دەسوەڵێوزیەکە ئاماژەش پانەیە کەرڎەن کە، هەرچڼە بەڵگۍ فرۍ هەنۍ کە ناگیهان ئاکارسەلە جە لایەنو دەسەڵاتدارا دۆڵەتو تورکیوە تیرۆرەکریێنە، بەڵام بکوژەکۍ دادگایی نەکریێنۍ و ناڕەزایی ۋێش نیشانەدا.
دەسوەڵێوزی دادپەروەری مېیاننەتەوەیی پەی ناگیهان ئەکارسەلۍ بەیاننامێوەش سەبارەت بە دۆسیەی وزیارەو ڕۆنامەنوویسە، ئاکادیمیستە و چالاکەو مافەکا ژەنا ناگیهان ئاکارسەلۍ کە دووۍ ساڵۍ چێوەڵی جە لایەنو دۆڵەتو ئەرەگیرو تورکیوە شارو سلێمانینە تیرۆرەکریا، وەڵا کەرڎۆ. دەسوەڵێوزیەکە بە ئاماژەدای پانەی کە هەرچڼە بەڵگۍ فرۍ هەنۍ سەرو ئانەی ناگیهان ئاکارسەلە جە لایەنو ۋەرپەرسا دۆڵەتو تورکیوە تیرۆرە کریێنە، بەڵام تەنیا ئیسماعیل ڕاسم ڕەفعەت پەکەر بە تاوانبار نریانەرە، دەسوەڵێوزیەکە ئانەیچش وستەن ڕووە کە نەک هەر هیچ کۆشش و ڕاگیریۍ جە کوشتەی نەکریان، بەڵکم تا ئیساتۍ هیچ ڕاوجایۍ یاسایی ۋەرا ۋەر بە بکۆژەکا و هامکاراشا نەگیریان ۋەر.
دەسوەڵێوزی مېیاننەتەوەیی “دادپەروەیی پەی ناگیهان ئاکارسەلۍ” جە ئەرەیاۋنێوەنە بانگەوازشا جە ئەنجوومەنو ئۊرووپای و نەتەوەیۆگێرتەکا کەرد، ڕا جە پاشێلکەردەی یاسا مېیاندۆڵەتییەکا بگێرا کە جە لایەنو دۆڵەتو تورکیایۆ مکریا.
جە بانگەوازییەکەنە ئامان: سەرەڕاو ئانەی کە بکوژو ناگیهان ئاکارسەلۍ، ئیسماعیل ڕەسیم ڕەفعەت پەکەر کە هاموڵاتیۍ تورکیاین، سزاو جە قەنارەدایش سەرەرە سەپیان، بەڵام ئی سزۍ پەی ڕای گرڎینی و پەی بنەیانەی و کەسوکارو ناگیهان ئاکارسەلۍ نە ئەرەیاۋییان.
هەرپاسە جە ئەرەیاۋناکەینە پەی ناگیهان ئاکارسەلۍ و گرڎو ئا ژەنا کە بە دەسو دۆڵەتو ئەرەگیرو تورکی تیرۆرۍ کریێنۍ بانگەوازیی پەی دادپەروەریی کریا و داوا کریا کە تاوانەکۍ دۆڵەتو ئەرەگیرو تورکی بێ سزا نەمەناوە، ڕاوجای دەموودەس و کاریگەر بگێرانە ۋەر.
جە ئەرەیاۋناکەو دەسوەڵێوزی مېیاننەتەوەیینە ئاماژە پانەی کریان کە تورکیا واز جە سیاسەتە ئەرەگیریەکاشا و تیرۆری سیستماتیکی دژ بە گەلا ئەرەنیشتەو گرڎو ناوچەکا کورڎەسانی و داکۆکیکاراو مافەکا ژەنا بەتایبەتی جە خاکو عێراقی و سەرنیشت و ۋەرکۆتوو سوریای بارۆنە.
جە دمادمایی ئەرەیاۋناکەینە دەسوەڵێوزی مېیاننەتەوەیی داوا مکەرۆ کە بەمەڵامەتوو تاوانەو جەنگی و تاوانە دژوو مرۆڤایەتی بەتایبەتی کۆمکوژی و ژەنکوژی پەنەوازا ئەردۆغان و حکومەتو ئاکەپە- مەهەپەی بە پاو یاسا مېیاننەتەوەییەکا رووبەڕوو ۋنەپەرسایۆ و دادگاییکەردەی بکریاوە.
