سیاسەتمەدار د. ئیدریس بالوکەن کە بەشداری کۆبیەیۆ و گەلو هامبۆرگیش کەرد، ئەرەیاوناش گۆشەگیری ئاستەنگێوە گەورەن وەردەموو یۆبیەی نەتەوەیی گەلوو کوردینە. هامسەرۆکو کەجەدەکە-ئە، زوبەیدە زومروت واتش: "پەنەوازا دژوو گۆشەگیری قیامەت بەرپا بکەرمێ".
هامبۆرگەنە جە چوارچێوەو هەڵمەتەو "ئازادی پەی عەبدوڵا ئۆجالانی، چارەسەری سیاسی پەی پەرسو کوردی" گلێربیەیۆو گەلی ئەنجامدریا. سیاسەتمەدار د. ئیدریس بالوکەن و هامسەرۆکو کەجەدەکە-ئە، زوبەیدە زومروت بەشداری چالاکییەکەی بی، چالاکییەکە بە دەقێوە ڕێزگێرتەی جە یادو گەشمەردا ئازادی کوردسانی دەسش پنە کەرد.
نزیکەو ٣٠٠ کوردسانیێ ئامادێ بیێ، زوبەیدە زومروت قسێش کەردێ و ژینا ئەمینیەش هۆش وستێمێ، ئەرەیاوناش درووشمو "ژەنێ، ژیوای، ئازادی" پەی گردو ژەنا جیهانی بییەن بە سەرچەمەو ئیلهامی، واتش: "پەنەوازا ئەرەکۆشایما دژوو گۆشەگیری و ئەرەگیری جە گرد بوارێنە بەردەوام بۆ. پەنەوازا دژوو ئەرەکۆشای قیامەت بەرپا بکەرمێ".
سیاسەتمەدار د. ئیدریس بالوکەن بە زوانەکا کرمانجی و کورمانچکی قسێش کەردێ، ئەرەیاوناش دژوو سیاسەتو ئەرەگیری مدرامان بکەرمێ، واتش: "بەڕێز ئۆجالان ٢٥ ساڵێن جە دوورگەو ئیمراڵی پێسەو سیمبولێوە ئینسانی و ژیوایێوە شکۆمەندی مدرامان کەرۆنە. بێگومان جە تاریخەنە، نەک تەنیا پێسەو ڕابەرو گەلا، بەڵکو پێسەو زانا و فەیلەسووفێوە گەورە نامێش مەنۆوە. پۆکەی پەنەوازا بەشداریێوە بەقوەت بکەرمێ جە گرد چالاکییەکانە دژوو گۆشەگیری. گۆشەگیری گەورەترین ئاستەنگا وەردەمو یۆبیەی نەتەوەیینە".
