دېەن دارا ، عومرێۋی زارۊڵەو بەھرەمەنڎێۋی گۊرۍ
دېەن دارا خولېاو ھەرمانۍ دەسېێش ھەن بە ھەمە ڕەنگی ھەرمانەکاش و بەھرەمەنڎېەکەېش ، سەرنجێوی فرەش کێشتەن لا ۋێشەرە .
ھەڵەبجە ، پێشانگاو ساڵانەو مەکتەبەکا جە شارو ھەڵەبجەی لواڕاۋە ، چنڎېن زارۊڵۍ بە ھەرمانەی نۊعاو نۊعە پێسە ھەرمانۍ " دەسی ، ھونەرو ۋێنەکێشتەی ، گۊرانی واتەی ، نماېشکەرڎەو شانۊگەری " بەشدارېشا کەرڎ ، ۋەلێم چی پێشانگانە کناچێۋە ١٠ ساڵانە وېنەرۍ فرەش جە ھەرمانەکاو ۋێش گلێرکەرڎۊو مامۊساو خۊنکارۍ سەرنجەو ھەرمانەکاشا دا .
ئا زارۊڵە نامێش دېەن دارانە و عمرش ١٠ ساڵێن ، خۊنکارەو پۊل و پەنجەمی سەرەتاېنە وردبېەېۊ جە ھەرمانەکاشنە پاسەش کەرڎەن کە جە پێشانگاکەنە وېنەرۍ فرەش بۊ .
بەنازمەحموود ، ئەڎاو دېەنۍ باسش چانەی کەرڎ کە گرڎو زارۊڵەکاش ئا بەھرەشا چنە بېەن ، ۋەلێم ۋەرو ئەرک و ۋەناکەېشا نەتاۋانشا ۋەردەوامۍ با ، جە بارەو دېەنێوە واتش " دېېەنە ۋەرو ئارەزویش پۍ ھەرمانەکێس و ھەرمانە دەسېەکاش گرڎو پێویسېەکاش پۍ سانمۍ و پارێزنمێشا ، ۋەرو ئانەی نەمەڕېاو نەفەوتېا ، ئەرک و سەروشانامانە کە زارۊڵاکاما بە خاستەرېن شێۋە پەروەردەکەرمۍ و تاومۍ بېاونمێشا بە مراڎو وێشاو دماڕۊشا ڕۊشن کەرمۍ .
دېەن دارا باس جە ھەرمانەکاش کەرۊ کە حەزێۋە فرەش ھەن پێش و ماچۊ ؛ حەزم بە ھەرمانەو دەسېنە، فرەتەر ھەرمانەو ھەمېری ڕەنگاو ڕەنگی کەرونە ، ۋەردەوامەبوو سەرش چونکې حەزێۋە فرەم پێش ھەن ، ھېواڎارەنا بتاوو ۋەردەوامە بوو .
زارۊڵۍ نەوەو دما ڕۊېنۍ بە گرنگی دای پنەشا جە گرڎو کاېەکاو ژېاېنە ، کرېۊ پەشتېشا پنە بەسېۊ نەوێۋە وەرھەمدار ۋەش کەرمۍ .
ھ.ئ
