سوهەیب فاروقپەیوەنڎیی بەینوو "دارا" و "یارا" تەنیا پەیوەنڎیێ هامقافییەیی نییا، ئانە نییا کە هامژمارێنێ حەرفەنە و هامتەرکیبێنێ، هەرچنڎە هامقافییەیشا شیعریەتشا ڕۆشنۆ کەرڎەن جە ڕووەو ئەتەکێتی و مۆسیقایۆ، وەلێ متاوو بواچوو، "دار" یارا وەختێ گەرمیی مەیلوو ئەوی تەری مەعشووقی ژیونۆشۆ، پەڕش کەرۆ شەوق و زەوق، بییەیش شکۆفە پەنە مڎۆوە، "یار"یچ دارا، وەختێ بێوەفایی و سەردیی مەیلی، پایزیش مارۆ.پەیوەنڎیی یار- بە وەفێ-وە، هەمان پەیوەنڎیی دار-ین بە گەڵا-یۆ، پایز ماناو مەتەڵەکێنە بە قەرینێ دووروو گەڵایۆ مشناسمێشۆ، کە بەوەشحاڵیوە پایز وێش بە ڕسم بە فۆڕم نامان، وەلێ حزوورێ تایبەتش هەن، غیابێ ئاماڎەن، ئی دۆخە دۆخێ پایزیین بە مانا کلاسیکییەکێش کە "پیروو فەسڵان" کە حاکمەکەی خەزان-ا، کە ڕێزای گەڵایش یەکڕاس دووریی ئازیزین، وەراوەرەکەیچش وەهار و هامنوو مەیلین، سەوزی و سابتیی گەڵای درەختۆ، سەوزی و سابتیی مەیلوو بەینوو عاشقی و مەعشووقین، تاومێ دێڕەکێ وەهارییە کەرمێوە و پێسەیچ مجمێشراوە، بە ئیجازەو فۆلکلۆری:چوون وەفا مەنەن لای یارانەوەگەڵایچ سەرسەوزەن بە دارانەوەیانتا وەفا مەنۆ لای یارانەوەگەڵایچ حەر مەنۆ بە دارانەوە[وێم]دێڕەکێ پەیوەنڎیێ پێوەرەبەسیاو هەورامی و تەبێعەت(سروشت)ی نیشانە مڎۆ، هەورامیزوان هێڵەکاو واتەیش(گوتن)ەکێش دایمە وەروو ئانەی پێسە وێشا یاوا بەتایبەت شیعرەنە، وزۆشا دلێ تۆشەو سروشتی، هەورامی وەشەویسی، ڕەفاقەت، ژیوگەدۆسی و خوڎاش و .... تاد دلێ شیعرێنە ماچۆ، دلێ شیعرێچنە تلنۆشا سروشتیوە، مەکەو سروشتیشا شانۆ، تا بێتامێ نەبا.چی دێڕێنە هەورامیزوان، ئینا دووەڕاو بەینوو عەشقوو  یارێ و تەبێعەتینە، دیمە ڕۆشن و دیارەکەش کە وەرش کەوتێنمێ تا ئیسه پەیوەنڎیی ئینسانیی عاشقی و مەعشووقین، دۆسێ و دەزگیرانین، وەلێم ڕەهەندێ سروشتگەرای سروشتدۆسییش چەنەن، خەما پەی ڕووتیی داری، پەی بێبەرگییش، خەما پەی تەنیایی گەڵای،،خەما پەی کنایۆ و پڕچیای گەڵای شۆنێوە، خەما پەی کنیایۆ ڕیشەو گەڵای تەموو درەختیۆ، خەموو ئامایۆ پایزین تا مەرگوو ئا گرڎ گەڵایا نەوینا، ئەر "حەمه عومەر عوسمان" چی ساڵانە و دەیە یان دووێ دەیێ چێوەڵتەر خەموو درەختییش وارڎەبۆ و واتەبۆش:کە پایز داری ڕووت ئەکردەوەحەزم ئەکرد پێستم بکەمە بەریپاڵتۆ سەوزەکەم بدەم بە شانیا وشەپقە شڕەکەم بکەمە سەری.ئانە هەورامیزوان، هەورامیی عاشقەسروشت زوۆن خەموو تەنیایی گەڵای و ڕووتیی داری و کزیی ژیوگەیش وارڎەن، هەورامی زیرەکانە بە تیرێ دووێ نیشانێش پێکێنێ خەمە ئینسانییە عاشقانەکەش وارڎەن و خەموو تەبێعەکەیچ، هەورامیزوان جە ڕاو خەموو ئینسانەکەیۆ خەموو تەبێعەکەیچش وارڎەن، چێوە ئینسان چنڎە سەنتەرا ژیوگەیچ هەمان نۆع، تەبعەی هەورامییانێ دلێ تەبێعەتینە ئینەی وەش کەرۆ، دلێ واتەی هەورامییانەی ئەدەبییانەنە فرە کەم وێزیوە ئینسان بێ تەبێعەتی وچیابۆ، یان تەبێعەت بێ ئینسانی وچیابۆ، چوون تەبعەی هەورامییانێش ڕاش پەنە مەڎۆ جە یۆیشا کەرۆوە، چێگەوە یۆ چا شاعێرا کە ئینا چێروو تەبعە هەورامییانەکێنە "گۆران"ی شاعێرا کە ماچۆ:بەڵام تەبیعەت هەرگیزاو هەرگیزبێڕووناکییە، بێ بزەی ئازیزبوانوو کورڎی ئەرەجیۆش "گۆران" تەنیا جە ڕووەو تەسویرسازی و واڕای شکڵوو شیعرێوە موعجیبوو هەورامانین، وەلێ گۆران دنیاوینییش چا دێڕاشەنە کە "تەبێعەت"ی ماچا دنیاوینیێ هەورامییانەن، یانێ تەبعەکێش تەبعێ هەورامییانێنە.