ئەندامێوە تیموو ئاوەڎانکەرڎەیۊ حوکمەتووعێراقی جە شەنگالنە ئەرەیاوناش، حوكمەت پەنج ڕانمایی بەپەلێش پەی ئاوەڎانكەردەیۊو شەنگالی و گێڵایۊ ئاوارەكا بەرۍ كەرڎۍ، هامكات وادێوەیچش پەی دەسپەنەكەردەی ئاوەڎانكەردەیۊو شەنگالی دیاری كەرد.
عەبدولقادر دەخیل، ئەنداموو تیموو ئاوەڎانكەردەیۊو حوكمەتوو عێراقی جە شەنگالنە، بە ئاژانسوو "ڕۊژنیوز"یش ئەرەیاونا، سەرۊكوەزیرانوو عێراقی داواش كەردە پەلە کریۊ مسۊگەرکەرڎەی خزمەتگوزارینە و پێسە ئاماڎەكاریێوە پەی گێڵایۊ ئاوارەكا، جەختیچش كەرڎۊ حوكمەتوو ناوەندی نییەتێوە جیددی و ڕۊشنش هەن پەی گێڵایۊو ئاوارەكا و سەقامگیركەرڎەی دۊخەكەی.
ئاماژەش پانەیچ كەرد، ڕانمایی بەپەلە جە لاو سەرۊكوو حوكمەتێوە هەن، كە ڕاوشۊنی ئەمنی و كارگێڵین، جگە چانەی هەوڵەكاو حوكمەتی سەرەمڕۍ با، جە تازەکەرڎەیۊ و ئاوەڎانکەرڎەیۊو شەنگالینە جە ڕاو خزمەتگوزارییە موهەندیسییەکاوە.
ئانەیچشە وات، سودانی داواو پێکئارڎەی هێزێوە ئەمنی کەرۊ، جە هەواڵگێری و ئاسایشی نیشتمانی و لایەنەكای تەریچ، بە مەبەسوو زووکەرڎەی و وردبینیکەرڎەی، وەروو ئانەی لایەنی ئەمنی جە دەسەڵاتوو داڎوەری و گێڵایۊ ئاوارەكانە بەڕێكوپێكی بلۊ ڕاوە، حەرپاسە جە ڕووەو داراییوە پەشتگیری جە ئاوارە گێڵایۊکا کریۊ.
دەخیل ماچۊیچ، سوودانی ڕانمایی وەزارەتوو كاری کەرۊ، كە معاشوو ئا هاموەڵاتییا، كە داهاتشا سنووردارا و ئانۍ ئینۍ لای واریی خەتەو فەقیرییوە، شەنگالنە مسۊگەر کریۊ، حەرپاسە جە ڕاو تیموو هەوڵاو حوكمەتیوە دەمودەس هەرمانە پەی ئاوەڎانکەرڎەیۊ ئا مەنتێقا کریۊ.
ئەندامەکەو تیموو ئاوەڎانكەردەیۊ حوكمەتوو عێراقی جە شەنگالنە ئانەیچش وست ڕووە، یووەم كۊبییەیۊ جە بارەگاو لوجنەو باڵاو ئاوەڎانكەرڎەیۊ موسڵی کریا، كە دلێشنە میكانیزمی ڕاستەوخۊو ئاوەڎانكەرڎەیۊ وزیا ڕووە.
واتیچش داواشا جە ڕاوەبەرییە تەندروسییەكا، شارەوانییەكا، پەروەردە، ئاوی، ئاوەڕۊ، كشتوكاڵ و كەرتۍ و بەشەكای تەری کەرڎە، تا داتابەیسێوەشا بدا، كە پڕۊژەی سەرەمڕ و تەمامكریا و پڕۊژەی تازە جە وۍ گێرۊ، كە شەنگال پێویسش پەنەشا، گرنگیدای بە پڕۊژە كشتوكاڵییەكا پێسە ئاماڎەكاریێوە پەی گێڵایۊ ئاوارەكا".
دما دمایی قسەكاشنە "عەبدولقادر دەخیل" واتش، دماو تەمامكەرڎەی داتابەیسەكا، ئاوەڎانكەرڎەیۊ شەنگالی دەس پەنە کەرۊ.
ف.ق
