ژەنە شۆڕشگێڵنە ئاخین گابارە ساڵەو ١٩٧٩ی قوبرسەنە جە ئەڎۍ بۆ. بەڵام بە ئەسڵ خەڵکو ناوچەو کۆپێی موشینە. ساڵەو ١٩٩٧ی جە ئۆروپاوە بەشدارەو دلۍ ڕیزەکا پەکەکەی مەبۆنە. ساڵەو ٢٠٠٠ی ڕووە مکەرۆ کەشە ئازاڎەکا کورڎەسانی. ئەندامەو فەرماندەیی کۆنسەو سەروازی یەژا ستاری و ئەندامەو ئەنجومەنو پاژکی، ئاخین گابارە جە ١٧و ئەیلولو ٢٠٢٣ێنە جە مېڎانوو ئامێدینە جە ئاکامو جەنگێوە دژوارینە بە قارەمانیۆ جەنگش کەرد  و گەشمەرڎۍ بیە.

گەریلا دیرۆک سێرتە جە ساڵیاڎو گەشمەرڎەبیەو ئاخین موشۍ هەمڕێشەنە سەرو کەسایەتی و ئەرەکۊشای ئاڎۍ قسێش کەرڎۍ و واتش: "ئەرەکۊشایۍ فرە قەوەتش ڕاوەبەرکەرڎ، بەتایبەتی تەمامو کۆششەکاش  پەی ڕاس ئەنەیاوای بۍ جە ڕابەر ئاپۆی."

گەریلا دیرۆکە ساڵەو ٢٠٠١ی قەندیلەنە گەشمەرڎۍ ئاخین گابارۍ مشناسۆ و ماوێوە فرە جە هەمڕاینە پێوەرە مەناوە. چا بارۆ پی جۆرە باسش کەرڎە: "هەمڕا ئاخینە ۋێش بە ئەسڵ کۆپێییە بۍ. بەڵام ۋەرو ئانەی باباو هەمڕا ئاخینۍ جە جەنگو قوبرسینە زامڎار مەبۆ، پا مەڵامەتۆ هەر قوبرسەنە مەنۆوە. هەمڕا ئاخینە قوبرسەنە جە ئەڎۍ بۆ و چایچ گۆرۍ مەبۆ. هەرچڼە دوور جە وڵاتی و چاندی... گۆرۍ مەبۆ، بەڵام جەوهەرێوەش بۍ. ساڵەو ٢٠٠١ی قەندیلەنە هەمڕا ئاخینەم ئشناسا، ساحیبو هەڵوێسێوە خۆسەری بۍ، سەرنجو ئینسانەکا لاو ۋێشەرە کێشۍ. لایەنە کۆمەڵایەتیییەکەش وەڵێنە بۍ. خاکەڕا بۍ، ئینسان جە جەوهەرشەنە وینێش کە حەجگیز جە کرۆکو ۋێش دوورە نەبیێنە."

هەمڕایی

گەریلا دیرۆکە ماچۆ، کە ژەنە شۆڕشگێڵنە ئاخین گابارە هەڵوێسێوە تایبەتیش بیەن، فرە خاکەڕا و چنە ۋییەردۍ بیێنە و جە درێژەو قسەکاشەنە واتش: "هەمڕا ئاخینە پەی فاڕای و وەڵێکۊتەی هەمڕاکاش جە کۆششۍ گۆرەنە بۍ. هەمڕایی گرنگ بۍ لاشۆ، گرڎ کاتێ گێڵاینە بۍ، باوەڕیش بە ئەرەکۊشای و ئازادی ژەنۍ بۍ، گەرەکش بۍ بیاوۆ بە ئازادی."

'کۆڵەکۍ سەرەکی پارادایمو ڕابەر ئاپۆی ئازادی ژەنێن'

دیرۆک سێرتە ئاماژەش پانەی دا کە فەرماندۍ و ژەنی شۆڕشگێڵنە ئاخین گابارە جە هێڵۊو ئازادیینە ئەرەکۊشایۍ فرەش ڕاوەبەر کەرڎ و پی جۆرە بەردەوامە بیە: "ئەرەکۊشایۍ فرە قەوەتش ڕاوەبەر کەرڎ، بەتایبەت جە تەماموو کۆششەکاشەنە کۊششی فرەش پەی ئەنەیاوای بۍ جە ڕابەر ئاپۆی. پەی ئینەیچ فرە ۋەنێوە و ئەوەکۊڵیای کەرۍ. پەی ئانەی ڕاس بژیۋۆ و ئەرەکۊشۆ. واچۍ؛ کۆڵەکۍ بنەڕەتی پارادایمو ڕابەر ئاپۆی ئازادی ژەنێن. گەر بە دروسی چینەی نەیاومێنە نمەتاومۍ پېسە شۆڕشگێڵنێوە ڕاسی ئەرەکۊشمۍ." تەمامو کۆششەکاش ئانە بۍ کە بیردۆزی ئازادی جە ۋێشەنە چەسپنۆ. واچۍ؛ 'پەی ئانەی بتاوو هامجنسو ۋێم بشناسو، پەنەوازا جە بیردۆزو ژەنێنە قوڵبوە و جە ۋێمەنە بنیاڎش بنیەو.' گێڵایش چی مژارانە جە ئاستۍ باڵانە بۍ."

' هەمڕێوە نمونەییە بۍ'

دێرۆک سێرتە دەسنیاشانش کەرڎ کە کۊششەکێش گرڎ کاتێ بە ڕیکوستەی و بیردۆزی بێنۍ و ئینەش وات: "بە هەڵوێسە بۍ ۋەرا ۋەر بە کەموکوڵیەکا، ڕەخنە گێرۍ و جە هەمان کاتیچنە هێز بەخشۍ. پەی وەڵێکۊتەی ۋێش و هەمڕاکاش فرە بە دیقەتە بۍ. کاتێ لوێبیۍ پەی ئامەدی چڼین پلانۍ و پڕۆژێش بێنۍ. جە گرڎ ڕوێوە هەمڕێوە نمونەییە بۍ."