نوسینگەو ئەرەیاۋنای دەم پارتی پېوەس بە ئاژەی دماینو تەندرووسی، ئەندامو شاندو ئیمراڵیی دەم پارتی، سری سورەیا ئۆندەر، کە بە مەڵامەتو سەکتەو دڵیوە جە شەوەو ١٥و شوباتیۆ جە خەسەخانەنە ئینا چېرو چەمڎاری چڕی پزیشکینە، ئەرەیاۋنېوە نویسیاش وەڵا کەرڎۆ.

جە ئەرەیاۋناکەینە ئامان: "بە پاو ئا زانیاریا کە دکتۆرەکۍ دێنێشا، ئاژەو تەندرووسی ئۆندەری جېگیرا و چارەسەرکەردەی بەردەواما." هەرپاسە ئاماژەیچ پانەی کریان سەرداۋنەدای کەسایەیتییەکا پەی ئەحواڵپەرسای ئاژەو ئۆندەری چ بە ئامایش پەی خەسەخانەی چ جە ڕاو پەیام و تەلەفوونیوە بەردەواما.

هەر جە ئەرەیاۋناکەینە دەسنیشان کریان، پەی کەمکەردەیۆ فشارەکا سەرو خەسەخانەی، گرڎو مېیان و ڕێکوستەکا دەم پارتی ئاماڎۍ کریێنۍ پەی خێرامای جە سەردای و ئەحواڵپەرسایەکا جە ئاژەو تەندرووسی سری سورەیا ئۆندەری و بە هەزاران کەسۍ سەرشا ۋنەدان.