مامۆسا و چالاکە ئانیشا ئەسەدوڵاهیە کە زیڼانو ئێڤینو تارانینە زیڼانیەنە، بە بەهانۍ ئانەی سەپنای و جابەجێکەردەی سزاو جە قەنارەدایش شەرمەزارکەرڎەن، پەی ماوەو یەرۍ مانگا جە دیڎاری چنی بنەیانەکەیش بێبەشەکریا.
ۋەرو ئانەی دژو سزاو جە قەنارەدای ناڕەزایش بەربڕیەن، دەسەڵاتداراو ئێرانی پەی ماوەو یەرۍ مانگا دیڎارشا جە ئانیشا ئەسەدوڵاهیۍ قەڎەغەکەرڎەن.
فشارو کاربەدەسا ئێرانی سەرو زیڼانیا سیاسی، هاموڵاتیا، چالاکا و ژەنا بەردەواما. بە پاو میدیاکا ۋەرکۆتوو کورڎەسانی سزاو یەرۍ مانگا قەڎەغەو دیڎاریش سەرو زیڼانیۍ سیاسیۍ ئانیشا ئەسەدوڵاهیێرە چنی بنەیانەکەیش سەپنان.
ئەرەیاۋییان کە بەمەڵامەتوو ئانەی ئەسەدوڵاهییە دژو سەپنای سزاو جە قەنارەدای سەرو پەخشان عەزیزیۍ و شەریفە محەمەدیێرە ناڕەزایش بەربڕیەبۍ، ئا سزێشە سەرەرە سەپیێنە.
وەڵتەریچ ئەسەدوڵاهیە بەمەبەسوو شەرمەزارکەردەی جە قەنارەداو رەزا رەسایی، جە مانگەو ئابینە پەیوەندی تەلەفونیش چنی بنەیانەکەیش ڕەڎکەردەبێوە.
جە نیسانو ٢٠٢٣ێنە ئانیشا جە یانەو چالاکوانو سەندیکاو مامۆسا محەمەد حەبیبینە جە لایەنو هێزە ئەمنییەکاو ئێرانیوە باڵبەسە کریا و فاڕیاوە پەی گێرتەخانەو ئێڤینی. جە ٨و ئایارو هەمان ساڵێنە بە کەفالەت ئازاڎە کریێبۍ، دماتەر جە لایەنو لقو ٢٦و دادگاو شۆڕشیوە جە تاران بە سەرۆکایەتی دادوەر ئیمان ئەشرەفی بە تۆمەتەو "گلېرۆبیەی و پیلانگێڵنی" سزاو ٥ ساڵا و بە تۆمەتەو "پرۆپاگەنڎەی جە دژو دۆڵەتی" سزاو ٨ مانگا زیڼانیش سەرەرە سەپیابۍ.
