پەکەکە بە بینای کۆنگرەو ١٢ـەمینو ۋێش جە ١٢و ئایارینە قەرارو دمایئاردەیش بە گرڎو ئا هەرمانو کۊششا ئارڎ کە چېرو نامۍ پەکەکەینە کریانە، پینەیچ گرڎو سەرنجەکا لوۍ سەرو دۊڵەتی پەی ئانەی هەنگامەی یاساییە بنیۆ پەی پرۆسەکەی. حەرچنە پاکێجو دەیەمو دادوەری بە جەمۍ سەرنجێوە وەڵۍ جەژنەو قوربانینە ئاماڎەکریا، بەڵام نەبی بە جوابۍ پەی چەمەڕاییەکا. پۊکەی ئەرەیاۋېیا ئا مژارە جیامەنۆ پەی مانگۊو ئەیلوولی. جە ڕێکوستەی و ئامادەکەردەی پاکێجی دەیەمینە بە هیچ جۆرێ پێشنیارەکۍ پارتە ئۆپۆزسیۆنەکا و سەرو گرڎیۆ پێشنیارو دەم پارتی ۋەرچەم نەگیریا.

بە ئیساتێچۆ حیچ هەموارکەردەیۊیۍ و ڕاسکەردەیۊیۍ پېوەس بە هەلومەرجەکا ئازادیی بەڎەنی ڕابەر ئاپۆیۆ نەدریان، جە کاتێنە پەکەکە جە ئەرەیاۋناو کۆنگرەو ١٢ـەمینینە جەختش سەرو ئی مژاریە کەردەنۆ و دەسنیشانش کەردەن. جگە جە دیدارو بنەیانەی جە ئیمراڵی کە جە جەژنۊو قوربانینە ئەنجام دریا، هەڵای دیار نییا پەی سەرپاوستەو پرۆسەکەی هەرمانێوە جیاواز و کاریگەرە ئینا ئارانە یان نا، دیداری تازەی پېوەس بە پرۆسەکەیۆ جە ئیمراڵینە ئەنجام مڎریۆ یاخود نا!

مافو هیوای و کاتە دیاریکریاکەش

پېوەس بە ئازادی بەڎەنی ڕابەر ئاپۆی کۆمیتەو وەزیرا کۆنسەو ئۊروپای جە ١٧-١٨و ئەیلوولو ٢٠٢٤ی قەرارو 'مافو هیوا'یش وست رۆژەڤو ۋێشۆ. پەی جابەجێ کەردەی ئی قەرارەیچە ماوەو ساڵێوە کاتش دا بە تورکیای. ئی کاتە دیاریکریایچە جە ئەیلوولو ٢٠٢٥ینە واتا دماو یەرۍ مانگا تەری تەمامیۆ.