جە ۋېیەرڎەنە ئەزمۇنگەریی دەرمانەکا ڕاچارەو نەوەشییەکاش دەسنیشانکەرڎەن و کەرەسۍ ئەزمۇنگەرییش چېۋە سرۇشتییەکۍ د‌ۆروبەرو مرۊۋەکا بېینۍ.

منیچ پېسەو کەسېۋی کە ساڵـۊ ٢٠١١ تۇشۇ گەڎە-کزۍ یان "دڵەکزۍ" بېیەنا، ماۋېۋ پېسەو فرەو نەوەشا دەرمانۍ کېمیایۍ تاقیکەرڎېنێ و سەرەنجام ھیچ؛ مشیۊ سەراپاو تەمەنی (pantoprazole ) بوەری و ڕۋېۋ دۋۍ جارۍ، سەبای و ۋېرەگا ۋەڵۍ نېم سات ۋەڵۍ وارڎەی.

ئانە پەی من کە کەسېۋی دژە-دەرمانی کیماییەنا و بەڕادەی کەم زیانەکا دەرمانی کیمیایی مزانۇ، شېیاو ۋەرگەگېرتەی و پەیڕەۋیی نەبۍ.

سەرەنجام گېڵانێ پەی لاو چارەسەرە کـۊنەکا ئا نەوەشییەیە و دۋۍ چارەسەېم تاقیکەرڎێ:

یەکەم : پەرداخېۋ ماس و کەمېۋ ئاۋ‌ۊ لیمـۊی تازەی ۋەڵۍ وتەی، بە تېکەڵکەرڎەی و وارڎەیش بەبۍ نان.

دوەم: ئەۋەوارڎەی ئاۋۊ پەرداخ یان جامـۊڵەی مسینی، سەبایەنە دماو شېش ساتا (ساعەتا) ئەۋەمەنەی ئاۋەکۍ دلۍ پەرداخ یان جامـۊڵە یان تەرمـۊزەکېنە.

ھەر دۋە دەرمانەکە کارایی وېشا ھەن و بە نەمەنەی گەڎە-کزۍ کـۊمەککەرا. بەڵام پېسەو چارەسەری بنەڕەتیی و ھەمیشەیی، کە ھیچ زېیانېۋش نەبـۊ، ئاۋۊ جامـ‌ۊڵەی مسینیەنە.

ڕەنگا لاو وېما  جامـۊڵە و کاسە و قابلەمەی مسین نەمەنەبـۊ، بەڵام چنی ئانەیچە ھەر پېڎاکریا. پەی ئا کەسا کە ئـ‌ۆروپانە و ئەمەریکا و کەنەدا و ئوسترالیا مژیۋا، فرە بە ئاسانی بازارە کـۊنەۋرەشەکانە یان بازارە ئینتەرنێتییەکانە بە ئاسانی سوراحییە و دولکە و تەرمـۊزە و جامـۊڵە و کاسە و قابلەمەی مسنین پېڎاکریا و ھەنۍ؛ ھەڵبەتە مسېۋی فرە پاک و پـۊختە.

شەۋېنە ۋەڵۍ وتەی ئاۋۊ بـۊریۍ کەرمېنە یـۊ جە ئا کەرەسا و ڕۊی دماین ۋەڵۍ نان و چای پەرداخېۋ یان دۋۍ پەرداخۍ جە ئاۋەکۍ موەرمېۋە و ئیتر جە وارڎەی (pantoprazole) ڕزگارما بـۊ. ھەڵبەتە متاۋمۍ و خراب نېیا، ئەر شەۋ و ڕ‌ۊ ھەر ئا ئاۋۍ بوەرمېۋە.

بېجگە ئانەیە، ئاۋۊ دلۍ مسی یان چاشتـۊ قابلەمەی مسینی پەی گەڎە-کزی چارەسەرەنە، کـۊمەڵېۋ کەڵكۍ تەرېچش ھەنۍ و  پەی زانیاریی زیاتەری، ھەر کەس متاۋ‌ۊ جە ویکیپێدیانە* جە بارەو (مسی) بوانـۊۋە.

من وېم پېسەو کەسېۋی ئەزمۇنگەری، بە ئاۋۊ دلۍ تەرمـۊزۍ مسینۍ خاس بېیەنا و کەسېۋتەر کە من پەی ھەمان دەردۍ بە ئاڎېم ۋاتەن دۊلکەی مسین بسانـۊ و ئاۋۊ دلۍ دۊلکەکەی بوەرۊۋە، ئاڎ بە سەرەنجامېۋی زیاتەر یاۋان و نەوەشی (غودەی دەرەقی) کە ساڵانېۋا دەسشـ‌ۆ گېرۊڎە بېیەن، بە ماۋەو ساڵېۋی چارەسەر بېیەن.

ئا کەسە بەڕێز (تەحسین محەمەڎ کەریم تەۋېڵەی)ن و جە سویسرا مژیۋۊ و بەپاو ڤیدیـ‌ۆ لایڤېۋی کە چڼ ھەفتېۋ چێۋەڵتەر ۋەڵاشکەرڎەنـ‌ۆ، ئاڎ دماو ئانەی کە من پنە ۋاتەن، سوراحییە و جامـۊڵە و قابلەمەی مسینش بەکاربەرڎەن و ئیسە بارو تەندرۊسیش فرە خاسا و کەسانۍ تەرېچ پەی ئەۋەوارڎەی ئاۋۊ دۊلکەی و جامـۊڵەی  و وارڎەی چاشتـۊ قابلەمەی مسینی بانگەۋازکەرۊ.

تکاکاری: ئەرک نەبـ‌ۊ، ئەر تـۊیچ ئاۋۊ دۊلکەی مسینی و چاشتـۊ قابلەمەی مسینیت پېسەو چارەسەری وارد‌ۆ و واردە و بە سەرەنجامېۋی تەر یاۋای، کـ‌ۆششکەرە، ئەزمۇنگەرییەکەو وېت  بە کەسەکا دۊروبەرو وېت بېیاۋنە و بەخشە، تاکو ھەرچی زېیاتەر کەسەکۍ د‌ۆروبەرو وېما جە وابەستەیی و خرابیی دەرمانە کیمیاییەکا ڕزگارۍ با. و ئەۋەگېڵای پەی چارەسەرە سرۇشتییەکا بـ‌ۊ بە ڕ‌ۆت و ژڵېۋېۋی کـ‌ۆمەڵایەتیی و زانست و زانیاری با دارایی کـ‌ۊمەڵایەتیی و جە چنگـ‌ۊ بازاری و ھەلپەرستانە ڕزگارۍ با. 

ئاکـۊ مارانی
٢٧و جێنیوەری ٢٠٢١