هەڵمەتەو "ئازاڎیی پەی عەبدوڵا ئۆجالانی، چارەسەری سیاسی پەی پەرسو کوردی" کە بە سەرمەشقی کەسایەتیە مېیاننەتەوەیییەکا جە ١٠و تشرینو یووەم و ٢٠٢٣ دەسش پنەکەرڎەن، داواش جە گرڎ لێوە کەرڎ بەشداری چالاکییەکاو ١ تا ١٠ تشرینو یووەم و ٢٠٢٤ ینە بکەرا.

سی پی تی جوابو نامەکاش دایمۍ

جە بەیاننامەکەنە باس جە چالاکیەکا ساڵەی ۋییەرڎۍ کریا و ئەرەیاۋییا، "هەوڵ و چالاکییەکێما یاوۍ پا ئاستیە کە سی پی تی جوابو نامەکاما بڎۆوە و چنیما کۆبیۆ، کە چاوەڵی هەنگامېوە پا جۆرە نەنریۍ بۍ."

١٥و ئایاری سی پی تی جوابو نامەکاما سەبارەت بە ئازادی عەبدوڵڵا ئۆجالانیش داوە و ئەرەیاۋناش کە جە نزیکۆ چەمڎاری ئاژەو ڕابەرو گەلوو کوردی و زیڼانیا تەری مکەرا. هەرپاسە چنی سی پی تی سەبارەت بە ئاژەو ڕابەرو گەلوو کورڎی عەبدوڵا ئۆجالانی گلېرۆبیەیۍ ئەنجامدریا.

نامێوە جە تەرەفو براوەکا خەڵاتو نۆبلیوە

جە بەیاننامەکەنە سەبارەت بە ساڵەی ۋییەرڎۍ ئامان تۆڕێوە مېیاننەتەوەیی جە پارێزنەرا، سەندیکا کرێکارییەکا، سیاسەتمەدارا، چالاکا، هونەرمەڼا، ڕێکوزیاکا ژەنا و جەمەو جوانا جە ئاستێوە ۋەرفراوانەنە دەسشا بە چالاکی و ئەرەکۊشای کەرد و ئاماژە پانەی کریا کە فرێوە جە کۆنفرانسە ڕۆنامەوانییەکا، گلێرۆبیەیەکا، چالاکیی ناڕەزایی و ئەرەنیشتەی، چالاکیی نیایرەو مێزۍ و سیمینارۍ لوۍ ڕاوە.

جە یوەم ساڵەو هەڵمەتەکێنە، ٦٩ کەسایەتیۍ براوۍ خەڵاتو نۆبلی نامەشا پەی سەرۆکو CPT کیاست. چی پڕۆسەنە مژارۍ فرە گرنگۍ سەرو کێشەو کوردی و ئاژەو زیڼانیا جە تورکیانە جە ئەرەیاۋنا مېیاندۆڵەتیەکانە وەڵۍ کریێوە.

بانگەوازو بەشداربیەی پەی چالاکییەکاو ١ تا ١٠و تشرینیو یووەمی

هەرپاسە جە بەیاننامەکەنە ئامان، "داخەم نمەشۆ کە سەرەڕاو کۆششەکاما نەتاواما دمایی بە گۆشەگیریی سەرو ڕابەر عەبدوڵا ئۆجالانی بارمۍ کە ماوەو ٣ ساڵا و نیمین جە تەرەفو دۆڵەتو تورکیایۆ وزیانە ئاژێوە نایاسایی و گۆشەگیرییۆ" جە درێژەو بەیاننامەکەینە ئاماژە پانەی کریان، "پۊکەی جە مابەینو ١پەی ١٠و تشرینو یووەمی، هامکات چنی نزیکبیەیۆ یوەمین ساڵوەگەڕو هەڵمەتەکێنە، جە ماڕای پیلانگێڵنی مېیاندۆڵەتی نزیکۍ بیمێوە، پۊکەی داوا جە گرڎ کەسی مکەرمۍ کە ئانەی ئینا تواناشانە عالتەر و زیاتەر بکەرا پەی سەرکۆتەی ئامانجەکاما."

هەرپاسە داوا جە گرڎ لێوە کریان کە چالاکییەکاشا جە چوارچێوەو کارە دیپلۆماسیەکانە بەرز بکەراوە و کتێبۍ و پارێزنامەکا عەبدوڵا ئۆجالانی زیاتەر بواناوە و پەی ماڕای گۆشەگیری دەس بە چالاکیی ۋەرفراوانتەری بکەرا.

عەبدوڵا ئۆجالان دەسبەردارو ئێمەنەبی، ئێمەیچ تا دما نەفەس خاوەنداریش ۋنە مکەرمۍ

جە دما دمایی بەیاننامەکەینە ئاماژە پانەیچ کریان، کە"ئینە جەنگێوە فکرییا و ئەگەر دەسبەردارێش نەبیمۍ گرڎما سەرۍ گنمۍ، عەبدوڵا ئۆجالان چارەکە سەڎێوەن کە دوورگێوەنە گۆشەگیر کریان و سەرەڕاو ئینەیچ دەسبەردارو گەلوو کوردی و مرۆڤایەتی نەبی، ئەرکۍ ئەخلاقی و مرۆییا و ئێمەیچ بە گرڎو قەوەتیماوە خاوەنداریش ۋنە مکەرمۍ."