واتەواچەو پارتو یەکسانی و دیموکراسیی گەلا (دەم پارتی) ئایشەگوڵ دۆغانە جە مېیانو پارتەکەیشەنە کۆنگرێوە ڕۆنامەنوویسیش بینا. ئەرەیاۋناش پېسە دەم پارتی ئاماڎەکاریی مەکەرا پەی سەرۋنەدای ئیمڕاڵی، تەئکیدش کەرڎۆ کە ڕابەر ئاپۆ گەرەکشا چەمش بە مەزڵوم عەبدی و مەسعود بارزانی و نێچیرڤان بارزانی و بافڵ تاڵەبانی و قوباد تاڵەبانی گنۆ.

پرسو کوردی تەنیا پرسو کوردەکا نییا

ئایشەگوڵ دۆغان ئەرەیاۋناش پرسو کوردی تەنیا پرسو کوردەکا نییا، ئاڎۍ ئامادەکاریی مکەرا پەی چارەسەری پرسو کوردی، تەئکیدش کەردۆ کە ئا پارتە ئۆپۆزسیۆنۍ کە چنیشا کوۍ بیێنێوە داواو پەیوەندیی ڕاسەوخۆ و شەفافییەتو مژارەکاشا کەردەن.

گلېرۊبیەکۍ بەردەوامۍ با

ئایشەگوڵ دۆغانە ئەرەیاۋناش قەرارا چنی ئاکەپە و مەهەپەیچ گلېرۍ باوە و گلېرۊبیەکۍ بەردەوامۍ با، تەئکیدش کەردۆ، نەک تەنیا چنی ئا پارتا کە نوێنەرشا جە پەرلەمانەنە هەن، بەڵکم چنی ئا پارتایچە کە نوێنەرشا جە پەرلەمانەنە نییا درێژە بە گلېرۊبیەکا مڎا.

ئاماڎەکاری پەی سەرۋنەدای ئیمراڵی

ئایشەگوڵ دۆغانە ئەرەیاۋناش پېسە دەم پارتی ئامادەکاریی مەکەرا پەی لوای ئیمراڵی، پلانەشا هەنە جە نزیکتەرین کاتەنە سەرۋنەو دوورگەو ئیمراڵی بڎا. واتش: "بە شاندێوە کە پێکمۍ جە هامسەرۆکا و ئەنداماو ڕاوەبەری مېیانو پارتەکەیما ملمۍ ئیمراڵی. ئاماڎەکاریی مەکەرمۍ پەی دیدار و ڕاوێژی ڕاسەوخۆی چنی ئېژا ئۆجالانی، تاوەکو چی قۆناغەیە بیاومېنە و بەهێزتەر ۋێما ڕێکوزمۍ. پېسە شاندو دەم پارتی جە نزیکتەرین کاتەنە سەرش ۋنە مڎەیمۍ. ئەگەرش فرەن ئېژا ئۆجالان چی ڕوانە چنی نوێنەرو پارتە سیاسییە جیاوازەکا گلېربۆوە".

گەرەکشا چەمش بە عەبدی و بارزانی و تاڵەبانی گنۆ

ئایشەگوڵ دۆغانە واتش: "کاتێ تەماشەو سەنگ و ۋەرفراوانی پرسەکەی مەکەرمۍ، بڕواما چامنەن پەی ئېژا ئۆجالانێ بە ئیسفاڎەن کە چەمش بە ئېژا مەسعود بارزانی و ئېژا نێچیرڤان بارزانی و ئېژا مەزڵوم عەبدی و ئېژا قوباد و بافڵ تاڵەبانی گنۆ. ئێمە مزانمۍ کە ئاڎ گەرەکشا ئی دیدارا ئەنجام بڎۆ. گەرەکمانە ئینەی بە ڕای گرڎیی ئەرەیاۋنمۍ، ئینە داواو ئېژا ئۆجالانیا. پەیلوایما چامنەن کە ئینە بە ئیسفاڎەن. لاو ئاڎیۆ گرنگا کە چنی سەرۆکو پارتە سیاسییە جیاوازەکا و کەسایەتییە گرنگەکا گلېربۆوە. ئینە پەنەوازا پەی پرۆسەو ئایندەی".