داواو ئازاڎکەردەی زینانیی نەوەشی؛ موحەمەد ئەمین چامی مەکریۆ
بە مەبەسو ئازاڎکەردەی موحەمەد ئەمین چامی کە جە تەمەنو ٧٣ ساڵینە دەسو نەوەشیۍ سەختیۆ مناڵنۊ و جە گێرتەخانەو ئێلحینە زینانیا، سەر ۋنەو داوکارو گرڎیی ئێلحی دریا و داواو ئازاڎکەردەیش کریا.
موحەمەد چام جە ١٦و نیسانینە بە مەڵامەتو نەوەشی دڵیوە ڕەوانەو خەسەخانەی کریا، بەڵام بێ ئانەی چارەسەری پەنەوازا هۊرگێرۆ جە ٢٢ۍ نیسانینە جارێوەتەر گێڵناشاوە پەی گێرتەخانەی.
نەزاحەت جەلەن پارێزنەرو موحەمەد چامی جە ٩و حوزەیرانینە سەرشا ۋنەو داواکارو گرڎیی ئێلحی دا و داواش کەرڎە جابەجێ کەردەی سزادای نامبریای دماوزیۆ. جە داواکارییەکەنە ئەرەیاۋېیا جە چوارچێوەو پاکێجو دەیەمو دادوەریینە، پەنەوازا بریکارەکەش ئازاڎ بکریۆ، پا مەڵامەتەی کە پەنەوازش بە چەمڎاریا و بەتەنیا نمەتاوۆ ژیۋای ڕایی بکەرۆ.
باس چانەیچ کریا کە چام دماو ئانەی عەمەلیاتو دڵیش پەی کریان، دووۍ جە دەمارەکا دڵیش گیریێنۍ، بەمەڵامەتوتەمەنیۆ نمەتاویۆ عەمەلیاتی دووەمش پەی ئەنجام بڎریۆ و دەسو ئا گرفتەیۆ مناڵنۆ.
پارێزنەر نەزاهەت جەلەن ئاماژەش بە چڼین نەوەشیا تەرۍ موحەمەد چامی کەرد و ئەرەیاۋناش، هەمیشە ڕەوانەو خەسەخانەی مەکریۆ و زیاتەر مەنەیۆیش جە زینانەنە، تەرسی سەرو ژیۋایش وەش مکەرۆ.
