نوێنەرایەتیی پارتوو دیموكراتوو گەلا– هەدەپە بە هامكاریی چنڎ چالاكێوە مەدەنی، كەمپەینوو كۊكەرڎەیۊ هامكاری پەی زەرەروەنەکەوتاو بوومەلەرزەکەو سەرنیشت و وەرپڕوو كوردسانی ئەرەیاونا، کە یاگۍ كۊكەرڎەیۊ هامكارییەكا بارەگاو هەدەپەی بۊ، پشتەو "میگا مۊڵ"یوە.
جە كۊنگرێوە ڕۊنامەنویسینە نوێنەرایەتیی هەدەپەی هەولێرنە، بە ئاماڎەبییەی نوێنەروو لایەنە سیاسییەكا و چالاكاو شاروو هەولێری كەمپەینێوەشا ئەرەیاونا و ئاماژەشا پانەیە کەرڎ، كە كەمپەینەكە پەی ماوەو حەفتێوە درێژەش بۊ.
ئانەیچشا وات: هاموەڵاتیۍ بە پاو تواناو وێشا متاوا هامكاریی كەمپەینەكەی بكەرا و ڕۊشنشا كەرڎۊ، كە هامكارییەكۍ جە ڕاو هەدەپەی و وێڕاوەبەریی وەرپڕ(ڕۊژاوا)یوە یاویا بە زەرەروەنەکەوتا.
ئانەیچشا ئاشكرا كەرڎ، دەوڵەتوو توركی ڕاش نەدێنە هامكاری بیاوۊ بە زەرەروەنەکەوتا جە وەختێنە هاموەڵاتیۍ ئا یاگا بوومەلەرزەكەش چەنە کەوتەن، پێویسیی فرە فرەشا بە هامکاری هەن.
هەدەپە بارەگاکەو وێشنە پەشتەو "میگامۊڵ"یوە، جە شاروو هەولێرینە كەمپەینەكێش كەرڎێنۊ و جە سەوایۊسەعات ٩و بەیانی پەی ٥وو وێرەگای، هامكارییەكۍ ور گێرییا و پەی ماوەو حەفتێوە درێژەش بۊ.
