دەسەو ڕاوەبەری ناوەندیی پارتو یەکسانی و دیموکراسیی گەلا (دەم پارتی) هرووژمی نەژاڎپەرسی و ڕەگەزپەرسی دژو هامسەرۆکەو گرڎینۍ تولای حاتەم ئۆغۆللاریێش بە ئەرەیاۋنێوە نویسیا شەرمەزار کەرد.

جە ئەرەیاۋناکەینە ماچۆ: "پەیامو هامسەرۆکەکێما تولای حاتەم ئۆغۆللاریۍ جە مەبەسەکەیش دوروزیانۆ و چەواشەکارانە بەکاربریان. ئی هەڵمەتەو سیاوکەردەیە سەرو دیجیتاڵ میدیایۆ دەسش پنە کەردەن، بەشێوەن جە شەپۆلەو هرووژمی نەژاڎپەرسی و تاریکی و نامەردی.

هامسەرۆکەکێما بەمەڵامەتوو ئشناسنامەی عەرەبی-ۆ ڕووبەڕوو هرووژمی نەژادپەرسی بۆوە، هەرپاسە بەمەڵامەتوو ئشناسنامەو ژەنێوە ڕووبەڕوو هرووژمی ڕەگەزپەرسی مەبۆوە. ئێمە ڕێکوزا ئی هرووژما عال مشناسمۍ، جە ڕاو هەژماری ساختەیۆ گەرەکشانە هرووژم بکەرا سەرو ئشناسنامەو ئەرەکۊشای هامبەش و یۆگێرتەو دەم پارتی. ڕا نمەڎەیمۍ ئی کارە نەژاڎپەرسی و ڕەگەزپەرسیۍ پەلیانە ساختەکۍ وەڵاش مکەراوە، زەرەر بە دەم پارتی بیاونا".

دەم پارتی جەخت مکەرۆوە تولای حاتەم ئۆغۆللارییە بە تەمامو ژیۋایشۆ پەشتیوانەو ئەرەکۊشای گەلوو کوردی بیێنە، ئانۍ کە ئی هەوڵە نەژاڎپەرستییا مڎا با تەماشەو میراتو ئەرەکۆشای و تاریخو مڎرامانوو پارتەکەیشا بکەرا.