانو کودستانی دەستگیرێ کریێنێ، ژمارەشان  ٧٠ کەسێش دەرباز کەرد. زانیان دەستگیرکریاکێ نزیک بە نیمەشان ژەنیەنێ و فرێوشان چارەنویسشان بە ئارۆچ نادیارەن و کاربەدەستێ ئێرانی ئامادێنێ نییەنێ جە ئی بارەوە زانیاری بە کەسوکاری و پارێزەکانشان بڎانێ، یان لانی کەم هۆکارێ دەستگیرکەردەی و بێسەروشۆنکەردەیشان ئاشکرا بکەرانێ.