گەلەکۆمەی میاندەوڵەتیی دژ بە ڕابەر ئۆجالانی ٢٤ ساڵێش پەڕکەردەوە و جە ۱٥و شوباتیەنە گەلەکۆمەکە یاۋا قولە و جە رۆزگارو ئارۊیچەنە بەشێۋازێ جیاۋزۍ درێژەش هەن، بەڵام بە مدرامان و قارەمانیی ڕابەر ئاپۆی، کوردی و گەریلای و ئازادیۋازان ئەنجامش نەپێکان.
جە رۊدیارو ۱٥و شوباتو ۱۹۹۹ی، ڕێبەر عەبدوڵا ئۆجالان کینیای مازۆنە جیا و بە گەلەکۆمێوی میاندەوڵەتیی پیلان و بەرنامەکریا دەستگیر مەکریۆنە. شۆنیشەرە بەدیلی تەسلیم بە تورکیای مەکریۆنەوە و دەسەڵاتدارۍ ئا سەردەمەو تورکیای سەرەسوڕمەنەی وێشان ۋەرانۋەر بە تەسلیمکەردەکەی نیشانە مڎانۍ و ئانەیچە نیشانەش مڎۆنە کە بە تەمامی بێئاگێنۍ جە پڕۆسەکەی. ئیتر جە ئا ڕۊچەوە تا بە ئیسە ٢٤ ساڵێن رابەر ئاپۆ جە ئیمرالی زیندانی کریان و فرە دڕندانە، نائەخلاقانە و دوور جە پیمانە حقوقیۍ و مرۆییە باوەکان گۆشەگیر کریان و سەختەرین ئەشکەنجەی دەروونی و جەنگی تایبەت دژش پەیڕەو کریان.
"ئی گرد دژایەتییە ۋەرانۋە بە بە ئۆجالانی هۆکارەکەش چێشەن؟"
جەی ئی بارودۆخەنە پەرسێ گرنگە مەیۆنە ئارا کە ئۆجالان کێن و فەلسەفە و جەمیەر و ئامانجەکەش چێشێنێ و چی کریا ئامانج؟ ئەی چی تەسلیم بە تورکیای کریاوە ؟ چی هێزۍ و دەوڵەتۍ کۆنەپارێزێ هەرێمیۍ و زلهێزە جیهانیەکۍ ئانڎە دژایەتی ش مەکەرانێ؟ هامکات چی هێزە ئازادیوازەۍ و دیمۆکراتیوازەکۍ ناوچەکەی و جیهانی ئانڎە پەشتیوانیش ونە مەکەرانۍ و هەوڵ پەی ئازادیش مڎانۍ؟ ڕەنگەن وەڵامدایۆئی پەرسا هەر پاسە سانا نەبۆنە. بەڵام ئاستەمیچ نییەن. پە گوزەرکەردەی بە کۆشای ئۆجالانی و جمیەرەکەیشەرە مرۆڤ میاوۆنە بە کرێڵو ئەۋەکەردەیۆ دەرۋازە پەرسیارەکان. پەی یاۋای بە ئانەیچە، گرنگەن مدرگایەگا و قۆناخەکانو گەلەکۆمەکەی و هەرپاسە کۆشای ئۆجالانی و جمیەرەکەش ڕاڤە و شەی بکریانێۋە.
"گەلەکۆمە و دژبەری ئۆجالانی کەی و چەنی دەسش پنەکەرد"
جە ڕێککەوتو ۱۹۹۸/۱۰/۰۹یەنە، بەشداری هێزە هەرێمی و جیهانیەکان ڕێبەر ئۆجالان بە پیلانگێڵنای و گەلەکۆمێوی میاندەوڵەتی کریا ئامانج. ڕێبەرو گەلو کوردی عەبدوڵا ئۆجالان کە جە ئا سەردەمەنە جە سوریا بێ، بی ئامانجو گەلەکۆمێوی میاندەوڵەتی کە ژمارێوی فرێ جە هێزە هەرێمیێ و جیهانیەکێ چوون، ئیسرائیل، ئەمەریکا، بەریتانیا، یۆنان و تورکیا، ڕوسیا، ئەڵمانیا و چەندین وڵاتێ تەرێ ئەوروپیێ و جیهانیێ بەشێوازێ جیاوازێ بەشدارێش بێنێ. هۆکار چێش بێ گەلەکۆمەکە ئەنجام دریا، ئۆجالان چی ڕووبەروو گەلەکۆمەی میاندەوڵەتی کریاوە و سەرگوزەشت و خەبات و کوشایشش پەی ئازادی کوردی و گەلە بندەستەکان و مرۆڤایەتی چێشەن؟ ئایا گەلەکۆمەکە کە دژش ئەنجام دریا ئامانج پێکان؟ ئۆجالان و جمیەرەکەش ئا وەختە و ئارۆ چ بارودۆخ و جایگایشان جە کوردستان، وەرهۆرزی میانی و جیهانەنە بێنە و هەن؟ جە لای وارییەوە شەیش مەکەرمێنەوە.
"هەر جمیەر و ڕێکۋستێوە بنەما و بناغەی پتەوش گەرەکەن"
هەر جمیەر و ڕێکۋستێوی سیاسیی، سەربازی و کۆمەڵایەتیی، ئەگەر گەرەکش بۆنە بە ئامانج و سەرکۆتەی بیاوۆنە، مشیۆم بنەمای فکری و فەلەسەفی و بناغەی پەتەوش بۆنە و پەشتیش بە توانا زاتییەکێ وێش و گەلەکەیش بەستە بۆنە. مرۆڤ کاتێ سەرنج جە پەکەکەی مڎۆنە ئا بنەما و بناغەشە چنە مەۋینۆنە. خوڵقنەر و ئا بنەما و بناغەیە و دەرنجام دروست بییەی پەکەکەی کەسایەتیۋی زانا و هۊشیار و بەهێزش پەشتیۋە بییەن، کە ئاڎیچ عەبدوڵا ئۆجالان ڕێبەرو گەلو کوردییەن.
"ئۆجالان کێن و سەرگوزەشت چێشەن"
عەبدوڵڵا عومەر عەبدوڵڵا کە ناسنامش ئۆجالان-ـەن، جە ٤ نەیسانو ١٩٤٩ زاینی/ ١٤/١/١٣٢٨ ڕۆجیاری جە دەگاو ئامارای (ئۆمرەلی) کە سەر بە شارچەو خەڵفەتی پارێزگەو ڕحا (ئوورفا)ی جە سەرنیشتو کوردستانیەن، جە ئەڎێ بییەن .نامێ ئەڎێش ئایشێ بینە و باباش جە تیرەو بەرازییان، کە تیرێۋەنێ هەمیشە چەنی دەوڵەتو عوسمانی دلێ ناکۆکی و جەنگیەنە بیەنێ. دەگاو ئامارای فرە کەلتوور و ئەتنیک و باوەڕیە بیێنە و ئانێچە کاریگەریش سەرو ۋیر و هزرو ئۆجالانی کەردەن. ئۆجالان جە زارۆیی و نەوجەوانیشەنە کەسێ دیندار و نماکەر بییەن و فرە جارێ ۋەرنماییش پەی هاۋەڵەکانش و خەڵکو دەگاگێکێش کەردەن. تەنانەت دینداری و باوەڕمەندیش بە ئایینی بییەن یاگێ سەرنجی پەی خەڵکی و مەڵاو دەگاکێش. قۆناغەکانو وەنەی سەرەتاییش جە دەگاو جەبینی دەس پەنە مەکەرۆنە و تەمانۆنە. جە شارچەو نیزیپی قۆناغەکێ ناوەندی و دماناوەندیش وەنێنێ. دماتەر جە ١٩٦٥ قۆناغو وانای وەلێ زاشتگەیی بەدمایی ماۋەرۆنە. جە ۱۹۷۰ و ١٩٧١ جە بەشو حقوقو زانشتگەی قبوڵ مەکریۆنە و دمای ساڵێ بەشەکەی فاڕۆنە پەی زانشتە سیاییەکان جە زانشتگەو ئەستەنبوڵی و جە ئاگە درێژە بە وانای مڎۆنە.
"هامتەریب چەنی وەنەی خەباتی سیاسیش بییەن"
ئۆجالان هامتەریب چەنی وەنەی خەباتی سیاسی و وانکاری و چینایەتی و کۆمەڵایەتییش بییەن و هەر بە گەنجی ڕێکۋزیا و گرووپی سیاسییش بییەن. جە ١٩٧٢ی سەرو بەشداریش جە ناڕەزایەتی چەپەکانە جە زانشتگەو ئەستەنبوڵی دژو جەدارای دەنیز گەزمیشی ئەنجام دریابێ، دەستگیر و زیندانی کریان و چەنی ژمارێۋ جە هامبیرێ و هامڕاکانش چەنڎین مانگێ زیندانە مەنەنەۋە. جە نەورۆزو ١٩٧٣ی جە ئانکارای پایتەخت چەنی ژمارێ جە هاۋەڵەکانش جە قەراخو رووبارو (خچووبوک) یەنە یەکەمین کۆبیەی سیاسیش سەرپەرشتی کەردەن و دلێشەنە پەی یەکەمین جاری کوردستان بە داگیرکریا دریان قەڵەم.
"گەورەتەرین ڕێکۋزیای کوردیش مەرزنانەرە"
بە پێچەۋانەو سەرکردە وەڵینەکانو کوردی کە کوڕە شێخێ و بەگێ و دەوڵەمەندێ و دەسەڵاتدارێ بیێنێ و شۆڕشان بەرپا کەردەن یان ئامێنێ سەرو حازری، ئۆجالان کوڕە هەژار بییەن و بە تەوانایی و فکر و فەلسەفەو وێش و بە پاڵپەشتی گەلی و بندەستانی و ڕێکۋستەی و پەروەردەکەردەی گەلی شۆڕشش بەرپا کەردەن و گەورەتەرین ڕێکۋزیای کوردیش درۊست کەردەن. ئۆجالان جە باسەکاشەنە سەبارەت بەشۆڕشەکەیش و ئەرەمەرزنای پەکەکەی ۋاتەنش: "شۆڕش و پەکەکە سەرو هەڵەکێ ٢٧ ئاخێزێ و شۆڕشێ ۋیەردەو کوردی و کوردستانی خۆڵقیێنێ، پۆکەی دلێنەبەردەیشان مەحاڵەن.
"خەبات فراۋان مەکەرۆنە و پەکەکەی مەرزنۆرە"
جە سەرەتاو ١٩٧٦ی جە گەڕەکو دیکمان-و ئانکارا-و پایتەختو تورکیای یەکەمین کۆبییەش بە بەشداری ژمارێۋێ فرێ کەسایەتیێ شۆرشگێڵێ، چەپێ و نامیێ تورکیای دلێشانە کەسایەتی دیار و نامی و شۆڕشگێڵ حەقی قەرار و ژمارێۋی فرێ جە هامۋیرێ و هاۋەڵەکانشان ڕێکۋزۆستەن. ئیتر بە کۆبیەی دمای کۆبیەی ڕێبەر ئاپۆ ڕۆحی تازەتەر بە هاۋەڵەکانش مەبەخشۆنە و بە جۆرێ کە جە ٢٧/١١/١٩٧٨ جە دەگاو فیسی سەر شارو ئامەدی (پەکەکە) پارتو کارگەرانو کوردستانی مەرزنارە و پارتەکەشان ڕۆچ بە ڕۆچ مەزنتر مەبۆنە. پۆکەی دوژمن مەکەرۆنە ئامانج و هێرش دژش ئەنجام مەڎۆنە و جە ئاکامشەنە ژمارێۋی فرێ ئەندامێ و پێشەنگێ پەکەکەی دەستگیرێ مەکەرۆنە. جە مانگەو تەمووزو ١٩٧٩ی ڕێبەر ئاپۆ و هەڤاڵەکێش کە مەتەرسی دەستگیرکەردەیشان بێنە، دەربازێ ڕۆژئاڤاو کوردستانی و سوریای مەبانێ و دماتەر ملانە لوبنان و جە بیقاع یاگەگیرێ مەبانێ. جە ئاگە ئۆجالان مەیڎانو خەباتیش فراوانتەر کەرد و پەی پەروەدەکەردەی سیاسیی، فکری، کۆمەڵایەتیی و سەربازیی ئەکادیمیاو فەرماندە مەعسوم قورقومازیش مەرزنارە. جە ۱۹۸۲ تا ١٩٩٨ جە ئاکادیمیاکەنە شەۋانە و ڕۆ دەرس مەۋچۆنەۋە و شاگردێ و مسیارەکانش پەروەردێ مەکەرۆنە و دەرەنجام زیاتەر جە ۲۰ هەزار ئەندامێ پەکەکەیش جە گردو بوارەکانە بە قوڵی و پتەویی پەروەردێ کەردێ و دەستە دەستە ڕەوانێ وڵاتیش کەردێۋە. جە ۱٥و (تەباخ-ئاب)و ۱۹۸٤ی شۆڕشی چەکداریش بەرپاکەرد و بە تەقنای یەکەم فیشەکی کۆشکو زۆرداری تورکیای ئەرەگێریش لەرزناۋە و کوردش جە خاو و وەرمی قوڵی دەیان ساڵەی چڵاکنارە و زینڎە کەردەۋە.
"نزیک بە ۲٥۰ پەڕتوکێش بە قەبارەێ جیاۋازێ نویستێنێ"
ڕابەر ئۆجەڵان هامتەریب چەنی خەبات و کوشاییشی سیاسیی و بەردەۋام پەرۋەردەکەردەی، بەشێ گرنگ جە ژیۋایش پەی نۋیستەی تەرخان کەردەن. بەگردی تا ئیستە نزیک بە ۲٥۰ پەڕتوکێش بە قەبارۍ جیاۋازۍ نۋیستێنۍ، کە تەنها پارێزنامەکێش جە پەنج بەشێ جیاوازێنە بە ۱۰ بەرگۍ و زیاتەر جە ۱۰ هەزار لاپەڕێن بە قەبارەی گەورە نۋیستەن. پەڕکوتەکەکێش ئۆجالانی جیا مەکەرانێۋە جە سەرجەم سەرکردەکانو کوردی و تەنانەت جیهانی و دلێشانە تېژ فکری و گەورەیی کەسایەتیی نیشانە مڎانە کە جەپاڵو سەرکردایەتی کەردەی شۆڕشیەنە گرنگیش دان بە نویستەی و کایە مەعریفی و فەلسەفیەکان. ئۆجالان جە پەڕتوکەکانشەنە فرە بەقوڵی جە ۋیەردەی، تاریخ، ژەنێ، ئیکۆلۆژی، ئابوری، کۆمەڵگە، سیاسەت، شۆڕشەکانو و کوردی و جیهانی، فەلسەفەی کلاسیک و نۋینی قاڵ بیەنەۋە و نەک هۆرسەنگنیایش پەی کەردێنێ، بەڵکو نۊگەراییش چنە کەردێنێ و ئەنجامش چنە بەدەست ۋستەتێنێ و فرێۋشانش سەرڕاستێ کەردێنێ و کەردێنێش ئامیان پەی چارەسەری کێشە و ئاڵۆزییە جیاۋازەکانو ئیسەی و ئایندەو کۆمەڵگەی کوردی و مرۆڤایەتی. ئەی قوڵ بییە و قاڵبیەیە پاسەش کەردەن تا پەڕتوکەکێش بە فرێۋ جە زۋانە زینڎەکانو جیهانی هۆرگێڵنایشان پەی کریۆنە. ئیسە جە پەڕتوکخانەکانو جیهانیەنە و ئەنتەرنێتە بە نۋیستەی و بە دەنگ سەرەڕاو کوردی، بەرهەمێکێش بە ئینگلیزی، فەڕەنسی، ئیسپانی، فارسی، عەرەبی، تورکی، یونانی، روسی و ئالمانی و چەنڎین زۋانێ تەرێ هەنێ. ئانێچە کارێش کەردەن تا جیهانیەکێ زیاتەر ئاشنێ فکر و فەلسەفەکەو ئۆجالانی ببانە و گرنگیش پنە بڎانە و جەی چوارچێۋەنە دەیان کۆنگرێ و کۆنفڕانسێ و سمینارێ جە زانشتگە و دلێگە ئەکادیمی و فەلسەفیەکانە پەی هۆرسەنگنای فکرو ئۆجالانی ڕێکێ ۋزیێنێ و سەدان بابەتێ زانشتیێ سەرش نۋیسیێنێ.
"جە ئەڎابییەیش بە ۳ قۆناغێ دەستنیشان کەردەن"
ڕابەر ئۆجەڵان جە ئەڎابییەی وێش بە ۳ قۆناغێ نیانەرە. یەکەم: ئەڎابییەی سرووشتی، دووەم: ئەرەمەرزنای پەکەکەی، یەرەم: ژیۋای زیندانی جە ئیمرالی. ساڵەو ۲۰۰٥یچ جە زیندانەنە نۋیستەی سیستمو کۆما جڤاکێن کوردستانی و جە ۲۰۱۱نە نۋیستەی ژنۆلۆژیش بە جە ئەڎابیێۋی تەر ئەژمار کەردەن.
"ئازادی کوردی و گەلانیش جە ئازادی (ژەن)ێنە ۋینان"
ڕێبەر ئاپۆ دلێ سەرکردە کوردەکانە تاکە ڕابەر بییەن کە گرنگیش بە ژەنێ دان و تەنیا ڕاو ڕزگاری کوردی و گەلە چێردەستەکان و کۆمەگەیش جە ئازادی ژەنێنە ۋینان، بە جۆرێ کە خەبات و کۆشاییشی ئازادیشەنە ژەنێ کوردیش یاونێ بە ئاستێ کە جە گردو جیهانیەنە بە شانازیەوە باسشان بکریۆنە و ژەنی کوردی ببانە بە ئلگو و سمبول و نمونە پەی ژەنانو جیهانی. ئۆجالان ژەنیش جە چێردەستیی تاتەی، برای، پیای و نێرسالاری ٥ هەزار ساڵەی ڕزگارە کەردە و متمانە و ئیرادە و پایە و کەسایەتی وێش جە گلێرگەنە پنە بەخشاۋە و جە کەسێ پەراۋێز ۋزیێۋە کەردەش بە ئاکتۆرێ و ڕۆڵگێڵێ سەرەکییە جە گردو بوارەکان ژیۋای و کۆمەڵگەیەنە و جە خەبات و کۆشایەنە ژەنی ئیتر نە پەراۋێز ۋزیا نەبێ، بەڵکو پێشەنگایەتی مەکەرۆنە.
"پێۋەرە ژیۋای ئاشتیانە و ئازادش بە بنەما گێرت"
ئۆجالان بوارێۋی تەر کە هەر فرە گرنگییش پنەدان، پێۋەرە ژیۋای چین و باۋەڕیە جیاۋازەکانو کۆمەڵگەی کوردەواری و گەلانو ۋەرهۆرزی میانی و جیهانیەن، کە بەهۆکارێ فرێ چوون، سیاسەتو پارچەش بکەرە و زاڵبە سەرشەرەو کۆڵۆنیالیزمی هەرێمی و جیهانی، سیستمو دەوڵەت-نەتەوەی، سیستەمو جیهانی کاپیتالیستی، بەرژەوەندیۋازی هێزە کۆنەپارێزەکانو کوردستانی و هەرێمەکەی پێۋەرە ژیۋاکەی درزێ گەورێش بەردێ بێ و گەلێ و چینێ و باۋەڕیەکێش کەردێنێ بە دوژمن و دژبەرێ یەکتری. ئۆجالان بە باۋەڕبیەی بە پێۋەرە ژیۋای بەڵام بە شێۋازی ئاشتیانە و ئازادانە و ڕێزگێرتەی جە هەنتری سیستمێ نۊگەرا و نەتەوەی-دیموکراتی، مۆدێرنیتەی دیموکراتی، خۆسەری دیموکراتی، کۆنفەدرالیزمی دیموکراتیش خوڵقنا و بەی تەورە تا ئاست و ڕادێۋی فرە چین و باۋەڕیە جیاۋازەکێ کۆمەڵگەو کوردەواری و گەلانو ۋەرهۆرزی میانییش ئاشتێ کەردێۋە و زەمینەو پێۋەر ژیۋای ئاشتیانە و ئازادانەیش پەی فەراهەم کەردێۋە. وێچش بە پڕاکتیک و کەردەیی چەنڎین جارێ ئێربەستش جاڕدا و نەخشەڕێ ئاشتی و چارەسەریش ۋستێ ڕووە. هەڵبەت ئانێچە زلهێزە جیهانیەکێ و هێزە کۆنەپارێزە نۆکەرە ناوچەیەکێش نیگەرانێ و قەڵسێ و تۆڕێ کەردێ، کە جیرە و خورد و خۆراکو وێشان جە ناکۆکی و جەنگی و دژبەری گەلانە دەست مەۋزێنێ. هەر پۆکەی هەم ئۆجالانی و هەم هزرە و جمیەرەکەش بە تێکدەر و ئاستەنگکەرو پیلان نەخشەکانو وێشان مەۋینێنێ و دژش کەوتێ پیلان گێڵنای و گەلەکۆمەی میاندەوڵەتی.
"گەلەکۆمەی میاندەوڵەتی دژ بە ئۆجالانی بڕیارش سەر دریا"
زلهێزە جیهانیەکێ و هێزە کۆنەپارێزە نۆکەرە ناوچەیێ و دەوڵەت-نەتەوە دەستکەلاکێ جە وەرهۆرزو میانییەنە، جە ساڵەو ۱۹۹۸ی سەرەتا فەرمانشان بە دەوڵەتو تورکیای کەرد تا جە دلۍ تورکیایەنە کۆتایی بە پەکەکەی باۋەرۆنە و بە ئی جۆرە گورزە جە پڕۆژە و دنیاۋینەکەو ئۆجالانی بڎانۍ. جە ۋەهارو هەمان ساڵێنە ڕژێمو تورکیای گەورە ئۆپەراسیۆنو (مورادی)ش جە ئامەد و بۆتان ئەنجام دا. جە ئۆپەراسیۆنەکەنە ۳۹ هەزار سەربازێ، دەیان تانکێ، دەیان زریێپۆشێ، نزیک بە ٤۰۰ فڕۆکێ و هەڵیکۆپتەرێ جەنگیێ، نۊتەرین تەکنیکی جەنگی و پەشتیۋانی لۆجستی و مادی و مانەۋی زلهێزەکان و هامپەیمانی ناتۆی جە وێش گێرتەبێ. بەڵام جە دمای ۱٥ ڕووان ئۆپەراسیۆنەکە ئەنجام و ئامانجش نەپێکا و شکست دریا. پۆکەی پیلانگێڵێ و گەلەکۆمەکارەکێ بڕیاشان دا تا یەکسەر ئۆجالانی بکەرانە ئامانج. بەڵام بە ئامانجگێرتەی ئۆجالانی کارێوی هەرپاسە ئاسان و سانا نەبێ و ۋەڵتەر چەنڎین جارێ هەوڵ پەی تەرۆرکەردەیش دریابێ، بەڵام سەرجەمشان بێ ئەنجامێ بیێبێنێ شکستشان واردەبێ. پیلانگێڵەکێ ئیجارە ڕژێمو تورکیشان دنە و هان دا تا هەڕەشێ هۆرگیرسنای جەنگی جە سوریای بکەرۆنە ئەگەر ئۆجالان-شان تەسلیم نەکەرۆنە یان جە وڵات بەرش نەکەرۆنە. ڕژێمو تورکی دەیان هەزار سەربازێش بە تفاقی فرەی سەربازی ڕەوانەو سنورو سوریای کەردێێ و جە سفر کیلۆمەترو سنوری جە ڕێحانییە، ۳۹ هەزار سەربازێ تورکیای مانۆڕێ سەربازیشان ئەنجام دا و پی جۆرە سەرانێ تورکیای جەختشان جە جددیەتیشان پەی جەنگەکەی کەردەوە. زلهێزە جیهانیەکێ بە تاسەۋە ۋینەرێ دۆخەکێ بێنێ و چەمەڕا قۆمیای جەنگی یانەۋێرانکەری مەکەرێنە تا جە ڕاشەۋە دەستۋەردای جە هەرێمەکەیەنە بکەرانۍ و سەرجەنۊ دیزانش بکەرانێۋە.
"ڕاش جە جەنگی گێرتە و جەنگەرانەکێش نائومێدێ کەردێ"
ڕێبەرو گەلو کوردی عەبدوڵا ئۆجالان کە درکش بە مەتەرسی پیلانەکێ کەردەبێ، بڕیاش دا ڕا جە هۆرگیرسنای جەنگی یانەۋێرانکەری جە سوریا و هەرێمەکەینە بگێرۆنە و هێزە جەنگەرانە جیهانیۍ و هەرێمیەکۍ ئاڎی نەکەرانە بە ئامراز پەی قۆمیای جەنگەکەی و دەستوەردای جە سوریای و وەرهۆزی میانی. چونکە ئانە کە دماتەر بەنامێ ۋەهاری عەرەبی سوریا و وڵاتە عەرەبیەکانە ڕووەش دا و جەنگ و کوشتارش شۆنیەرە ئوما، ئاوەختە زلهێزە جیهانیەکی بە بەهانێ بییەی ئۆجالانی جە سوریا گەرەکشان بێ کەردەییش بکەرانە، بەڵام ئۆجالان ۋریا و وشیارتەر چاڎیشان ژڵێۋیاۋە و ڕێسەکەش کەردێۋە بە پەژم و بڕیاش دا جە سوریا بەربشۆنە. ئانەیچە ئانڎەی تەر هێزە گەلەکۆمەکارەکێش جە ئۆجالانی توڕەتەرێ کەردێ و بڕیاشان دا دژش درێژە بە پیلانگڵێناکەی بڎانە.
"۹ ئۆکتۆبەری گەلەکۆمەی میاندەوڵەتی کەردەیی کریا"
ڕێبەر ئۆجالان جە خەموەریش پەی ئاشتی و سەقامگیری و ڕاگێرتەی جە جەنگی، جە ۹ ئۆکتۆبەرو ۱۹۹۸ی سوریاش جیائاست و شی وڵاتو یۆنانی. بەڵام گەلەکۆمەکارەکێ دەستبەردارێ نەبیێ و فشارشان ۋست سەرو ڕژێمو یۆنانی کە وێش بەشێ بێ جە پیلانگێڵناکەی تا ئۆجالانی بەربکەرۆنە. ئیتر گەشتوگێڵی ناچارانەو ئۆجالانی دەستش پنەکەرد. دماتەر ئۆجالان بە داۋەتی فەرمی لۋا ڕوسیا و پارلەمان (دۆما)و ئا وڵاتەیە بە ۲۹۸ دەنگێ بڕیارش دا ئۆجالان ڕووسیانە بمەنۆۋە. بەڵام پیلانگێڵنەرەکێ جە ڕاو بانکی جیهانیەۋە ۋەراۋەرو بەرکەردەی ئۆجالانی ۱۰ ملیار دۆلارێ قەرزشان بە حکومەتی ڕووسی دا و ئاڎیچ قبوڵش کەرد. پۆکەی دمایی ۳۳ ڕووان ڕێبەر ئۆجالان ڕووسیاش ئاست جیا. دمای ڕووسیای ئۆجالان ڕووەش نیا ئیتالیای. ئیتر فشارەکێ سەرو ئیتالیای دەستشان پنەکەرد. جە ۋەراۋەرو داۋاکاری تەسلیم کەردەی ئۆجالانی بە تورکیای، ڕاوێژکارو وەختو وەزارەتو دادی ئیتالی واتەبێش: "کەسێۋی تەسلیم بە تورکیای نمەکەرمێۋە کە ڕووبەڕوو سزاو مەرگی بکریۆۋە. دەرەنجام هیچ وڵاتێۋی ئەوروپی ئامادە نەبی ئۆجالانی قبوڵ بکەرۆنە و بەرژەوەندی سیاسی و ئابوریشان زاڵ بی سەرو یاسا و حقوق و پڕەنسیبەکێ مافو مرۆڤیشارە. ئۆجالان جەی بارەوە واتەنش: "پاسە دیارەن یاساو حقوقو ئوروپای ۋەراۋەرو کوردیەنە مت بیەن و مدران!".
"جە ۱٥ شوباتی گەلەکۆمەی میاندەوڵەتی یاۋا لوتکە"
سەرئەنجام ڕێبەر ئۆجالان سەرو داۋاو یۆنانی ڕووەش نیا کینیا جە پارزەمینو ئەفریقای و باڵۋێزخانەو یۆنانیەنە جە نایرۆبی پایتەخت یاگەگیر بی. بەڵام باڵیۆزو یۆنانی داۋاش ۋنە مەکەرۆنە تا جە ۱٥و شوباتیەنە باڵۋێزخانەکەی بازۆنە جیا. ئیتر بە ناچاری جە ۱٥و شوباتو ۱۹۹۹ی ئۆجالان باڵۋێزخانەکەی مازۆنە جیا و جە ڕاو پڕۆگاخانە(مەتار)یەنە جە پیلانێوی وەڵتەر ئامادەکریانە دەستگیر مەکریۆنە. شۆنیشەرە بەدیلی تەسلیم بە تورکیای مەکریۆنەوە. ئانە کە سەمەرەن، دەسەڵاتدارۍ ئا سەردەمەو تورکیای بێنۍ سەرەسوڕمەنەو وێشان ۋەرانۋەر بە تەسلیمکەردەکەی نیشانە دانبۍ و ئانەیچە نیشانەش مڎۆنە کە بە تەمامی بێئاگۍ یێنۍ جە پڕۆسەکەی.
"گەلەکۆمە ٢٤ ساڵێش پەڕکەردۋە بەڵام ئایا ئامانجش پێکان"
ئارۆ گەلەکۆمەی میاندەوڵەتی دژ بە ڕێبەر ئۆجالانی ٢٤ ساڵێش پەڕکەردەنەۋە، بەڵام پاسە کە پلانش پەی کریا بێ، ئەنجامش نەپێکا. چونکە بەزیندانی کەردەی ئۆجالانی نە پەکەکە دلێنەبریا و لاۋاز کریا، نە ڕێبەر ئاپۆ تەسلیم بی. بەڵکو ڕێبەر ئاپۆ ئیمرالیش فاڕا پەی قەڵاو مدرامانی و بە ڕانماییەکانش جە ئاگەۋە پەکەکە و جمیەری ئازادی کوردی و گەلە بندەستەکێ وەرهۆرزی میانیش گەورەتەر و فراوانتەر کەرد و هزر و فەلسەفەکەش بە پراکتیکی دنیاش تەنیەنەۋە و بەرهەمش دان و شاگردێ و مسیارەکێش سەرەڕاو ساختەکاری و سەختی و دژواریەکان نزیکە ۷۰ پارلەمانتارێشان کیاستێ پارلەمانو تورکیای. ئارۆ جە سەرنیشتو کوردستان پەکەکە هێزی یەکەمەن، گریلان کە مێڎانەکەنە باڵا دەستەن و زاڵەن و شکست و شۆنیەرەگێڵای ئی دمایەو سوپاو تورکی جە زاپ ئا ڕاستیەیە پەشتڕاست مەکەرۆنەوە. ئارۆ دمای ٢٤ ساڵان جە بەرکەردەیش جە سوریا، ئانە وانکارێ و مسیارەکێ ئۆجالانیەنێ جە بەشێ فرە ڕۆژئاڤا و سەرنیشت و وەرهۆرزو سوریای فەلسەفەکەو ئاڎیشان کەردەیی کەردەن و گەلێ و باوەڕیێ جیێ ئاشتیانە و ئازادانە پێوەرە مژیۋانە و سیستمی وێسەری دیموکراتیکی و نەتەوەی دیموکراتیکی، کۆنفەدرالیزمی دیموکراتیکی و نەتەوەی دیموکراتیکی کە پیلانگێڵێ و گەلەکۆمەکارەکێ دژش بێنێ ئارۆ جە سوریا و وەرسارانی دلینەنە یاگەگیر و کەردەیی مەکەرانێ و بە شکستدای دندەتەرین دوژمنو مرۆڤایەتی کە داعشەن ئیتر بەشێ جە گەلەکۆمەکارەکان بە تایبەتی ئەمەریکا بە ناچاری مامەڵەش چەنی مەکەرانە و جە ئاستی باڵانە جە سەرکۆ کۆمار دۆناڵد ترامپی بگێرە تا سیاسەتمەدررێ و کۆنگرێسمانێ ئەمەریکا، سەرۆک کۆمارەکۍ فەڕەنسای و ئەڵمانیای و گەورە ۋەرپرسیاری ئەورووپا و ڕووسیای پێشۋازی جە ڕاۋەبەرانو ڕۆژئاڤای یانی وانکارەکێ ئۆجالانی مەکەرانۍو پەشتیۋانی جە سیستمەکەیشان مەکەرانۍ کە سەرچەمەو ئەرەمەزیاییش جە ئۆجالانی هۆرقوڵیان. ئینێچە نیشانە مڎۆنە گەلەکۆمە و پیلانگێڵە میاندەوڵەتییەکۍ نەک ئەنجامشان نەپێکان، بەڵکو شکستشان واردەن و تاکە کەس و لایەنێ کە سەرکەوتۍ بیێنۍ ڕابەر ئۆجالان و فەلسەفە و هزر و پارت و شۆڕشەکەشەنۍ.
"جە ئاستی و کوردستانی و جیهانییەنە خاوەنداری جە ئۆجالانی مەکریۆنە"
ڕێبەر عەبدوڵا ئۆجالانی تەمەن ۷۰ساڵان، کە ٢٤ ساڵێن بەدیل-گیران و جە ئیمرالی سیستمو ئەشکەنجەی و گۆشەگیری قورسش سەپنیان سەرەرە و زیاتەر جە ٢ ساڵانەن هیچ زانیاریێ جە بارەشەوەنییەن. سەرەڕاو ئاەی بە فکر و فەلسەفەکەیش، نەک تەنیا کوردش جە مەردەی و چێر دەستەیی رزگار و زینڎە و وشیار کەردەنەۋە، بەڵکو بیەنیچ بە هۆکارێ پەی رزگاری گەلە چێر دەستەکانو وەراسانو دلینی و جیهانی و سەرجەم مرۆڤایەتیی و چەسپانی یەکسانی ژەنێ و پیای و پێۋەرە ژیۋای گەلانی و چینە جیاکانو گلێرگەی. هەر ئانێچە پاسەشە کەردەن تا جە ئاستی فراۋانی کوردستانی و جیهان-یەنە خاوەنداری جە ئۆجالانی بکریۆنە و داۋاو کۆتایی ئاۋردەی بە سیستەمو ئەشکەنجەی و گۆشەگیر سەریش جە ئیمرالی باۋریۆنە و ئازادی جەستەییش مسۆگەر بکریۆنە.
جە ئا چوارچوەنە جە ٢٤ ساڵێ ۋیەردێنە بە بەردەۋامی چالاکیێ و مانگێرتەی جەواردەی تەنانەت تا مەردەی پەی کۆتایی ئاۋردەی بە گۆشەگیریەکەیش ئەنجامێ درێنێ کە پەی یۆشان ئا مانگێرتەیەبێ جەواردەی تا مەردەی بە پێشەنگی لەیلا گۋڤەن، هامسەرۆکەو گلێرگەو دیموکراتیکی-کەجەدە و پارلەمانتارەو هەدەپەی، ناسر یاگیز ئەندام جە نمایندەیی هەدەپەی جە پانیشتو کوردستان، ۱٤ چالاکۋانێ و سیاسەتمەدارێ و ڕۆچنامەۋانێ جە ستراسبۆرگو فەڕەنسای، سەدان زیندانیێ پەکەکەی و پاژکی و ئازادیۋازێ جە ۳٥ زیندانێ ڕژێمو تورکیایەنە بەشدارێش بێنۍ.
هاموەخت جە کوردستان و ئەورووپا و جیهانەنە هەزاران سیاسەتمەدارێ، پارلەمانتارێ، ئەکادیمیسیەنێ، چالاکوانێ، پارێزەرێ، ٥۰ خاوەن خەڵاتێ نۆبڵو ئاشتی و هەرپاسە هەزاران چالاکۋانێ بیانیێ و کوردێ پەی بە چالاکیێ و کەمپەینێ جیاوازێ و کۆکەردەیۆ ملیۆنان ئیمزایان وازیارێ ئازادی جەستەیی ئۆجالانی بیێنۍ. هەڵبەتە هەر ئا هەوڵۍ، چالاکیۍ و کەمپەینۍ بێنۍ کە درەنجام بەرهەمشا دا و جە دمای ۸ ساڵان گۆشەگیری ئیمرالی ماڕیا و پارێزەرێ سەردای ئۆجالانشان کەرد و شۆنیشەرە چنڎین جارێ تەری دیدارێ جە ئیمرالی ئەنجامێ درێوە. یۆ جە ئا چالاکییە دیارا جە،جەبەرو کوردستانی ئەنجام دییا جە مانگەو سپتامەرو ۲۰۱۹یەنەبێ کە نزیک بە ٦ ملیۆنێ کرێکارێ بەریتانیێ جە کۆنگرەشانە بە فەرمی داۋاو ئازادی ئۆجالان-یشان کەرد.
"دمایین دیدارەشەنە سورەن سەرو ئاشتی و چارەسەری بەبێ جەنگ"
رابەر ئۆجالان، سەرەڕاو ئانەیە ٢٤ ساڵێ زیاتەرەن جە بارودۆخێۋی فرە سەختەنە گۆشەگیر کریان، بەڵام سورەن سەرو ئاشتی و چارەسەری بەبێ جەنگی. جە دمایین دیدارەشەنە چەنی پارێزەکانش ئی پەیامەشە دابێ کە نۋیسنگاو مافەکێ ئەسرین-ی ۋەڵاکەردەنەۋە:
ئێمە ٧و ئاب-و ٢٠١٩ی چەممان کەفت بە موەکیلەکەیمان بەڕێز عەبدوڵا ئۆجالانی و دیدارمان چەنیش ئەنجام دا. جە چەمپنەکەفتەکە و دیدارەکەنە بەڕێزشان باسش جە ئاژەو ئارۆی کەرد و پەیوەندی دێرینەو میانو کوردی و تورکی و دۆخو جەنگی و قەیرانەکێش هۆرسەنگنێ.
"پەیوەندی کوردی و تورکی جە ئەخڵات و مەلازگرت-ـەۋە دەستش پنەکەردەن"
بەڕێزشان ۋاتش: پەیوەندی کوردی و تورکی جە ئەخڵات و مەلازگرت-ـەۋە دەستش پنەکەردەن و تاوەکو دەستووری بنەڕەتیى جە ساڵەو ١٩٢١ی درێژ بییەنەۋە و شیکاریش پەی کریان. پەیوەست پانەیە مشیۆنە سەرجەم لایەنەکێ هەستیارنە ژڵێۋیاۋە. بەڕێزشان گەرەکشەن پەیلۋای وێش سەبارەت بە کەمالیست و عوسمانییە نۋینەکان بۋزۆنە ڕووە و جەی بارەۋە ئاشکراش کەرد: مشیۆم هەر دووێ ئەقڵیەتەکە جە چوارچێۋەو تاریخ و دێرینەو پەیوەندی کورد و تورک-یەنە درووست و ڕاست هەڵۋێستەی خاسە و ئەرێنیە بۋزانە ڕووە.
"سوربییەی سەرو جەنگی و قەیران خوڵقنای ئەنجامی قورستەر شۆنیشەرە مەیۆنە"
بەڕێز ئۆجالان سەبارەت بە سوربییەی سەرو سیاسەتو جەنگی و قەیران خوڵقنای نیگەرانەن. ئاڎ ئاماژەشدا بە جەدەستدای مرۆیی، سیاسی و ئابوری کە جە ٤۰ ساڵێ ۋیەردێنە ڕووەش دان و ۋاتش: سوربیەی سەرو ئا سیاسەتەیە جە هەرێمەکەنە ئەنجامی قورستەرش شۆنیەرە مەیۆنە و مشیۆم گرد کەس و لایێ ئانەیە بۋینۆنە و بزانۆنە. هەوڵە دیموکراتێمان جە سەردمو ئۆزال-یەۋە تاوەکو ئیسە کۆنترا گەریلا (دژە گەریلا)ی تێکێ دێنێ و جە باربەردێنێ. ئارۆچ هێزە دژە چارەسەریەکێ پەی دووبارەکەردەی هەمان چێۋی جەنگێ منیاۋە. بەڕێزشان قسەکێ ئۆزالی کە ساڵەو ۱۹۹۳ی کەردبێش و ۋاتەبێش: 'بە جەنگ چارەسەری بەدی نمەیۆنە' ۋیر ۋستەۋە و ۋاتش: ئارۆچ ئا بڕیارداری و سوربیەیەو ئۆزالی پەی چارەسەری بەرجەستەن و ئیرادەو ۋنەپەرسایش هەن.
"ئاخۆ کورد مافش هەن یان نا؟"
بەڕێز ئۆجالان بە هەوڵدای شکۆمەندانە (سەردەم و عەقڵ)و دەوڵەتیش شەی و ڕاڤە کەرد و ۋاتش: دژ بە تاریخی درۆینە و سەرقاڵکەرانە و ساختەی کە عەقڵی شۆڤێنیستی ئینا پەشتیشەۋە بمدرۆۋە و گەرەکشەن بە پاو پەیوەندی دێرینەو میانو کوردی و تورکی ڕا و جا پەی کوردی بکەرۆۋە. ئەگەر ئانە بەدی بەیۆنە ئیتر کورد پنەۋازیش بە دەوڵەتی تەری نییەن. بەڵام پرسیارەکێ ئانێنە کە ئایا کورد مافش هەن یان نا؟ هەر پاسە بەڕێزشان ئاماژەشدا بە پانەیە کە بەردەۋام و هەمیشە و جە ٤۰ ساڵێ ۋیەردێنە هەوڵ و تەقەلاش پەی ژیۋای ئازادی، مرۆڤی ئازادی و گێرگەی ئازادی و بونیاتنیای (عەقڵ)و کوردی بییەن.
"گۆشەگیری، پەیوەندیش بە جەنگەکێ ئارۆیەۋە هەن"
بەڕێز ئۆجالان دەستنیشانش کەرد: جە سەردەمو ئۆزالی تاوەکو ئارۆ هەوڵەکێ پەی یاۋای بە ئاشتی و دیموکراسی و چارەسەری بەردەۋامێنێ، گۆشەگیریى ٢٠ ساڵە کە جە ئیمرالی سەپیان سەرشەرە، پەیوەندیش بە جەنگەکێ ئارۆیەۋە هەن. سەرەڕاو ئانەیە ۲۰ ساڵێن سورەنا سەرو ئاشتی، ئانێچە وەڵامدەر مەبۆنە.
بەڕێز ئۆجالان ماچۆنە: من پەی کوردی ڕا و جای شایستە دروست مەکەرونە. بەیدێ ئێمە با پێۋەرە پەرسەو کوردی چارەسەرە بکەرمێنە، من پەی چارەسەری ئامادەنا و متاونە بە هەفتێۋە کۆتایی بە جەنگی و ئەگەرو جەنگی باۋەرونە. پەی بەدی ئاۋردەی ئانەیە مشیۆم دەوڵەت و عەقڵو دەوڵەتی ئەرکشان بە جا باۋەرانە. من باۋەڕم بە وێم هەن.
هەرپاسە بەڕێز ئۆجالان بە بۆنەو جەژنێۋە، سڵام و پیرۆزباییش ئاڕاستەو گەلەکەیش کەرد و ۋاتش: سڵام جە سەرجەم گەلەکەیم مەکەرونە کە جە کۆشای پەی ئاشتی و دیموکراسی رەنج و دڵشان بەخشان و جەژنەشان پیرۆزە ببۆنە. جە کۆتاییەنە سڵامی تایبەتش کیاست پەی زیندانیەکان.
"هەڕەشەکێ دژ بە ڕۆژئاڤای درێژەدایەن بە گەلەکۆمەی میاندەوڵەتی"
پاسە دیارەن پیلانگڵنەرەکێ هیشتای کۆڵەشا جە دژایەتیی کەردەی ئۆجالانی و فەلسەفەکەیش و شۆنکەوتەکاش نەڎان و گەلەکۆمەی میاندەوڵەتی بە شێۋازێ جیاۋازێ درێژەش پنە مەڎانێ. جە ئارۊنە هەڕەشکۍ ڕژێمو تورکیای جە ڕۆژئاڤاو کوردستانی بە فەرمانو زلهێزە پیلانگڵنەرە جیهانییەکان، درێژەدایەن بە گەلەکۆمەی میاندەوڵەتی و ئامانج چنەش تەسلیم گێرتەی ڕێبەر ئاپۆی و جمیەرو ئازادی کوردیەن.
"فکر و فەلسەفەکەش جیهانی بییەن"
بەڵام سەرەڕاو سەرجەم پیلانەکا و دروستکەردەی ئاسەتەنگیێ فرێ پەی ئۆجالانی و جمیەرەکەیش، بەڵام فەلسەفە و تێزەکێ ڕابەر ئۆجەلانی جە فرەو زانستگەکێ جیهانینە بە کۆنگرێ و کۆنفڕانسێ و کۆنیشتێ، زانستیانە پەیجۆرشان پەی مەکریۆنە و قوڵ باسێشان سەر مەکریانە و پسپۆڕێ و شارەزێ بەڕێز و شکۆۋە نزیکێشان مەباۋە. هاموەخت وێسەری دیموکراتیی ڕۆژئاڤاو کوردستانی و سەرنیشت و وەرهۆرزو سوریای کە زادەو هزر و فەلسەفەو ئۆجالانین، سەرەڕاو هێرشێ و هەڕەشێ سەریش سەرفرازانە پابەرجان و جە ئاستی فرە بەرزی جیهانیەنە بە شێۋازی شایستە باس مەکریۆنە و سات بەسات پەشیۋانەکێش زیاتەرێ مەبانێ.
"پەی ئازادیش سەدان گەورە کەمپەینێ و چالاکیێ ڕێکێوزیێنێ"
هامتەریب چەنی سەرجەم ئانیشان کە باسشان کریا و بە درک کەردەی بە گرنگی کەسایەتیی ئۆجالانی، جە ئاستو کوردستانی، وەرهۆرزی میانی و جیهانییەنە، سەدان گەورە کەمپەینێ و چالاکیێ جۆراوجۆرێ پەی ئازادی ڕێبەر ئاپۆی ڕێکێوزیێنێ کە سەدان گەورە کەسایەتیێ، سیاسەتمەدارێ و ئەکادیمسیەنێ و نویسەرێ و ڕۆشنویرێ جیهانیێ پێشەنگیشان مەکەرانێ و سات بەسات بازنەو کەمپەین و چالاکییەکان فراوانتەرێ مەبانێوە.
"پەلاماردای گارە، زاپ، مەتینا و ئاڤاشین بەردەوامی گەلەکۆمەی میاندەوڵەتین"
جە ٢٢مین ساڵەو گەلەکۆمە و پیلانگێڵنای میاندەوڵەتی دژ بە ڕێبەر ئۆجالان-یەنە، ڕژێمە ئەرگێرکەو توکیای پەی بە ئەنجامگیرکەردەی پیلانگێڵناکەی، سەرسەبای چوارشەممەی 10\02\2021ی، جە زەمین و ئاسمانەوە سوپاو ڕژێمە ئەرەگێر و دژە کوردەکەو تورکیای، یورش و پەلاماردایش دژ بە پانیشتو کوردستانی دەستپنە کەردەوە و ئی جارە یوتەر جە هەرێمەکانو پارێزنانی میدیای یانی هەرێمو 'گارە'ش کەرد ئامانج. بەڵام جە وەرانوەرەنە گەریلاکێ ئازادی کە شاگردێ و مسیارێ ڕێبازەکەو ڕێبەر ئاپۆیەنێ، بە توندی ڕووبەڕووێش بیێوە و دوژمنشان بەقورسی شکستدا و ڕاشان نەڎا دوژمن بەمەرام و ئامانجەکەیش بیاوۆنە.
هەرپاسە ٢٣مین ساڵیادو گەلەکۆمو میاندەوڵەتییەنە، ئەرتەشە ئەرەگێرەکەو تورکی جەمانگەو نیسانو ساڵەو ٢٠٢٢ێنە، سوپاو تورکی پەلامارەو زاپ، ئاڤاشین و مەتینایش داوە و ئی جارە چەک و تفاقی سەربازی و مۆدێرینی زەمینی و ئاسمانی وەڵکەوتەی سەربازی نەمەن دژ بە گەریلای بەکارشان نەئاوەرۆنە. تەنانەت کار یاوان بە ئاستێ کە سەدان جارێ چەکی قەدەغەی کیمیایی و بۆمبێ تاکتیکیێ ئەتۆمیێ بەکارباوەرۆنە. بەڵام دیسان بە مدرامان و قارەمانی بێهامتاو گەریلاکانو ئازادی کوردستانی، سوپاو تورکی چوون گارە شکست بەشش بی و ناچاریچ کریا شۆنیەرە بگێڵۆنەوە دماوە.
بە ئی جۆرە شکستدای تورکیای جە گارە و زاپ و هەرێمەکۍ تەرێنە، ببۆنە بە خاڵەو هۆرچەخیای و فاڕیای گەورە شونەو وێشەرە باوەرۆنە و ببۆنە بەسەرەتایێ پەی دمایی ئاوماو هەژەموون و کاریگەری تورکیای و ڕژێمەکەو ئەردۆغانی جە هەرێمەکەنەو دەرەنجام شکستدای بە گەلەکۆمە و پیلانگێڵنای میاندەوڵەتی دژ بە ڕێبەر ئاپۆی و ماڕای هەمیشەیی سیستەمو ئەشکەنجە و گۆشەگیری ئیمرالی و سەرئەنجام ئازادی ڕێبەر ئۆجالانیش شۆنیەرە بەیۆنە.
"ژەنی ژیای ئازادی"
جە رۆزگارو ئارۊیەنە سەروەختێوەنە دەربازێ ٢٥مین ساڵەو گەلەکۆمەو میاندەوڵەتی مەبێمێ کە جە وەراسانو کوردستان و ئێرانیەنە شۆڕش و سەرهۆردای گەلانی بە پێشەنگی ژەنا و بە دورشمەو "ژەنی ژیای ئازادی" ئینا ئارانە کە سەرچەمەکەش فەلسەفە و ویریاری ئۆجالانـیەن. جە ئێران و وەراسانەوە دروشمەکۍ دەربازو وڵاتا بییەن و ژەنی ژیای ئازدی جە ئیسەنە دنیاش تەنانەوە و ببیەن بە هیوابەخش و ئومێد پەی ڕزگار ژنا و سەرجەم مرۆڤایەتیی و هاوێنێوەن (ئاوێنە) گرد کەس حەز و ئاواتەکێش دلێشەنە مەوینۆنەوە.
"بە رۆحیەتو ئۆجالانی هامکاری کارەستابارەکان مەکەرانۍ"
ئێساڵ جە وەختێوەنە ٢٤مین ساڵیادو گەلەکۆمەو میاندەوڵەتی ١٥ شوباتی مەکرێۆنەوە کە کوردستان، تورکیا و سوریا ڕووبەڕووۍ بومەلەرزەی بیێنێوە و جە ئاکامشەنە دەیان هەزار کەسۍ گیانشان جەدەسەتدان و نزیک بە ١٠٠ هەزار کەسۍ تەرۍ زامدارێنێ و ملیۆنان کەسێچ بە بومەلرزەکەی کاریگەریێ بیێنۍ. پەوکەی ئا هێز و توانا کە گەلو کوردی و جمیەرە ئازادیۋازەکەیش ئێساڵ جە چوارچۋەو زنجیرێۋ چالاکیانە پەی شەرمەزارکەردەی گەلەکۆمەکەی و پەی ئازادی جەستەیی ڕابەرەکەیشان ئۆرگانیزەشان کەردەبێ، وستشا خزمەتو خەڵکە کارەساتبارەکەی و مسیارەکۍ و شاگردۍ و شۆنکەوتەکۍ ئا ڕابەرە ناوازەیە بە رۆحیەتو ئۆجالانی و پەیڕەوی جە فەلسەفەو کۆشایشەکەیش، سەرقاڵۍ هامکاری و بەهاناوەلوای ونەقۆمیایا و کارەستابارەکانۍ. چونکە فەلسەفە و پاردیگماو رابەر ئۆجالانی وەڵۍ جە گرد چێۋێۋی جمیەرێۋی ئانزانییەن و پەڕ پەڕەن جە وەرپەرسیاری و گیانو هامکاری و یاردیدای یەکتری و ساڕێژکەردەی زامەکاو هەنتری و دڵنەوایی دایۆ یوتری.
هـ.هـ
