دماو هرووژمەکا ئیسرائیلی پەی سەرو پێگە و هێز و کەسایەتییەکا سەر بەدەسەڵاتو ئێرانی، جە چوارچێوەو هرووژم و ۋەرپەرچدایۆینە جە ١و ئۆکتۆبەرینە ئێران ١٨٠ موشەکۍ بالیستیێش ئاراسەو ئیسرائیلی کەرڎۍ.

دماو ئا ڕووەدایۆ گرژییەکۍ بەینو ئا دووە وڵاتەیە پڕێوە پەی قۆناغێوەتەری. بە پاو وەڵۍ وینیەکا چەمەڕا مکریۆ ئیسرائیل هرووژم بکەرۆ سەرو ئەرەمەرزیا نەوتی و ئەتۆمییەکا ئێرانی. بەڵام دماو ماوێوی ئیسرائیل بە ئەمریکایش ئەرەیاۋنا کە هرووژمەکاش پەی سەرو ئێرانی جە چوارچێوەو مەرامە سەروازی و هەواڵگرییەکانە سنووردار مکەرۆ.

چی سەرو بەڼنەنە جە هەواڵێوە کەناڵ ١٤و ئیسرائیلیینە ئاماژە پانەی کریان جە دماو هرووژمەکەو ئێرانی پەی سەرو یانەو نەتانیاهۆی سەرۆکوەزیرانی، ئیسرائیل مەرامەکۍ ۋێش پەی هرووژم و حەقکەردەیۆ فاڕێنۍ و دلۍ ئا مەرامە تازەیچەنە یانە و یاگۍ ئەرەنیشتەو ۋەرپەرسا پلەباڵاو ئێرانیش هەن.

جە هەواڵەکەنە ئاماژە پانەی کریان؛ پلانەو هرووژمەکەی وزیان ۋەردەمو دەسەڵاتدارا و یاگۍ دیاریکریای بۆ بە مەرامو هرووژمەکا. پلانەو هرووژمەکا بە پەنهانی مەنۆوە تا کاتو ئەنجامدای هرووژمەکەی. باسش چانەیچ کەرڎەن کە بە مەڵامەتو ئی پەرەئەسایە تازاوە ۋەرپەرسا تارانی نیگەرانێنۍ چانەی کە یۆ جە مەرامەکا یانەو مەنزڵو یاگۍ مەنەیۆ عەلی خامنەیی رابەڕی ئایینی ئا وڵاتەیە بۆ.