بەشدارا گێڵای ئازاڎیی جە هایدێلبێرگەنە مەراسیمێوەشا پۍ یاڎکەردەیۆ گەشمەرڎا سازکەرد
ئا گەنجۍ جە چوارچێوەو "گێڵای ئازاڎیی''نە جە مانهایمۆ کۊتێنۍ ڕا، یاوۍ هایدێلبێرگ و چا مەراسیمێوە یاڎکەردەیۊیشا سازکەرد.
ڕۊو یووەم و چالاکی "گێڵای ئازاڎیی" دماو بڕیەی ١٥ کیلۆمەترا دمایش پنە ئاما.
سەڎان گەنجۍ بەشداریشا جە چالاکیەکەنە کەرد. جە چالاکیەکەنە پۊسکارتۍ پۍ رابەروو گەلوو کوردی عەبدووڵا ئۆجالانی کیانیۍ.
جە هایدێلبێرگەنە مەراسیمێوە یاڎکەردەیۆ پۍ گەشمەرڎا ئاخێزوو کوردسانی سازکریا.
جەمەراسیمەکەنە جە تەرەفوو هاموتەواچا دەزگاو بنەیانەو گەشمەرڎا (کۆماو)یۆ ئەرەیاۋیا، "مشۊم گەنجا پەی ئازاڎیی عەبدوڵا ئۆجالانی کۊشیانە. ئێمە ژیۋایۍ بێ رابەر ئاپۆی قبوڵ مەکەرمۍ. داوا جە گەلوو کوردی گەنجاو کوردی کەرمۍ کە بەشداری جە ڕاپیمای گۆرەو ١٧و شوباتینە کەرا کە جە کۆڵنەنە ئەنجام مڎریۆ".
هەر جە مەراسیمەکەنە ژمارێوە جە کەسوکاروو گەشمەرڎا کۊشیای ئازاڎیی کوردسانی قسێشا کەردۍ و پابەندبیەی ۋێشا بە درێژەدای بە کۊشیای و مدرامانی تا ئامای دی وەرم و ئامانجوو گەشمەرڎا واوەی کەردۆ.
هاموەخت بە نامۍ تێکۆژنیۆ ئەرەیاۋنێوە ۋنیاوە و چنەشەنە داوا جە گەنجا کریا کە بەشداری کاراشا جە خەباتی پەی دەسەبەرکەردەی و مسۆگەرکەردەی ئازاڎیی جەستەیی رابەروو گەلوو کوردی عەبدوڵا ئۆجالانی بۆ و چا چوارچێوەنە دەوروو سەرمەشقی گێڵنا.
دماو وتارەکا بەڵگەفیلمێوە سەروو ژیۋای و کەسایەتی رۆناهیۍ و بێریڤانۍ نمایشکریا کە ساڵەو ١٩٩٤ جە دژوو پیلانگێڵنیی میان نەتەوەیی و قەڎەغەکەردەی نەورۆزی و چالاکییەکاو کوردی جە ئەڵمانیانە، شاروو مانهایمیەنە ئاێرشا جە جەسڎەیشا ۋەردابۍ.
