هەپەگە جە ساڵیاڎو گەشمەرڎەبیەیشەنە یاڎو فەرماندەی فیدایی ئاپۆیی باز ئازاد پیرۆیش بەرزڕاگێرت و ئەرەیاۋناش، "١٥ ساڵۍ دلۍ ڕیزەکا گەریلاینە، بە بێ راڕایی و بێ دووەدڵی و بەشێوێوە گیانبازانە ئەرەکۊشایش کەرڎ ".
هەپەگە ئەرەیاۋناش، "جە ئەیلولو ٢٠٢٠ جە هەرێمەکاو پارېزنای مەدیاینە فەرماندەی ئاپۆیی فیدایی هەمڕا باز ئازاد پیرۆ گەشمەرڎەبی، جە ساڵیاڎو گەشمەرڎەبیەیسەنە بە رێزۆ یاڎش مکەرمېوە" و ئەرەیاۋنایچش:
"هەمڕا باز رۆڵەی ئازاو ئامەدی، جە وەختو بەشداربیەیشۆ تا ساتو گەشمەرڎەبیەیش ١٥ ساڵۍ جە ریزەکاو گەریلاینە بە بێ ڕاڕایی، بێ دووەدڵی و بە هەوڵ و مانیایۍ ئەرخەیانۆ ئەرەکۊشا. هەمڕاما کە وێنێوە بۍ جە پاکی و بێگەردی گیانبازیی، جە دڵە پاک و بێخەوشەکەشەنە، کەسایەتی راس و جە ۋۍ ۋیەردەیش، هەمڕاییش جە ناخۆ و قەوەتی ۋێش جە دڵو گرڎ هەڤاڵێوە ئەرەکۊشاکەیشەنە ڕاش کەرڎۆ. جە دژوارتەرین مېڎانەکا گەریلاینە ئەرەکۊشا و بی بە وێنەو حەقیقەتی گیانبازیی ئاپۆیی. فرەو کۆششو ستراتیجی پارتەکەیمانە کە پەنەوازش بە بڕوا و ۋەرپرسیاری گۆرەی بۍ، بەشداربۍ و بە هەڵوێسی جەنگاوەری و کەسایەتی جەوهەری ۋێشۆ بی بە شیاوو بڕوا و متمانەو هەڤاڵاش. هەمڕا باز کە گیانبازیش پېسە شێوازو ژیۋای دیاریکەردەبۍ، بە فەلسەفەو پارتەکەیما (تیکێوە نان و بەرگێوە دەروێشانە) جە زاگرۆسۆ تا ئامەد، جە کۆبانێوە پەی فرەو ناوچا کورڎەسانی بە هەگبەکەو مازیشۆ شۆنەو هیواو ئازادیرە ڕاش بڕی، ئەرەکۊشا و بێ تەرس جەنگش کەرد.
ئێمە پېسە هەمڕایا ئاڎی ۋەرو ئانەی فەرماندێوە فیدایی پېسە هەمڕا ئازاد باز پیرۆیما ئشناسا و چنی ئاڎیی شان بە شانو یۆترینی پەی یەک ئاواتی و مەرامی کۆششما کەرڎ، ۋێما بە بەختەوەر مزانمۍ. قەول مڎەیمۍ کە بیمۍ خاوەن ئەرەکۊشایۍ کە لایەق بە یاڎو ئاڎیی بۆ و قەولو سەرکۆتەی واوەی مکەرمێوە. پا ئاوەزیماوە سەرەوەشی جە بنەیانەی بەقیمەتو هەمڕا بازی و گرڎو گەلی وڵاتپارێزنو کورڎەسانی مکەرمۍ.
زانیاریی سەرو ئشناسنامەو هەمڕا باز ئازاد پیرۆی پی جۆرەنە:
ناسنامۍ / باز ئازاد پیرۆ
نامۍ و دما نامۍ /عەبدولرەحمان ئاکسەل
شۆنەماو جە ئەڎابیەی / ئامەد
نامۍ ئەڎۍ و نامۍ تاتەی / فاتمە- عومەر
شۆنەماو کاتو گەشمەرڎەبیەی / ٢٥و ئەیلولو ٢٠٢٠/ هەرێمەکاو پارېزنای مەدیای
