وەزارەتو جبەرو بەریتانیای قەرارەکۍ کۆنگرەو ١٢ـەمینو پەکەکەیش بە هەنگامېوە گرنگە پەی ڕەخسنای ئاشتی و ئاسایشو هەرێمەکەی و تورکیای نیارە و پېوەس بە ئازاڎیی بەڎەنی ڕابەر ئاپۆی ۋەرپرسیاریش وست ملو تورکیای.
وەزارەتو جبەرو بەریتانیای بە ئەرەیاۋنێوە نویسیا جوابو نامەکەو کۆمیتەو هەرمانو کارو جبەرو ئەنجوومەنو گەلو کوردی جە بەریتانیا پېوەس بە قەرارەکا کۆنگرەو ١٢ـەمینو پەکەکەیش داوە. جە ئەرەیاۋناکەینە سەرنج وزیان سەرو پەیوەندییە ستراتیجییەکا بەینو بەریتانیای و تورکیای و دەسنیشان کریان جە نزیکۆ چەمڎاری پێشئامایەکا دماو قەرارەکا کۆنگرەو ١٢ـەمینو پەکەکەی مکەرا و وچیان: "قەرارەکۍ پەکەکەی کە پەی دمایئاردەی بە ڕێبازو ئەوەکۊشای چەکڎاری دێنێش، هەنگامېوە گرنگەنە پەی ئاشتی و ئاسایشو هەرێمەکەی. بەریتانیایچ پەی کەمکەردەیۆ پشێویەکا و پەرەدای بە سەقامگیری هەرێمەکەی پاڵپەشتی چا هەوڵا مکەرۆ."
جە ئەرەیاۋناکەینە ئانەیچ وزیان ڕووە جە دماین گلېرۊبیەو وەزارەتو جبەرو بەریتانیای و ۋەرپەرسا تورکیاینە، چنێن مژارۍ جیاوازۍ هەنۍ، یۆ چا مژارە گرنگا مژارو قەرارەکا پەکەکەیا.
'پەنەوازا پیمەرەکۍ سەروەری یاسای جابەجێ بکریا'
وەزارەت جبەری جە ئەرەیاۋناکەیشەنە ئاماژەش پانەی کەرڎەن، زینانی کەردەی ڕابەر ئاپۆی قەرارو دادگاو تورکیاین و ماچۆ سزا تاکەکەسییەکۍ جە چوارچێوەو یاساو دلېینەو تورکیاینە هۊر مسەنگیا.
جە ئەرەیاۋناکەینە باس جە مژاروق سەپنای قەیومی کریان و ئینە وچیان: "سەپنای قەیومی سەرو ئیدارە دلېینەکارە گێرتەی وەرۍ کارگێڕییا بە ئارەزوو دەسەڵاتو کۆمارو تورکیایا. بەڵام پېسە بەریتانیای چەمەڕۍ ئانەینمۍ گرڎو پرۆسە دادوەرییەکا پېوەس بە نوێنەرە هۊرچنیە دلېینەییەکاوە بە شێوێوە دادپەروەرانە بە پاو یاسای بلۊڕاوە."
ئی ئەرەیاۋنایە نیگەرانی وەش مکەرۆ
ئەندامو کۆمیتەو هەرمانو کارو جبەرو ئەنجوومەنو گەلو کوردی، عەگید کاراتاش ئەرەیاۋناش ئاڎۍ دما بە دماو کۆنگرەو پەکەکەی نامێوەشا پەی وەزارەتو جبەرو بەریتانیای کیاستەن و واتش، "جە نامەکەنە دەربارەو هەڵوێسو بەریتانیای دەربارەو پرۆسەکەی و 'مافو هیوا'ی پرسیارەما ئاڕاسەو وەزارەتی کەردەن."
کاراتاش ئاماژەش پانەی دا جوابەکۍ بەریتانیای حیچ سەرسامیێوەشا وەشنەکەردەن و گېرە نیگەرانیچ زیاڎ مکەرۆ و ئینەش وات: "حکومەتو بەریتانیای ئەرەیاۋناش تورکیا هامپەیمانێوە ستراتیجی ناتۆیا و هەوڵە تازەکۍ پەکەکەی متاوۆ هامکاری ئاشتی جە هەرێمەکەنە بکەرۆ. بەڵام ئاژەو عەبدوڵا ئۆجالانی پېسە 'مژارێوە دادوەری دلېینەو تورکیا'ی نامێش ئامان. جە حەقەتینەنە ئی قسۍ بەربڕیێوە حەقەتینا؛ ئازادی عەبدوڵا ئۆجالانی پەنەوازش بە سەرجەنۆ هۊرسەنگنایۆ میکانیزمە دادوەرییەکا تورکیای و پێکئاوردەی 'مافو هیوا'ین جە یاسا مېیاننەتەوەییەکانە."
عەگید کاراتاش، دەسنیشانش کەرد ڕەخسنای ژیوگێوە پەی ئازادی هەرمانکەردەی ڕابەر ئاپۆی پەی گەلاو تورکیای و هەرێمەکەی کرێڵو پرۆسەو چارەسەرییا. هەرپاسە کاراتاش جەختش سەرو گرنگی خاوەنداریکەردەی و بەردەوامیدای جە هەڵمەتۊو ئازادی پەی ڕابەر ئاپۆی کەرڎۆ کە جە بەریتانیانە ملۊڕاوە و داواش جە گلېرگەی مېیاننەتەوەیی کەرد پالپەشتی جە پرۆسەو چارەسەری دیموکراتیکی بکەرا.
