هامسەرۆکو ئەنجوومەنو گەلوو کانتۆنی عەفرینی-شەهبا موشیرە مەنلی ڕەشیدە پەی ئاژانسو هەواڵو فوراتی (ANF) قسێش کەردەو، باسش جە پڕۆژەو ئیدارەو وێڕاوبەری کە جە ٢٠١٤ جە عەفرین مەرزیارە کەرد و دۆخو گەلوو عەفرینیش جە سەردەمو ئیدارەو وێڕاوەبەرینە هورسەنگنا و ئاماژەش پانەیەکەرد کە ئی سیستەمە پەی بەرژەندی دۆڵەتو تورکی نەبێ، جە ٢٠و کانوونو دووەمی ٢٠١٨نە هرووژمش کەرد سەرو هەرێمو عەفرینی، بەڵام گەلوو عەفرینی تامو ئازادی مزانۆنە و جە وەروەرو ئا هرووژمانە داستانی تاریخیش نویستۆ.

هامسەرۆکەو ئەنجوومەنو گەلوو کانتۆنی عەفرینی-شەهبای موشیرە مەنلی ڕەشیدە جە سەرەتاو قسەکاشەنە گرڏو گەشمەرڏا مڏرامانی سەردەمی، جە ساڵڕۆو هرووژمەکا دۆڵەتو تورکی سەرو عەفرینی تاوەکو ئیسە یاڏکەردێوە و سڵامش جە مڏرامانو گەلی کەرد کە ئارۆ جە بەنداو تشرینینە بەراش ڕاوە و واتش: "ئی هرووژمێ جە ٢٠و کانوونو دووەمی ٢٠١٨نە جە وەراوەرو هەرێمو عەفرینینە دەسش پنەکەرد، جە ئەنجامو ڕێکەوتەو یەرێ لایەنانە بێ. هەرپاسە متاومێنە واچمێ کە پلانگێڵی مییاننەتەوەیی جە عەفرینەنە ئەنجام دریا. ئا ڕوەی دووژمن گەرەکش بێ عەفرینی ئەرەگیر بکەرۆ و تاریکیش بکەرۆنە، جە وەراوەرەنە مڏرامانێوە بە‌هێزش وینا. چونکە کاتێ ئیدارەو وێڕاوەبەری جە ئاستو وەرنیشتوو کوردەسانی و بە تایبەت جە عەفرین ئەرەمەرزیا، مافو گرڏو گەلا پارێزیا و سیستەمو وێڕاوەبەری گەلی ئەرەمەرزیارە. ئی پڕۆژە جە لایەنو ڕابەر عەبدوڵا ئۆجالانیۆ پێشکەشکریا. ئا کێشێ کە گلێرگەکێ هەنشا جەدەسەڵاتۆ سەرچەمەش گێرتەن چونکە گلێرکە بە قازانجو وێش بەکارش مارۆنە و بێ دەورشا مکەرۆنە، ئینێ مەڵامەتو وەشبییەو ئی پڕۆژەیە بێنێ".

واتیشش: "دلێ پڕۆژەو نەتەوەیی دیموکراتیکینە کاتێ گرڏو هەرێمەکێ سووریای بە گرژیێ قورس ویەرانە، گرڏو گەلان لوێ بەرەو عەفرین. هەرچنە کە جە دەستپێکو شۆڕشو ١٩ی تەمموزیۆ گروپە چەکدارەکێ هرووژمشاکەرد سەرو عەفرینی، بەڵام جە وەراوەرەنە گەل ئەرەپڕا و جە ئەرکو پارێزناو وڵاتەکەییشەنە دەورێ گۆرەو ڕابەرش گێڵنا. کاتێ جە گرڏو سووریاینە کێشێ و سەختیێ بێنێ، گەلوو عەفرینی وەرگری جە خاکو وێش کەرێ، سیستەمو دیموکراتیکی فراوان کەرێ. کاتێ گەل ویناش هرووژم کریۆنە سەرو هەرێمەکەی، گرڏ کەسێ، جە جوانۆ تاوەکو تەمەندار، چەکشا هورگێرت و وەرگریشا جە سنوورو وێشا کەرد".

جە درێژەو قسەکاشەنە موشیرە باسش جە هرووژمەکێ دۆڵەتو تورکی پەی سەرو عەفرینی کەرد و واتش: "چونکە بێدەنگی مییاننەتەوەیی بێ، دۆڵەتو تورکی هرووژمێ قورسێش جە هەرێمەکەنە ئەنجام دێ. جە وەراوەرەنە بە سەرمەشقایەتی ژەنا ٥٨ ڕوێ مڏرامان بەردەوام بێ. بنەماو ئا مڏرامانەیە جە وێ بەڕێکوستەو ژەنا بێ جە دەستپێکو شۆڕشینە. جارێوە تەر وێشا بە رێکوستەی کەردو پەی پارێزناو بەها و وڵاتەکەیشا پاڵو جەنگاوەرا یەپەگەی و یەپەژەی یاگێشا گێرتە. ئا هرووژمێ کە سەرو عەفرینی ئەنجامدریێنێ هرووژمێ دڕندانێ بێنێ، ژمارێوە فرە گەلوو مەدەنی گەشمەرڏێ بیێ. ئی مڏرامانە بنەماکێش جە ئەرەمەرزنارەو سیستەمەکەیۆ هورگێرتەبێ، خاڵێوە فرە گرنگو وێ ڕێکوستەی بێ کە سرەو فکر و فەلسەفەو ڕابەر ئاپۆی وەڵێ کەوت. متاومێنە واچمێنە ئی جەنگە جە وەراوەرو فەلسەفەو ڕابەر ئاپۆی بێ".

موشیرە ئاماژەش پانەیە کەرد پەی ئانەی مڏرامانی سەردەم بەرزتەر کەرمێنە، لوایمێ قۆناغی دووەم و واتش: "٥٨ ڕوێن مڏرامانێوە بێ هامتا لوا ڕاوە. بەڵام وەرو ئانەی کە گەرەکشا بێ گەلوو عەفرینی ڕاستەوخۆ کۆمکووژێ بکەرا، ئیدارەی وێڕاوەبەری کانتۆنی عەفرینی پەی ئانەی گەلی جە کۆمکووژی پارێزنا، قەرارشا دا گەل بلۆنە قۆناغی دووەم و بلانە هەرێمو شەهبای.

قورسی جە کەمپەکانە فرە بێ، چونکە جە لێوەنە ڕژێمو ئەسەدی هەرێمو شەهبای گەمارۆ دێ و لێوە تەرۆ لاو چەتەکێ دۆڵەتو تورکی گەمارۆ دریابێ. فرەو جاری پەنەوازییەکێ ژیوای خەڵکو عەفرینی دابین نەکریێنێ. گەل وەرو سەردا و زمسانی پەی ئانەی گێڵۆوە عەفرین ٧ ساڵێن ئینا مڏرامانەنە".

جە دماین و قسەکاشەنە موشیرە مەنلیە باسش جە پڕۆسەو فاڕاو دۆخو سووریای و کاریگەرییەکێش سەرو هەرێمو شەهبای و کۆچبەرا گەلوو عەفرینی بەرەو کانتۆنو فوراتی و جزیرەی کەرد و واتش: "جی دامییانە جە سووریا و تەمامو وەرکەوتوو مییامینی بییەیمێ بە گەواهیدەرو فاڕیایێ گۆرە. یۆ جانیشا هەرێمو شەهبای بێ. وەرو ئانەی گرڏو هەرێمەکەی گەمارۆدریا بێ، پەی ئانەی جارێوە تەر ڕاستەوخۆ کۆمکووژی نەکریۆ، کۆچبەربییەو دووەمی دەسش پنەکەرد. چی کۆچبەربییەینە قوربانیێ قورسێ دریێ، بەڵام قوربانی ئازادی قورسا. جە وەراوەرو دووژمنێوە دڕندە و سیاسەتێوە پیسی، مشۆم مڏرامان کەرمێنە.

ئارۆ گەلا جە هەرێمو فورات و جزیرە، پەی ئانەی کە شایەن بە بەهاو گەشمەرڏا و فەلسەفەو ڕابەر ئاپۆی بانە و گێڵایۆ پەی عەفرینی جە گرڏ یاگێنە مڏرامان مکەرا".