بەدران حەمۊ ئەنڎامو دەستۋەڵێۋستەو ئازاڎیی پۍ ڕابەر ئاپۊی جە سوریانە، جە ئەوەڵو قسەکاشنە سەرەۋەشېش جە کەسوکارو قوربانېا بومەلەرزەکەی کەرڎو ھومێڎو زوو خاس بیەیۊیش پۍ زامڎارەکا ۋاست.

حەمۊ ئاماژەش پانەی کەرڎ، یۊ چا یاگا کە فرەتەرین زەرەرش ۋنەکۊتەن بە مەڵامەتو بومەلەرزەکەیۊ جە شارو عەفرینی مەنتېقەو جندرێسېن و ۋاتش:" مەنتېقەو جندرێسی بە ۋەڵېنگەی قەڎیمی ۋێش مشناسېۊۋە بەڵام ئەسەفەن ئېسە جندرێس بە ھەزاران زامڎارۍ و قوربانیۍ بومەلەرزەکەی و سەڎان کەسۍ چێرو دارو پەردوەکا مشناسېۊ. تا ئېسە حېچ ڕێکوزیێۋە مېان نەتەوەیی یاردەی جندرێسیش نەڎان، پۊکەی بێستا متاومۍ ۋاچمۍ، مەنتېقەو جندرێسی بېەن بە ھەڵەبجەی دوۋەم ئانەی ئەردۊغان کەرۊش حېچش جە تاۋانەکاو صەدام حسێنی کەمتەر نېا".

بەدران حەمۊ جە درێژەو قسەکاشنە باسش چانەی کەرڎ، بێڎەنگی ھێزە مېان نەتەۋەییەکاو ھامکاری نەکەرڎەو جندرێسی مەڵامەتش ھەن و ۋاتش:" یاگۍ شەرمی و حەیا شېەین، کە ھێزە مېان نەتۋەییەکۍ ھامکاری مەنتېقەو جندرێسېشا نەکەرڎەن. دۊڵەتو ترکېچ ڕا مەرۊنە ھامکاریەکۍ بریا پۍ جندرێسی و ئانەیچ مەڵامەتەکەشا، چونکی دۊڵەتو ترکی گەرەکشا تاۋانە و کردەوەکاش بشارۊۋە. چونکی ئەگەر ڕێکوزیا مېان نەتەۋەییەکۍ بلا پۍ عەفرینی، تاۋانەکۍ دۊڵەتو ترکېەی بە گرڎ ڕاسیەکاۋە ئاشکرۍ بانە. دۊڵەتو ترکی نېازش ھەن دیمۊگرافیاومەنتېقەکەی فاڕۊ".

 بەدران حەمۊ ئەنڎامو دەستۋەڵێۋستەو ئازاڎیی پۍ ڕابەر ئاپۊی جە سوریانە جە دما دمایی قسەکاشنە داواش جە نەتەۋەو عەرەبی کەرڎ، کە ۋەڵتەر چا بېێنۍ و دماتەریچ بە مەڵامەتو ئەرەگېری عەفرینېۊ لۋێنۍ ئا مەنتېقە، نە گنانە چێرو تەئسېراتو کێڵەکاو دۊڵەتو ترکېەی و ۋاتش؛" دۊڵەتو ترکی گەرەکشا دوژمنایەتی جە مابەینو کورڎی و عەرەبېنە ۋەش کەرۊ. چونکە گەلو کورڎی و عەرەبی جە قەڎیمۊن چی مەنتېقەنە مژیۋا، پۊکەی مەبۊ دوژمنایەتی جە بەینو کورڎی و عەرەبېنە ۋەش بۊنە".

ھ.ش